ବ୍ରହ୍ମପୁର:ଆମ୍ୱ ଟାକୁଆ ଖାଇ କନ୍ଧମାଳ ଜିଲ୍ଲାର ଗଜାପୁର ପଞ୍ଚାୟତର ମାଣ୍ଡିପଙ୍କା ଗ୍ରାମରେ ୮ ଜଣ ଅସୁସ୍ଥ ହେବା ଏବଂ ସେମାନଙ୍କ ମଧ୍ୟରୁ ଦୁଇ ଜଣଙ୍କ ମୃତ୍ୟୁ ଘଟଣା । ବ୍ରହ୍ମପୁର ଏମ୍.କେ.ସି.ଜି ମେଡିକାଲରେ ଚିକିତ୍ସିତ ହେଉଥିବା ଅସୁସ୍ଥଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ବ୍ରଜ କିଶୋର ତ୍ରିପାଠୀ । ତାଙ୍କ ସହ ମାନବାଧିକାର ସଦସ୍ୟ ମନୋଜ ଜେନା ମଧ୍ୟ ପହଞ୍ଚି କିଭଳି ଏବଂ କେଉଁ ପରିସ୍ଥିତିରେ ଏପରି ଘଟଣା ଘଟିଲା ତାହାକୁ ଅନୁଧ୍ୟାନ କରିଛନ୍ତି । ସେପଟେ ଘଟଣାର ବିଚାର ବିଭାଗୀୟ ତଦନ୍ତ ଦାବି କରିଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ।
ବିଚାର ବିଭାଗୀୟ ତଦନ୍ତ ଦାବି:
ସେ କହିଛନ୍ତି,"ଆମ୍ୱ ଟାକୁଆ ଖାଇଥିବା ପରିବାର ବର୍ଗଙ୍କୁ ଗତ ଜୁଲାଇ ମାସରେ ଚାଉଳ ଯୋଗାଇ ଦିଆଯାଇଥିଲା । ହେଲେ ପରବର୍ତ୍ତୀ ସମୟରେ ଚାଉଳ ନପାଇବା ଯୋଗୁଁ ସେମାନେ ବାଧ୍ୟ ହୋଇ ନିଜ ଘରେ ରଖିଥିବା ଆମ୍ୱ ଟାକୁଆକୁ ଖାଇଛନ୍ତି । ଆଦିବାସୀ ଅଞ୍ଚଳରେ ଯେଉଁ ଚାଉଳ ଯୋଗାଇ ଦିଆଯାଏ, ତାହା କେବଳ ଜଣଙ୍କ ପିଛା ମାତ୍ର ୧୫ ଦିନ ଚଳିବା ହୋଇଥାଏ । ଅନ୍ୟ ଦିନରେ ଅତ୍ୟନ୍ତ କଷ୍ଟକର ଜୀବନ ବିତାଉଛନ୍ତି । ପୂର୍ବରୁ ଓଡ଼ିଶାର ଯେଉଁ ଅପବାଦ ରହିଥିଲା ତାହାର ପୁନରାବୃତ୍ତି ଘଟଛି । ଯେଉଁମାନେ କହିଛନ୍ତି ସେମାନେ ଅଭ୍ୟାସ ଗତ ଭାବରେ ଖାଇଥାନ୍ତି, ତାହା ସମ୍ପୂର୍ଣ୍ଣ ଭୁଲ । ତେଣୁ ଘଟଣାର ଆର୍.ଡି.ସି ନୁହେଁ ବିଚାର ବିଭାଗୀୟ ତଦନ୍ତ ହେଉ ।"
ମାନବାଧିକାର କମିଶନଙ୍କ ନିକଟରେ ମାମଲା ରୁଜୁ:
ଆମ୍ୱ ଟାକୁଆ ଖାଇ ଦୁଇ ଜଣଙ୍କ ମୃତ୍ୟୁ ଘଟିବା ଭଳି ଗୁରୁତ୍ୱପୂର୍ଣ୍ଣ ବିଷୟକୁ ନେଇ ମାନବାଧିକାର କମିଶନଙ୍କ ନିକଟରେ ମାମଲା ରୁଜ କରାଯାଇଥିବା କହିଛନ୍ତି ବ୍ରହ୍ମପୁରକୁ ଆସିଥିବା ଏନ୍.ଏଚ୍.ଆର୍.ସିର ସଦସ୍ୟ ମନୋଜ ଜେନା । ଘଟଣାରେ ରୁନି ମାଝୀ ଓ ରମିତା ମାଝୀଙ୍କ ମୃତ୍ୟୁ ଘଟିଥିବା ବେଳେ ଜାତୀୟ ଖାଦ୍ୟ ସୁରକ୍ଷା ଆଇନ ବଳରେ ଯେଉଁ ଚାଉଳ ଯୋଗାଇବା କଥା ତାହା ଯୋଗାଇ ଦିଆଯାଇନଥିବା ଯୋଗୁଁ ଆଦିବାସୀ ପରିବାରର ସଦସ୍ୟମାନେ ଆମ୍ୱ ଟାକୁଆ ଖାଇଥିବା ସେ କହିଛନ୍ତି । ତେବେ ଦାୟିତ୍ୱରେ ଅବହେଳା କରିଥିବା ସରକାରୀ ଅଧିକାରୀ ଓ କର୍ମଚାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏନ୍.ଏଚ୍.ଆର୍.ସିରେ ମାମଲା ରୁଜୁ ହୋଇଥିବା ବେଳେ ଘଟଣାର ପ୍ରକୃତ ସତ୍ୟାସତ୍ୟ ଅନୁସନ୍ଧାନ କରିବାକୁ ଏକ ଟିମ୍ ଗ୍ରାମକୁ ଯିବା ପାଇଁ ଅବଗତ କରାଯାଇଥିବା କହିଛନ୍ତି ମନୋଜ ।