ରାଉରକେଲା: ବିପୁଳ ପରିମାଣର ନକଲି ବିଦେଶୀ ମଦ ଜବତ । ଅଟୋରେ ମଦ କାରବାର ଚାଲୁଥିବା ବେଳେ ଅବକାରୀ ବିଭାଗର ଚଢାଉ କରିଥିଲା । ଫଳରେ ଏହି ମାମଲାରେ ୩ଜଣ ମଦ ବେପାରୀଙ୍କୁ ଗିରଫ କରିଛି ପୋଲିସ । ଗିରଫ ହୋଇଥିବା ତିନି ଜଣ ଅଭିଯୁକ୍ତ ହେଉଛନ୍ତି ରାଉରକେଲା ସହରର ସେକ୍ଟର ଦୁଇ ଅଞ୍ଚଳର ରାଜୁ ସାହୁ, ଓମ ବାଘ ଏବଂ ବସନ୍ତ ସାହୁ ।
ସୂଚନା ଅନୁସାରେ, ଅନ୍ୟ ରାଜ୍ୟର ମଦକୁ ଆଣି ଓଡ଼ିଶାରେ ବିକ୍ରି କରୁଥିଲେ ମଦ ବେପାରୀ । ମଦକୁ ଆଣି ଅପମିଶ୍ରିତ କରି ଏହାକୁ ବଟଲିଂ କରି ବେଆଇନ ଭାବେ ବିକ୍ରି କରୁଥିଲେ । ଏହି ମଦ ନକଲି ହୋଇଥିବା ବେଳେ ସେଠାକାର ପ୍ରସ୍ତୁତକର୍ତ୍ତା ଏହାକୁ ନାଇଟ୍ ଗାର୍ଲ ନାମକ ଏକ କମ୍ପାନୀର ଲୋଗୋ ଲଗାଇ ବିକ୍ରି କରୁଥିଲେ । ଆବଶ୍ୟକ ପଡ଼ିଲେ ମଦ ବାସ୍ନା ହେଉଥିବା ଆସେଣ୍ଟ ମଧ୍ୟ ମିଶାଉଥିଲେ । OLA ଅଟୋରେ ଚାଲୁଥିଲା ମଦ ବେପାର । ଯେଉଁ ଅଟୋରେ ଯାତ୍ରୀ ଯାତାୟାତ କରିବା କଥା ସେହି ଅଟୋରେ ଚାଲିଥିଲା ମଦ ବେପାର ।
ଗତକାଲି(ରବିବାର) କୌଣସି ସୂତ୍ରରୁ ଖବର ପାଇ ସେକ୍ଟର-୨ ଅଞ୍ଚଳକୁ ମଦ ନେଇ ବିକ୍ରି କରିବାକୁ ଯାଉଥିବା ବେଳେ ଅବକାରୀ ବିଭାଗ ଚଢାଉ କରିଥିଲା । ଏହି ସମୟରେ ଅବକାରୀ ବିଭାଗ ବିପୁଳ ପରିମାଣର ମଦ ଜବତ କରିବା ସହ ଓଲା ଅଟୋ ଓଡ଼ି ୧୪୪ ୩୭୮୬, ଏକ ମଟରସାଇକେଲ ଓଡ଼ି ୧୪ଏଚ୍ ୧୯୫୦, ମଦ ବୋତଲ ଠିପି, ଲେବଲ, ଖାଲି ବୋତଲ, ନାମିଦାମୀ ବ୍ରାଣ୍ଡର ନକଲୀ ବିଦେଶୀ ମଦ, ଲେବୁଲ, ଇଏଲ ଏବଂ ନକଲି ମଦ ପ୍ରସ୍ତୁତ ପାଇଁ ବ୍ୟବହୃତ ବିଭିନ୍ନ ସାମଗ୍ରୀ ଜବତ କରାଯାଇଛି । ଆଦି ଜବତ କରିଛି । ତେବେ ଏହି ନକଲି ମଦକୁ କେଉଁ ଅଞ୍ଚଳ କିମ୍ବା କେଉଁ ଦୋକାନରେ ବିକ୍ରି କରାଯାଉଛି ସେ ନେଇ ବିଭାଗ ତଦନ୍ତ କରୁଛି ବୋଲି ଅବକାରୀ ବିଭାଗ ସୂଚନା ଦେଇଛି ।