ପୁରୀ: ବିଶ୍ବପ୍ରସିଦ୍ଧ ରଥଯାତ୍ରା ପାଇଁ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ଏହି ମେଗା ଆଧ୍ୟାତ୍ମିକ ଇଭେଣ୍ଟକୁ ସୂଚାରୁରୂପେ ଶେଷ କରିବା ପାଇଁ ମନ୍ଦିର ପ୍ରଶାସନ, ଜିଲ୍ଲା ପ୍ରଶାସନ, ପୋଲିସ, ପୌରପାଳିକା, ସ୍ବାସ୍ଥ୍ୟ, ଲୋକ ସମ୍ପର୍କ ପରି ରାଜ୍ୟ ସରକାରଙ୍କ ବିଭାଗ ସହ ଭାରତୀୟ ରେଳବାଇ ମଧ୍ୟ ବ୍ୟାପକ ପ୍ରସ୍ତୁତି କରିଛି । ଦେଶର ବିଭିନ୍ନ ସହରରୁ ପୁରୀକୁ 315 ସ୍ବତନ୍ତ୍ର ଟ୍ରେନ ଚାଲିବାକୁ ଘୋଷଣା ହୋଇଥିବା ବେଳେ ଏହାର ସମୀକ୍ଷା କରିଛନ୍ତି ରେଳମନ୍ତ୍ରୀ । ଗତକାଲି (ଶନିବାର) ରାତିରେ ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ପୁରୀ ରେଳ ଷ୍ଟେସନରେ ପହଞ୍ଚି ଭିତ୍ତିଭୂମି ଓ ଅନ୍ୟାନ୍ୟ ବ୍ୟବସ୍ଥାର ତଦାରଖ କରିଛନ୍ତି । ତାଙ୍କ ସହ ସ୍ଥାନୀୟ ସାଂସଦ ସମ୍ବିତ ପାତ୍ର ମଧ୍ୟ ଉପସ୍ଥିତ ଥିଲେ ।
ପୁରୀରେ ରେଳମନ୍ତ୍ରୀଙ୍କ ସମୀକ୍ଷା, ରଥଯାତ୍ରା ପାଇଁ 315 ସ୍ବତନ୍ତ୍ର ଟ୍ରେନ, ଷ୍ଟେସନରେ 15 ହଜାର ଭକ୍ତଙ୍କ ରହଣି ସୁବିଧା (ETV Bharat Odisha) ଏକ ଇନ୍ସପେକ୍ସଅନ ଲୋକୋମୋଟିଭ (ଇଞ୍ଜିନ)ରେ ଯାତ୍ରା କରି ପୁରୀ ରେଳ ଷ୍ଟେସନରେ ପହଞ୍ଚିଥିଲେ ବିଭାଗୀୟ ମନ୍ତ୍ରୀ ଅଶ୍ବିନୀ । ରେଳ ବିଭାଗର ବରିଷ୍ଠ ଅଧିକାରୀମାନେ ତାଙ୍କୁ ସ୍ବାଗତ କରିଥିଲେ । ସମଗ୍ର ଷ୍ଟେସନ ପରିସର ପରିଦର୍ଶନ କରିଥିଲା ମନ୍ତ୍ରୀଙ୍କ ନେତୃତ୍ବାଧୀନ ଟିମ୍ । ବରିଷ୍ଠ ଅଧିକାରୀମାନେ ତାଙ୍କୁ ଗ୍ରହଣ କରାଯାଇଥିବା ବ୍ୟବସ୍ଥା ସମ୍ପର୍କରେ ଅବଗତ କରିଥିଲେ । ଏହାପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ଅଶ୍ବିନୀ କହିଛନ୍ତି, ଗତବର୍ଷ ରଥଯାତ୍ରାରେ ୧୨ ଲକ୍ଷ ଯାତ୍ରୀ ପୁରୀ ଆସିଥିଲେ । ରେଳବାଇ ବେଶ ଭଲ ଭାବେ ଏହାକୁ ପରିଚାଳନା କରିଥିଲା । ଚଳିତ ବର୍ଷ ପ୍ରାୟ 15 ଲକ୍ଷ ଯାତ୍ରୀ ଆସିବା ନେଇ ବିଭାଗ ପକ୍ଷରୁ ଆକଳନ କରାଯିବା ସହ ସେହି ଆଧାରରେ ସମସ୍ତ ବ୍ୟବସ୍ଥା ମଧ୍ୟ ଗ୍ରହଣ କରାଯାଉଛି । 315 ଟି ସ୍ବତନ୍ତ୍ର ଟ୍ରେନ ସହ ଷ୍ଟେସନ ପରିସରରେ ପ୍ରାୟ 15 ହଜାର ଯାତ୍ରୀଙ୍କ ରହଣୀ ପାଇଁ ସମସ୍ତ ଆବଶ୍ୟକ ସୁବିଧା ବ୍ୟବସ୍ଥିତ କରାଯାଉଛି ।
ଏହା ମଧ୍ୟ ପଢନ୍ତୁ :- ଟି20 ବିଶ୍ବକପ୍ 2024: ଅପେକ୍ଷାର ଅନ୍ତ, ଭାରତ ବିଶ୍ୱ ଚମ୍ପିଆନ, 7 ରନରେ ହାରିଲା ଦକ୍ଷିଣ ଆଫ୍ରିକା - T20WORLD CUP 2024 FINAL
ରେଳମନ୍ତ୍ରୀ କହିଛନ୍ତି ଯେ, ଦଶ ବର୍ଷ ତଳେ ରଥଯାତ୍ରାରେ ମାତ୍ର ୮୭ଟି ଟ୍ରେନ୍ ଟ୍ରେନ୍ ଚାଲୁଥିଲା । ଏଥର ସଂଖ୍ୟା 315 ହେବ । ଚଳିତ ବର୍ଷ ୧୫ ହଜାର ଭକ୍ତଙ୍କ ପାଇଁ ଷ୍ଟେସନ ପରିସରରେ ଶୌଚାଳୟ, ପାନୀୟ ଜଳ ସହ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା ମଧ୍ୟ କରାଯାଉଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିର୍ଦ୍ଦେଶକ୍ରମେ ରେଳ ବିଭାଗ ପକ୍ଷରୁ ସମସ୍ତ ପଦକ୍ଷେପ ନିଆଯାଉଛି । ଚଳିତବର୍ଷ ୨୫ଟି ଜିଲ୍ଲାରୁ ପୁରୀକୁ ସ୍ବତନ୍ତ୍ର ଟ୍ରେନ ଚଳାଚଳ କରିବ । ବାଦାମପାହାଡ, ବାଙ୍ଗିରିପୋଷୀ, ରାଉରକେଲା, ସମ୍ବଲପୁର, ଜନୁଗଡ ରୋଡ, ସୋନପୁର, ଗୁଣୁପୁର, ବ୍ରହ୍ମପୁର, ଦଶପଲ୍ଲା, ଅନୁଗୋଳ, ପାରାଦ୍ବୀପ, କେନ୍ଦୁଝରଗଡ, ଭଦ୍ରକ ଓ ବାଲେଶ୍ବର ଭଳି ସ୍ଥାନଗୁଡିକରୁ ପୁରୀକୁ ସ୍ବତନ୍ତ୍ର ଟ୍ରେନ ଚଳାଚଳ ପାଇଁ ଯୋଜନା କରାଯାଇଛି । ରାଷ୍ଟ୍ରପତି ଦ୍ରୌପଦୀ ମୁର୍ମୁ ରଥଯାତ୍ରାରେ ସାମିଲ ହେବା ପାଇଁ ଆସୁଥିବାରୁ ଏହା ଆମ ପାଇଁ ଖୁସିର କଥା ।
ଇଟିଭି ଭାରତ, ପୁରୀ
