ରାଉରକେଲା:ନାତିର ଟାଙ୍ଗିଆ ଚୋଟରେ ଜେଜେବାପା ମୃତ । ଏଭଳି ଘଟଣା ସାମ୍ନାକୁ ଆସିଛି ସୁନ୍ଦରଗଡ଼ ଜିଲ୍ଲା ଗୁରୁଣ୍ଡିଆ ଥାନା ଅଞ୍ଚଳରୁ । ଏନେଇ ପୋଲିସ ଘଟଣାସ୍ଥଳରେ ପହଞ୍ଚି ନାତିକୁ ଗିରଫ କରି କୋର୍ଟ ଚାଲାଣ କରିଛି । ଅଭିଯୁକ୍ତ ଜଣକ ବିମଲ ତିର୍କୀ ବୋଲି ଜଣାପଡିଛି ।
ସୂଚନା ଅନୁଯାୟୀ, ସୁନ୍ଦରଗଡ଼ ଜିଲ୍ଲା ଗୁରୁଣ୍ଡିଆ ଥାନା ଅଞ୍ଚଳ ଟୁଙ୍ଗୁରିଟୋଲି ଗ୍ରାମରେ ସପରିବାର ରହୁଥିଲେ । ମାଆ, ବାପା ଏବଂ ଜେଜେବାପା ସହ ହତ୍ୟାକାରୀ ନାତି ବିମଲ ତିର୍କୀ ବସବାସ କରୁଥିଲେ । ହେଲେ ବିମଲ ପ୍ରତ୍ୟେକ ଦିନ ମଦ ପିଇ ନିଶାସକ୍ତ ଅବସ୍ଥାରେ ଘରେ ଆସି ପାଟିତୁଣ୍ଡ କରେ । ଏଥିସହ ମଦ ପିଇବା ପାଇଁ ପାଟିତୁଣ୍ଡ କରି ଘରୁ ଟଙ୍କା ମାଗିଥାଏ । ହେଲେ ଗତକାଲି (ବୁଧବାର) ଏହା ଉଗ୍ରରୂପ ନେଇଥିଲା । ନିଶାସକ୍ତ ଅବସ୍ଥାରେ ନିଜ ରକ୍ତ ସମ୍ପର୍କକୁ ଭୁଲିଗଲା ବିମଲ । ତେବେ ଗତକାଲି ବିମଲ ପ୍ରାୟ ୩ଟା ସମୟରେ ଅତ୍ୟଧିକ ମଦ ପିଇ ଘରକୁ ଆସିଥିଲା । ଏହାକୁ ନେଇ ଜେଜେ ବାପା ତାକୁ ତାଗିଦ କରିବାରୁ ନିଶାରେ ଥିବା ନାତି ନିଜ ଜେଜେ ସହ ବଚସା କରିଥିଲା । ବଚସା ଧୀରେ ଧୀରେ ଉଗ୍ର ରୂପ ନେବା ପରେ ନାତି କ୍ରୋଧରେ ଜର୍ଜରିତ ହୋଇ ପାଖରେ ଥିବା ଏକ ଟାଙ୍ଗିଆରେ ନିଜ ଜେଜେ ବାପା ବନ୍ଧନ ତିର୍କୀକୁ ନିର୍ମମ ଭାବରେ ହାଣି ହତ୍ୟା କରିଥିଲା ।
ଏହା ମଧ୍ୟ ପଢନ୍ତୁ- ସାମାନ୍ୟ ବଚସାରୁ ହତ୍ୟା, ନିଶାଶକ୍ତ ଯୁବକର ଜୀବନ ନେଲା ମଦ୍ୟପ