ଲଗାଣ ବର୍ଷା ଯୋଗୁଁ ମାଣ୍ଡିଆ ଚାଷୀଙ୍କ ମୁଣ୍ଡରେ ଚଡ଼କ, ପ୍ରଭାବିତ ହେବ ଫସଲ - millet farming affected

MILLET FARMING AFFECTED: କୋରାପୁଟ ଜିଲ୍ଲାରେ ଦୀର୍ଘ ଦିନ ହେବ ଜାରି ରହିଛି ଲଗାଣ ବର୍ଷା । ଏଥିପାଇଁ ମାଣ୍ଡିଆ ଚାଷ ସମ୍ପୂର୍ଣ୍ଣ କ୍ଷତିଗ୍ରସ୍ତ ହେବା ନେଇ ଆଶଙ୍କା କରାଯାଉଛି । ଚାଷୀମାନେ ଧାଡ଼ି ପଦ୍ଧତିରେ ଚାଷ କରି ସରକାରଙ୍କ ପାଖରୁ ପ୍ରୋତ୍ସାହନ ରାଶି ପାଉଥିବାବେଳେ ବର୍ତ୍ତମାନ ଯଦି ବୁଣା ପଦ୍ଧତିରେ ସେମାନେ ଚାଷ କରନ୍ତି,ତାହାଲେ ମିଳିବନି ପ୍ରୋତ୍ସାହନ ରାଶି । କ'ଣ କହିଲେ କୃଷି ଅଧିକାରୀ ଆସନ୍ତୁ ଜାଣିବା । ଅଧିକ ପଢନ୍ତୁ

କୋରାପୁଟ: ଦୀର୍ଘ ଦିନ ହେବ ଜିଲ୍ଲାରେ ଲଗାଣ ବର୍ଷା ଜାରି ରହିଛି । ଏହାର ପ୍ରଭାବରେ ଚାଷୀମାନେ ନାହିଁ ନଥିବା ହନ୍ତସନ୍ତ ହୋଉଛନ୍ତି । ବର୍ତ୍ତମାନ ମାଣ୍ଡିଆ ଚାଷ କରିବା ପାଇଁ ଉତ୍କୃଷ୍ଟ ସମୟ । କିନ୍ତୁ ଗତ ୧୦ରୁ୧୫ ଦିନ ଧରି ବର୍ଷା ଲାଗି ରହିଥିବା ଯୋଗୁଁ ଚାଷୀର କ୍ଷେତରେ ପ୍ରସ୍ତୁତ କରାଯାଇଥିବା ଚାରା ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି । କୋରାପୁଟ ବ୍ଲକ ଅନ୍ତର୍ଗତ ମାନାବର ପଞ୍ଚାୟତର ଯୁବଚାଷୀ ବତୀ ଜାନୀ ଦୁଇ ଦୁଇଥର ମାଣ୍ଡିଆ ଚାରା ପ୍ରସ୍ତୁତ କରିସାରିଥିବା ବେଳେ ତାହା ଜମିରେ ରୋପଣ କରିବା ପାଇଁ ଯୋଗ୍ୟ ହୋଇ ରହିନାହିଁ । ତେବେ ପୁଣି ସେମାନେ ବୁଣା ପଦ୍ଧତିକୁ ଆପଣାଇବେ ବୋଲି କହିଛନ୍ତି ସେ । ଯାହାଫଳରେ ଉତ୍ପାଦନ ହ୍ରାସ ପାଇବା ସହ ପ୍ରୋତ୍ସାହନ ରାଶିରୁ ବଞ୍ଚିତ ହେବେ ଚାଷୀ ।

ବୁଣା ପଦ୍ଧତିରେ ହ୍ରାସ ପାଇବ ଉତ୍ପାଦନ:

ଏନେଇ ଚାଷୀପୂର୍ବ ଗୌଡ଼ କହିଛନ୍ତି ,"ବୁଣା ପଦ୍ଧତି ଦ୍ଵାରା ଉତ୍ପାଦନ ହ୍ରାସ ପାଇବାର ଆଶଙ୍କା ରହିଛି । ସେହିପରି ଏସଏମଆଇ(ଧାଡ଼ି ପଦ୍ଧତି)ମାଧ୍ୟମରେ ରୋପିବା ଦ୍ବାରା ଏକର ପିଛା 7 ରୁ 8 କ୍ଵିଣ୍ଟାଲ ମାଣ୍ଡିଆ ଉତ୍ପାଦନ ହେଉଥିବାବେଳେ ବୁଣି ପଦ୍ଧତିରେ ତାହା 3 ରୁ 4 କ୍ଵିଣ୍ଟାଲକୁ ହ୍ରାସ ପାଇବ ।"

ବୁଣା ପଦ୍ଧତିରେ ମାଣ୍ଡିଆ ରୋପଣ କଲେ ମିଳିବନି ପ୍ରୋତ୍ସାହନ ରାଶି:

ସେହିପର କୋରାପୁଟ ଫାର୍ମର୍ସ ଆସୋସିଏସନର ସମ୍ପାଦକ ଶରତ ପଟ୍ଟନାୟକ କହିଛନ୍ତି," ମନ ଇଚ୍ଛା ବୁଣିଦେବା ଫଳରେ ଏସଏମଆଇ ମାଧ୍ୟମରେ ରୋପିବା ପାଇଁ ସରକାର ଯେଉଁ ପ୍ରୋତ୍ସାହନ ରାଶି ପ୍ରଦାନ କରନ୍ତି, ତାହା ଚାଷୀ ପାଇବାରୁ ମଧ୍ୟ ବଞ୍ଚିତ ହେବେ । ଏସଏମଆଇ ମାଧ୍ୟମରେ ରୋପିବା ପାଇଁ ଚାଷୀକୁ ଏକର ପିଛା ଦେଢ କିଲୋ ମାଣ୍ଡିଆ ବିହନ ଆବଶ୍ୟକ ହେଉଥିବା ବେଳେ ବୁଣିବା ପାଇଁ ତାକୁ ପ୍ରାୟ 30 କିଲୋ ବିହନର ଆବଶ୍ୟକତା ପଡିବ । ତେଣୁ ଚାଷୀର ଏହା ତ୍ରିକୋଣୀୟ ନଷ୍ଟକୁ ଆଖିରେ ରଖି ସରକାର ବର୍ତ୍ତମାନ ଠାରୁ କିପରି କ୍ଷତିପୂରଣ ମିଳପାରିବ ସେ ଦିଗରେ ବ୍ୟବସ୍ଥା କରିବା ଆବଶ୍ୟକ ରହିଛି ।"

କ'ଣ କହିଲେ କୃଷୀ ଅଧିକାରୀ:

ଏନେଇ କୃଷି ଅଧିକାରୀ ତାପସ ରାଏ କହିଛନ୍ତି," ଚାଷୀ ପାଇଁ ବର୍ତ୍ତମାନ ଏସଏମଆଇ ମାଧ୍ୟମରେ ରୋପିବା ସମ୍ଭବ ହୋଇନପାରିଲେ, ମାଣ୍ଡିଆ ଚାଷରେ ଧାଡ଼ି ବୁଣାକୁ ଆପଣେଇଲେ ମଧ୍ୟ କିଛି ମାତ୍ରାରେ ସରକାରୀ ପ୍ରୋତ୍ସାହନ ରାଶି ମିଳିପାରିବ ।"

ଇଟିଭି ଭାରତ,କୋରାପୁଟ