ରାଉରକେଲା: ପରିଶ୍ରମ ଆଗରେ ହାର ମାନିଲା ପରିସ୍ଥିତି । ପରିବାରରେ ଅଭାବ ଅନଟନ ଏବଂ ପ୍ରତିକୂଳ ପରିସ୍ଥିତି ଆଗରେ ସଂଘର୍ଷ କରି ପାଇଲେ କୃତିତ୍ୱ । ଗରିବ ପରିବାରରୁ ହୋଇ ମଧ୍ୟ A1 ଏବଂ A2 ଗ୍ରେଡରେ ଉତ୍ତୀର୍ଣ୍ଣ ହେଇଛନ୍ତି ରାଉରକେଲା ଉଦିତନଗର ସରକାରୀ ବାଳିକା ଉଚ୍ଚ ବିଦ୍ୟାଳୟର ତିନି ଛାତ୍ରୀ । ଯାହାକୁ ନେଇ ସବୁଠି ଖୁସିର ଲହର ଖେଳିଯାଇଛି । ଛାତ୍ରୀମାନଙ୍କୁ ସ୍କୁଲ କର୍ତ୍ତୃପକ୍ଷ ଓ ସମ୍ପର୍କୀୟମାନେ ବେଶ ପ୍ରଶଂସା କରିଛନ୍ତି ।
ପ୍ରକାଶ ପାଇଛି ମାଟ୍ରିକ ରେଜଲ୍ଟ । ଛାତ୍ରଛାତ୍ରୀଙ୍କ ମଧ୍ୟରେ ପରୀକ୍ଷା ଫଳକୁ ନେଇ ଖୁସି ଏବଂ ଉନ୍ମାଦନା ଦେଖାଦେଇଛି । କିଏ ଭଲ ମାର୍କ ରଖିଛି ତ କିଏ ଆହୁରି ଭଲ ମାର୍କ ପାଇଁ ଆଶା ବାନ୍ଧିଥିଲା । ନିଜ ମାର୍କକୁ ନେଇ ବର୍ତ୍ତମାନ ସଭିଏଁ ଖୁସି । ୨୦୨୪ ମାଟ୍ରିକ୍ ପରୀକ୍ଷା ଫଳରେ ଏଥର ମଧ୍ୟ ଛାତ୍ରମାନଙ୍କଠାରୁ ବହୁ ଆଗରେ ଛାତ୍ରୀ ରହିଛନ୍ତି । ଛାତ୍ରଙ୍କ ତୁଳନାରେ ଛାତ୍ରୀଙ୍କ ପାସ୍ହାର ଏହି ବର୍ଷ ମଧ୍ୟ ଅଧିକ ରହିଛି ।
ମାଟ୍ରିକ ରେଜଲ୍ଟ ବାହାରିଥିବା ବେଳେ ରାଉରକେଲା ଉଦିତନଗର ସରକାରୀ ବାଳିକା ଉଚ୍ଚ ବିଦ୍ୟାଳୟର 3ଛାତ୍ରୀ ଏବେ ଚର୍ଚ୍ଚାରେ । ପରିବାରରେ ଅଭାବ ଅନଟନ ଏବଂ ପ୍ରତିକୂଳ ପରିସ୍ଥିତି ସହ ଲଢି ବେଶ ଭଲ ରେଜଲ୍ଟ କରିଛନ୍ତି ଏହି ୩ ଛାତ୍ରୀ । ରାଉରକେଲା ଉଦିତନଗର ବାଳିକା ଉଚ୍ଚ ବିଦ୍ୟାଳୟରେ ବଣାଇ ଅନ୍ତର୍ଗତ ବଡ଼ ଗୋଗୁଆ ଅଞ୍ଚଳର ହୀରାଧର ସାହୁଙ୍କ ଝିଅ ଅର୍ଚ୍ଚିତା ସାହୁ A1 ଗ୍ରେଡରେ ଉତ୍ତୀର୍ଣ୍ଣ ହୋଇ ନିଜ ପରିବାର ପାଇଁ ଗୌରବ ଆଣିଦେଇଛନ୍ତି । ଅର୍ଚ୍ଚିତାଙ୍କ ବାପା ହୀରାଧର ହେଉଛନ୍ତି ଜଣେ ଲାଇନ ମିସ୍ତ୍ରୀ । କଣ୍ଟ୍ରାକ୍ଟରମାନଙ୍କ ଅଧୀନରେ ରହି ଦିନ ମଜୁରିଆ ଭାବରେ କାମ କରନ୍ତି । ଝିଅକୁ କଷ୍ଟେମଷ୍ଟେ ପାଠ ପଢ଼ାଇଥିବା ବେଳେ ବର୍ତ୍ତମାନ ଝିଅର ସଫଳତା ଦେଖି ବାପା ଏବଂ ମାଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି । ଅର୍ଚ୍ଚିତା ସାହୁ ଭବିଷ୍ୟତରେ ଜଣେ ଶିକ୍ଷୟିତ୍ରୀ ହେବାକୁ ଆଶା ରଖିଛନ୍ତି ।