ଭୁବନେଶ୍ବର: ୧୬ ହଜାର କନିଷ୍ଠ ଶିକ୍ଷକ ନିଯୁକ୍ତି ପ୍ରସଙ୍ଗ । ଏହି ନିଯୁକ୍ତି ପ୍ରକ୍ରିୟାକୁ ବିରୋଧ କରି ନିୟମିତ କରିବାକୁ ଦାବି କଲା ପ୍ରାଥମିକ ବିଦ୍ୟାଳୟ ଶିକ୍ଷକ ସଂଘ । ରାଜ୍ୟରେ ଖାଲି ପଡ଼ିଛି ଲକ୍ଷାଧିକ ପ୍ରାଥମିକ ଶିକ୍ଷକ ପଦବୀ । ଏହାରି ମଧ୍ୟରେ ୧୬ ହଜାର ପ୍ରାଥମିକ ବିଦ୍ୟାଳୟର କନିଷ୍ଠ ଶିକ୍ଷକମାନଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଛି । ଏହି ପକ୍ରିୟାକୁ ବିରୋଧ କରିଛି ପ୍ରାଥମିକ ବିଦ୍ୟାଳୟ ଶିକ୍ଷକ ସଂଘ ।
ନିୟମିତ ନିଯୁକ୍ତି ଦାବି:
ପୂର୍ବ ସରକାର ଥିବା ସମୟରେ ଏହି ଦାବିକୁ ନେଇ ବାରମ୍ବାର ଅଭିଯୋଗ କରାଯାଇଥିବାବେଳେ ବର୍ତ୍ତମାନର ସରକାର ଏହି ନିଯୁକ୍ତି ପକ୍ରିୟାକୁ ଆପଣାଇଛନ୍ତି । ଯାହାକୁ ପ୍ରାଥମିକ ବିଦ୍ୟାଳୟ ଶିକ୍ଷକ ସଂଘ ବିରୋଧ କରିଛି । ଠିକା ବା ଚୁକ୍ତି ଭିତ୍ତିକ ନିଯୁକ୍ତି ନକରି ନିୟମିତ ନିଯୁକ୍ତି କରିବାକୁ ଦାବି କରିଛି ସଂଘ । ପ୍ରାଥମିକ ବିଦ୍ୟାଳୟ ଶିକ୍ଷକ ସଂଘର ସଭାପତି ବ୍ରହ୍ମାନନ୍ଦ ମହାରଣା କହିଛନ୍ତି,"କଳିଙ୍ଗ ଷ୍ଟାଡିୟମରେ ପ୍ରାଥମିକ ବିଦ୍ୟାଳୟର କନିଷ୍ଠ ଶିକ୍ଷକଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଛି । ଯାହା ଏକ ଚୁକ୍ତି ଭିତ୍ତିକ କନିଷ୍ଠ ଶିକ୍ଷକ ନିଯୁକ୍ତି ଅଟେ । ଆମେ ନିଯୁକ୍ତିକୁ ବିରୋଧ କରୁନାହୁଁ । କାରଣ ଓଡ଼ିଶାରେ ପ୍ରାଥମିକ ବିଦ୍ୟାଳୟରେ ଲକ୍ଷାଧିକ ଶିକ୍ଷକ ପଦବୀ ଖାଲି ପଡ଼ିଛି । କଣ୍ଟ୍ରାକ୍ଟଚୁଆଲ, ଚୁକ୍ତି ଭିତ୍ତିକ, ଠିକା ନିଯୁକ୍ତି ଆଦିକୁ ବିରୋଧ କରୁଛି ପ୍ରାଥମିକ ବିଦ୍ୟାଳୟ ଶିକ୍ଷକ ସଂଘ" ବୋଲି କହିଛନ୍ତି ସଭାପତି ବ୍ରହ୍ମାନନ୍ଦ ମହାରଣା ।
'ଠିକା ନୁହେଁ, ନିୟମିତ ନିଯୁକ୍ତି କରନ୍ତୁ'
ସେ ଆହୁରି ମଧ୍ୟ କହିଛନ୍ତି,"୨୦୨୨ ମସିହାରେ ସମସ୍ତ ବିଭାଗରୁ ଥିଲା ନିଯୁକ୍ତି ଉଠିଲା । ୬ ବର୍ଷ କିମ୍ବା ୮ ବର୍ଷ ଚାକିରି କରିଥିବା ବ୍ୟକ୍ତିଙ୍କୁ ରେଗୁଲାର କରିବେ ବୋଲି ଘୋଷଣା କରାଗଲା । କିନ୍ତୁ ପ୍ରାଥମିକ ଶିକ୍ଷାରୁ ଠିକା ନିଯୁକ୍ତି ଉଠିଲା ନାହିଁ । ସେତେବେଳେ କେଉଁ ସରକାର ଥିଲେ ତାଙ୍କୁ ମଧ୍ୟ ଏହି ପକ୍ରିୟାକୁ ବିରୋଧ କରିଥିଲୁ । ବର୍ତ୍ତମାନ ଯେଉଁ ସରକାର ଅଛନ୍ତି ପୂର୍ବ ସରକାରଙ୍କ ଭଳି ପ୍ରାଥମିକ ବିଦ୍ୟାଳୟର କନିଷ୍ଠ ଶିକ୍ଷକ ନିଯୁକ୍ତି କରାଇଲେ । ତେବେ ଏହି ପକ୍ରିୟାକୁ ସଂଘ ବିରୋଧ କରିବୁ । ଆଗାମୀ ଦିନରେ ଯେଉଁ ସବୁ ଲକ୍ଷାଧିକ ଶିକ୍ଷକ ପଦବୀ ଖାଲି ପଡ଼ିଛି ତାହାକୁ ପୂରଣ କରିବା ପାଇଁ ଠିକା ନିଯୁକ୍ତି ନକରି ନିୟମିତ ଭାବରେ ଶିକ୍ଷକ ନିଯୁକ୍ତି କରିବେ । ଯେଉଁ ମାନଙ୍କର ୬-୮ ବର୍ଷ ହେଲାଣି ସେମାନଙ୍କୁ ମୂଳ ଚାକିରିରେ ଗଣନା କରିବେ" ବୋଲି କହିଛନ୍ତି ପ୍ରାଥମିକ ବିଦ୍ୟାଳୟ ଶିକ୍ଷକ ସଂଘର ସଭାପତି ବ୍ରହ୍ମାନନ୍ଦ ମହାରଣା । ସେପଟେ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି, ପୂର୍ବ ସରକାର ସମୟରେ ଅନେକ ପଦବୀ ଖାଲି ଥିଲା । ଆମ ସରକାର ଆସିବା ପରେ ପ୍ରାଥମିକ ଶିକ୍ଷକ ପଦବୀ ପୂରଣ ହୋଇଛି ।"
କେଉଁ ଜିଲ୍ଲାରୁ କେତେ ଶିକ୍ଷକ ଶିକ୍ଷୟତ୍ରୀ ପାଇଛନ୍ତି ନିଯୁକ୍ତି ପତ୍ର :
ଇଟିଭି ଭାରତ, ଭୁବନେଶ୍ବର
