ବାଲେଶ୍ଵର: କଥାରେ ଅଛି ଚାଷ ଅଛି ଯାହାର, କି ଆନନ୍ଦ ତାହାର । ଏହି ଉକ୍ତିକୁ ମର୍ମେ ମର୍ମେ ବୁଝିଛନ୍ତି ଜଣେ ଶିକ୍ଷକ । ପେଶାରେ ଶିକ୍ଷକ ହୋଇବି ନିଶା ତାଙ୍କର ଚାଷ କରିବା । ନିଜ ନିଶାକୁ ମନରେ ନମାରି ତାକୁ ବାସ୍ତବ ଜୀବନରେ କାମରେ ଲଗାଇଛନ୍ତି । ଜମିରେ ସୁନାର ଫସଲ ଫଳାଇବା ସହ ଏଥିପାଇଁ ସେ ଜିଲ୍ଲାପାଳଙ୍କ ଠାରୁ ପୁରସ୍କୃତ ମଧ୍ୟ ହୋଇଛନ୍ତି । ଆମେ କହୁଛୁ ବାଲେଶ୍ଵରର ପ୍ରମୋଦ କୁମାର ରାଉତଙ୍କ କଥା । ଏପରିକି ନିଜ ଅଞ୍ଚଳର କେମିତି ଭଲ ଭାବରେ ଚାଷ କରିହେବ ସେ ପ୍ରଣାଳୀ ମଧ୍ୟ ଶିଖାଉଛନ୍ତି । ଅଳ୍ପ କିଛି ଟଙ୍କା ବିନିଯୋଗ କରି ପ୍ରମୋଦ ଚାଷ କାର୍ଯ୍ୟରୁ ଅନେକ ଲାଭବାନ ହେଉଛନ୍ତି ।
ବାଲେଶ୍ଵର ଜିଲ୍ଲା ସୋର ବ୍ଲକ ତଳନଗର ଅଞ୍ଚଳର ପ୍ରମୋଦ କୁମାର ରାଉତ । ପ୍ରମୋଦ ପେଶାରେ ଜଣେ ଶିକ୍ଷକ ହୋଇଥିବା ବେଳେ ନିଶା ତାଙ୍କର ଚାଷ କରିବା । ପିଲାଟି ଦିନରୁ ଚାଷ ପ୍ରତି ଦୁର୍ବଳତା ଥିବା ଯୋଗୁଁ ଏ ବୟସରେ ସେ ତାହାକୁ ସଫଳ କରି ପାରିଛନ୍ତି । ନିଜର ପାଞ୍ଚ ଏକର ଜାଗାରେ ପ୍ରମୋଦ ଚାଷ କରି ନିଜେ ଆନନ୍ଦିତ ହେବା ସହ ଅନ୍ୟଙ୍କ ପାଇଁ ପ୍ରେରଣା ସାଜିଛନ୍ତି । ପାଞ୍ଚ ଏକର ଜାଗାରେ ପ୍ରମୋଦ ବିଭିନ୍ନ ପ୍ରକାର ପନିପରିବା ଚାଷ କରିବା ସହ ସୋରିଷ, ଲେମ୍ବୁ, ପିଜୁଳି, ଥାଇଲାଣ୍ଡ ବରକୋଳି, ଗେଣ୍ଡୁଫୁଲ, ମାଛ ଏବଂ କୁକୁଡ଼ା ଚାଷ କରିଛନ୍ତି । ଜଣେ ସଫଳ ଚାଷୀ ଭାବେ ନିଜକୁ ପରିଗଣିତ କରିଛନ୍ତି । ଅଳ୍ପ କିଛି ଟଙ୍କା ବିନିଯୋଗ କରି ପ୍ରମୋଦ ଚାଷ କାର୍ଯ୍ୟରୁ ଅନେକ ଲାଭବାନ ହେଉଥିବା ବେଳେ ତାଙ୍କ ଚାଷ କାର୍ଯ୍ୟ ଦେଖିବା ପାଇଁ ତାଙ୍କ ଫାର୍ମରେ ଲୋକଙ୍କ ଭିଡ଼ ଜମୁଛି । ରାଜ୍ୟ ସରକାରଙ୍କ ବିଭିନ୍ନ ଯୋଜନାର ଲାଭ ଉଠାଇ ନିଜ ଚାଷ କାର୍ଯ୍ୟରେ ନିୟୋଜିତ କରିଛନ୍ତି ପ୍ରମୋଦ । ଆଉ ଏଥିପାଇଁ ଚଳିତ ବର୍ଷ ପ୍ରମୋଦ କୃଷିମେଳାରେ ଜିଲ୍ଲାପାଳଙ୍କ ଠାରୁ ସଫଳ ଚାଷୀ ଭାବେ ପୁରସ୍କୃତ ମଧ୍ୟ ହୋଇଛନ୍ତି ।