ଭୁବନେଶ୍ବର: ରାଜଧାନୀରେ ଆରମ୍ଭ ହେବ ଡାକ୍ତରଙ୍କ ସମ୍ମିଳନୀ । ଇଣ୍ଡିଆନ ମେଡିକାଲ ଆସୋସିଏସନ ପକ୍ଷରୁ ଆମସ୍କନ (AMSCON) ସମ୍ମିଳନୀ ଆୟୋଜନ ହେବ । ଆମସ୍କନ ସମ୍ମିଳନୀର ମୁଖ୍ୟ ଉଦ୍ଦେଶ୍ୟ ଡାକ୍ତରମାନଙ୍କୁ ପ୍ରଶିକ୍ଷଣ ହୋଇଥିବା ବେଳେ, ଏହି ସମ୍ମିଳନୀରେ ବିଭିନ୍ନ ବିଭାଗର ୨୫୦୦ ଡାକ୍ତର ଯୋଗଦେବାର କାର୍ଯ୍ୟକ୍ରମ ରହିଛି । ଏହାସହ ଏହି କାର୍ଯ୍ୟକ୍ରମରେ ଯୋଗଦେବା ପାଇଁ ୮୦୦୦ ପିଜି ଛାତ୍ରଛତ୍ରୀ ଆବେଦନ କରିଛନ୍ତି । ସମ୍ମିଳନୀଟି ନଭେମ୍ବର ୨୯ ତାରିଖରୁ ଆରମ୍ଭ ହୋଇ ଡିସେମ୍ବର ୧ ତାରିଖ ଯାଏଁ ଅନୁଷ୍ଠିତ ହେବ । ଏହି ୩ ଦିନିଆ ସମ୍ମିଳନୀକୁ କ୍ୟାପିଟାଲ ହସ୍ପିଟାଲ ସ୍ଥିତ ଆଇଏମଏ ବିଲଡିଂରେ କରିବା ପାଇଁ ଯୋଜନା କରାଯାଇଛି ।
ପ୍ରଥମ ଥର ପାଇଁ ସର୍ବଭାରତୀୟ ସ୍ତରର ଡାକ୍ତର ସମ୍ମିଳନୀ:
IAM ସଂପାଦକ ପ୍ରଫେସର ଅଭୟ କୁମାର ସାହୁ କହିଛନ୍ତି, "ଏହି ସର୍ବଭାରତୀୟ ସ୍ତରର ସମ୍ମିଳନୀ ପ୍ରଥମ ଥର ପାଇଁ ଭୁବନେଶ୍ବରରେ ଆୟୋଜନ ହେବ । ଏହି ସମ୍ମିଳନୀର ବିଶେଷତ୍ବ ହେଉଛି କୌଣସି ଗୋଟିଏ ବିଭାଗର ଡାକ୍ତର ଏଥିରେ ଯୋଗୋଦେଉ ନାହାନ୍ତି, ଅର୍ଥାତ୍ ସମସ୍ତ ବିଭାଗର ଡାକ୍ତର ଏଥିରେ ଯୋଗ ଦେବାର କାର୍ଯ୍ୟକ୍ରମ ରହିଛି । ମଣିଷ କିଭଳି ସୁସ୍ଥ ରହିପାରିବ ଏବଂ ଏକ ସୁସ୍ଥ ସମାଜ ଗଠନ କରିପାରିବ ତାହା ଉପରେ ହିଁ ବିଶେଷ ଗୁରୁତ୍ବ ଦିଆଯିବ । "ସ୍ବାସ୍ଥ୍ୟ ହିଁ ସମ୍ପଦ" କେବଳ କଥାରେ ରହିଲେ ହେବ ନାହିଁ, ବରଂ କିପରି ଏହି ସ୍ବାସ୍ଥ୍ୟର ଯତ୍ନ ନିଆଯାଇ ପାରିବ ଏବଂ ମାନବ ସମ୍ବଳକୁ ରକ୍ଷା କରାଯାଇ ପାରିବ ତାହାହିଁ ବିଶେଷ ଗୁରୁତ୍ବପୂର୍ଣ୍ଣ ।"
| ଏହାମଧ୍ୟ ପଢ଼ନ୍ତୁ...DG ସମ୍ମିଳନୀ, ଓଡ଼ିଶାରେ 3 ଦିନ ରହିବେ ପ୍ରଧାନମନ୍ତ୍ରୀ ମୋଦି |