ଢେଙ୍କାନାଳ:ଚଳିତ ସାଧାରଣ ନିର୍ବାଚନ ଯେତିକି ପାଖେଇ ଆସୁଛି ସେତିକି ରାଜନୈତିକ ଉଷ୍ମତା ବଢିବାରେ ଲାଗିଛି । ହାତରେ ସମୟ କମ୍ ଥିବାରୁ ପ୍ରଚାରକୁ ଜୋରଦାର କରିଛନ୍ତି ନେତା । ବିଭିନ୍ନ ଦଳର ହେଭିୱେଟ ମାନେ ପ୍ରଚାର କରି ନିଜ ଦଳୟୀ ବିଧାୟକ ଓ ସାଂସଦ ପ୍ରାର୍ଥୀଙ୍କ ପାଇଁ ଭୋଟ ମାଗିଛନ୍ତି । ସେହିପରି ଢେଙ୍କାନାଳ ଜିଲ୍ଲାରେ ମଧ୍ୟ ନିର୍ବାଚନୀ ପାରଦ ଉପର ମୁହାଁ ହେଉଛି । ଢେଙ୍କାନାଳ ଆସନ୍ତା ୨୫ ତାରିଖରେ ତୃତୀୟ ପର୍ଯ୍ୟାୟ ମତଦାନ ହେବାକୁ ଥିବେବେଳେ କାମାକ୍ଷାନଗର ବିଜେଡି ବିଧାୟକ ପ୍ରାର୍ଥୀ ପ୍ରଫୁଲ୍ଲ ମଲ୍ଲିକ ମାରାଥନ ପ୍ରଚାର କରିଛନ୍ତି ।
ଢେଙ୍କାନାଳ ଜିଲ୍ଲାରେ ବିଜେଡି ସାଂସଦ ପ୍ରାର୍ଥୀ ଅବିନାଶ ଶାମଲ ଓ କାମାକ୍ଷାନଗର ବିଜେଡି ବିଧାୟକ ପ୍ରାର୍ଥୀ ପ୍ରଫୁଲ୍ଲ ମଲ୍ଲୀକଙ୍କ ମାରାଥନ ପ୍ରଚାର କରିଛନ୍ତି । ୧ ନଂ ଜୋନର ୮ଟି ପଞ୍ଚାୟତରେ ବୁଲି ବୁଲି ବିଜେଡି ସପକ୍ଷରେ ଭୋଟ ଭିକ୍ଷା କରୁଛନ୍ତି । ପରେ କାମାକ୍ଷାନଗର ସହରରେ ଏକ ରୋଡ ସୋ ମାଧ୍ୟମରେ ବାଇକ୍ ରାଲି ମଧ୍ୟ କରିଥିଲେ । ଶତାଧିକ ବିଜେଡି କର୍ମୀ ଓ ସମର୍ଥକ ଏହି ବାଇକ ରାଲିରେ ସାମିଲ ହୋଇଥିଲେ । ସହରର ବଜାର ସହ ବିଭିନ୍ନ ଓ୍ବାର୍ଡକୁ ବୁଲି ଭୋଟ ଭିକ୍ଷା କରିଥିଲେ ।
ବିଜେଡି ସାଂସଦ ପ୍ରାର୍ଥୀ ଅବିନାଶ ସାମଲ କହିଛନ୍ତି ଯେ, ରାଜ୍ୟ ସରକାରଙ୍କ ବିକାଶମୂଳକ କାର୍ଯ୍ୟକୁ ଆଧାର କରି ଲୋକଙ୍କ ବହୁ ସମର୍ଥନ ମିଳୁଛି । ଏହି କାର୍ଯ୍ୟକୁ ଆଗାମୀ ଦିନରେ ଆହୁରି ଅଧିକ କରିବା ପାଇଁ ଲୋକେ ବିଜୁ ଜନତା ଦଳକୁ ବିପୁଳ ସଂଖ୍ୟାରେ ଜୟଯୁକ୍ତ କରିବେ । ବିଗତ ଦିନରେ ଏହା ବିଜେଡିର ଗଡ ଥିଲା ଓ ଆଗାମୀ ଦିନରେ ମଧ୍ୟ ଗଡ ହୋଇରହିବ ।