ଭୁବନେଶ୍ବର: ଆମେରିକାରେ‘ଇସ୍କନ’ ପକ୍ଷରୁ ଅଦିନିଆ ରଥଯାତ୍ରା ଆୟୋଜନ କରାଯିବା ପ୍ରସଙ୍ଗରେ ଆଇନମନ୍ତ୍ରୀଙ୍କୁ ଭେଟି ରାଜ୍ୟ ସରକାରଙ୍କ ହସ୍ତକ୍ଷେପ ଲୋଡିଲେ ବିଭିନ୍ନ ସଂଗଠନ । ଏହି ପ୍ରସଙ୍ଗକୁ ଗୁରୁତର ସହ ନେଇଛନ୍ତି ଆଇନମନ୍ତ୍ରୀ । ‘ଇସ୍କନ’ କର୍ତ୍ତୃପକ୍ଷଙ୍କ ସହିତ ଆଲୋଚନା କରାଯିବା ନେଇ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ପ୍ରତିଶ୍ରୁତି ମଧ୍ୟ ଦେଇଛନ୍ତି । ଏନେଇ ଖୁବଶୀଘ୍ର ପ୍ରକ୍ରିୟା ଆରମ୍ଭ ହେବ ।
- ‘ଇସ୍କନ’ ସହ ଆଲୋଚନା କରିବ ଶ୍ରୀମନ୍ଦିର ପ୍ରଶାସନ
‘ଇସ୍କନ’ର ଭାରତରେ ଥିବା ମୁଖ୍ୟମାନଙ୍କ ସହିତ ଆଲୋଚନା କରିବ ଶ୍ରୀମନ୍ଦିର ପ୍ରଶାସନ (ଏସଜେଟିଏ) । ମହାପ୍ରଭୁଙ୍କ ରଥଯାତ୍ରା ଯେଉଁ ତିଥିରେ ହୁଏ, ସେହି ତିଥିରେ କରିବା ସମସ୍ତଙ୍କର ଧର୍ମ । ହିନ୍ଦୁ ଧର୍ମରେ ବିଶ୍ୱାସ ରଖିଥିବା ଓ ପ୍ରଭୁ ଶ୍ରୀ ଜଗନ୍ନାଥଙ୍କ ଉପରେ ବିଶ୍ୱାସ ରଖିଥିବା ସମସ୍ତେ କିପରି ଏହି ନିୟମ ପାଳନ କରିବା ସେନେଇ ମନ୍ଦିର ପ୍ରଶାସନ ପକ୍ଷରୁ ଅନୁରୋଧ କରାଯିବ ବୋଲି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ।
- ଆମେରିକାରେ ଅଦିନିଆ ରଥଯାତ୍ରା
ଆମେରିକାର ବୋଷ୍ଟନ ସହରର ଇସ୍କନ ପକ୍ଷରୁ ଅଦିନିଆ ରଥଯାତ୍ରା କରିବାକୁ ନିଷ୍ପତ୍ତି ନେଇଥିବା ବେଳେ ଏହାକୁ ସବୁଆଡ଼ୁ ବିରୋଧ କରାଯାଉଛି । ଆଗାମୀ ନଭେମ୍ବର 3 ତାରିଖରେ ସ୍ନାନ ଯାତ୍ରା କରି ତାପରେ ରଥଯାତ୍ରା କରିବା ପାଇଁ ନିଷ୍ପତ୍ତି ନେଇଛନ୍ତି ଇସ୍କନ କର୍ତ୍ତୃପକ୍ଷ ।
- ସ୍କନ୍ଦ ପୁରାଣକୁ ମାନୁନି ‘ଇସ୍କନ’
ଏହାକୁ ବିରୋଧ କରି ଜଗନ୍ନାଥ ସଂସ୍କୃତି ପରିଷଦର ସଭାନେତ୍ରୀ ସଞ୍ଚିତା ମହାନ୍ତିଆଜି ଆଇନ ମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି । ଏଥିରେ ମୁଖ୍ୟମନ୍ତ୍ରୀ ଏବଂ ଆଇନ ମନ୍ତ୍ରୀ ହସ୍ତକ୍ଷେପ କରି ବନ୍ଦ କରାଯାଉ ବୋଲି ସେମାନେ ଦାବି କରିଛନ୍ତି । ସେ କହିଛନ୍ତି, ଯାହା ନିୟମ ଅଛି ବ୍ୟାସଦେବଙ୍କ ରଚିତ ‘ସ୍କନ୍ଦ ପୁରାଣ’ରେ ଉତ୍କଳ ଖଣ୍ଡରେ ଯାହା ବର୍ଣ୍ଣନା କରାଯାଇଛି ଚତୁର୍ଦ୍ଧାମୁର୍ତି ମହାପ୍ରଭୁଙ୍କର ସ୍ନାନଯାତ୍ରା ଜ୍ୟେଷ୍ଠ ମାସ ପୂର୍ଣ୍ଣମୀରେ ଅନୁଷ୍ଠିତ ହୁଏ । ଯେଉଁଥିରେ ମହାପ୍ରଭୁ ସ୍ନାନବେଦୀରେ ବସିଥାନ୍ତି । ସେହି ସମୟରେ ମହାପ୍ରଭୁ ଜାତି, ଧର୍ମ ଓ ବର୍ଣ୍ଣ ନିର୍ବିଶେଷରେ ବାହାରକୁ ଆସି ଭକ୍ତଙ୍କୁ ଦର୍ଶନ ଦିଅନ୍ତି ।