ଭବାନୀପଟଣା:ଆସୁଛି ଗଣତନ୍ତ୍ରର ସବୁଠାରୁ ବଡ଼ ପର୍ବ । ଚଳିତ ସାଧାରଣ ନିର୍ବାଚନ ପାଇଁ ଆରମ୍ଭ ହୋଇଛି ପ୍ରସ୍ତୁତି । ନିର୍ବାଚନକୁ ନେଇ ରାଜନେତାଙ୍କ ଠାରୁ ଆରମ୍ଭ କରି ପ୍ରଶାସନିକସ୍ତରରେ ତତ୍ପରତା ପ୍ରକାଶ ପାଇଛି । ଏଥିପାଇଁ ଆଜି (ରବିବାର) କଳାହାଣ୍ଡି ଜିଲ୍ଲା ପ୍ରଶାସନ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଏହି ସମ୍ମିଳନୀରେ ଜିଲ୍ଲାପାଳ ପି ଅନ୍ୱେଷା ରେଡ୍ଡୀ, ଜିଲ୍ଲା ଆରକ୍ଷୀ ଅଧୀକ୍ଷକ ଅଭିଳାଷ ଜି, ଅତିରିକ୍ତ ଜିଲ୍ଲାପାଳ ତନ୍ମୟ ଦରୱାନ ଏବଂ ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ମନୋଜ ବେହେରା ପ୍ରମୁଖ ଉପସ୍ଥିତ ରହିଥିଲେ ।
ଜିଲ୍ଲାପାଳ ଦେଇଥିବା ସୂଚନା ଅନୁଯାୟୀ, ଚଳିତ ବର୍ଷ କଳାହାଣ୍ଡି ଜିଲ୍ଲାରେ ୧୧ ଲକ୍ଷ ୯୯ ହଜାର ୨୩୯ ଜଣ ଭୋଟର ନିଜର ମତ ସାବ୍ୟସ୍ତ କରିବେ । ତେବେ ୫ ଲକ୍ଷ ୯୭ ହଜାର ୯୭୩ ଜଣ ମହିଳା ଭୋଟର ରହିଥିବାବେଳେ ୬ ଲକ୍ଷ ୧ ହଜାର ୨୬୬ ଜଣ ପୁରୁଷ ଭୋଟର ରହିଛନ୍ତି । ସେହିପରି ୩୪ ହଜାର ୬୫୮ଜଣ ନୂଆଁ ଭୋଟର ରହିଛନ୍ତି ।
ସେହିପରି ଜିଲ୍ଲାରେ ୧୪ ସହ ୧୦ଟି ପୋଲିଂ ବୁଥର ବ୍ୟବସ୍ଥାର କରାଯିବା ବୋଲି ସୂଚନା ମିଳିଛି । ସେଥିମଧ୍ୟରୁ ୯୦ଟି ପିଙ୍କ୍ ବୁଥର ବ୍ୟବସ୍ଥା କରାଯାଇଥିବା ବେଳେ ୮୫ ବର୍ଷରୁ ଉର୍ଦ୍ଧ୍ବ ବୟସ୍କମାନଙ୍କ ପାଇଁ ବାଲାଟ ଭୋଟର ବ୍ୟବସ୍ଥା କରାଯାଇଛି । ଯେଉଁଥିରେ ବୟସ୍କ ବ୍ୟକ୍ତିମାନଙ୍କ ନିକଟରେ ଏକ ସ୍ଵତନ୍ତ୍ର ଟିମ୍ ପହଞ୍ଚି, ସେମାନଙ୍କ ମତଦାନ ଗ୍ରହଣ କରିବେ । ତେବେ ବାଲାଟ୍ ଭୋଟ ଗ୍ରହଣ ସମୟରେ ପୋଲିସ, ପୋଲିଂ ଅଧିକାରୀ ଓ ବିଭିନ୍ନ ଦଳର ଏଜେଣ୍ଟମାନେ ମଧ୍ୟ ଉପସ୍ଥିତ ରହିବେ ।