ଭୁବନେଶ୍ବର:ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସରକାରରେ ହୋମଗାର୍ଡ ବିଭାଗରେ ବଡ ନିଯୁକ୍ତି । ହୋମଗାର୍ଡଙ୍କ ପୁନଃ ନିଯୁକ୍ତି ପାଇଁ ନିଷ୍ପତ୍ତି ନେଇଛନ୍ତି ନୂଆ ସରକାର । ଜିଲ୍ଲାପାଳ ଏବଂ ଆରକ୍ଷୀ ଅଧିକ୍ଷକ(ଏସ୍ପି) ସମ୍ମିଳନୀରେ ମୁଖ୍ୟମନ୍ତ୍ରୀ ଦେଇଛନ୍ତି ବଡ ସୂଚନା । ଖାଲି ସେତିକି ନୁହେଁ, ପ୍ରତି ଥାନାକୁ ମିଳିବ ବାଇକ୍ ଏବଂ ଚାରିଚକିଆ ଯାନ । ମେଡିକାଲରେ ଖୋଲିବ ନୂଆ ପୋଲିସ ଆଉଟପୋଷ୍ଟ । ଶ୍ରୀମନ୍ଦିର ପାଇଁ ସ୍ବତନ୍ତ୍ର ବାଟାଲିୟନ ଘୋଷଣା ସହିତ ଆଉ ୧୦ଟି ଓଡ୍ରାଫ୍ ୟୁନିଟ୍ ବଢ଼ାଯିବ କହିଛନ୍ତି ମୁଖ୍ୟମନ୍ତ୍ରୀ ।
‘୨୨୯୮ ହୋମଗାର୍ଡ ପୁନଃନିଯୁକ୍ତି ’-
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି "ହୋମଗାର୍ଡ ନିଯୁକ୍ତିକୁ ଗୁରୁତ୍ବ ଦେଉଛି ନୂଆ ସରକାର । ପୂର୍ବ ସରକାରରେ ହୋମଗାର୍ଡ ନିଯୁକ୍ତି ବନ୍ଦ ପଡ଼ିଥିଲା । ଆମ ସରକାରରେ ହୋମଗାର୍ଡଙ୍କ ନିଯୁକ୍ତିକୁ ଗୁରୁତ୍ବ ଦିଆଯାଉଛି । ହୋମଗାର୍ଡମାନେ ସବୁଠୁ ଅଧିକ କାମ କରିଥାନ୍ତି । ଆମ ସରକାରରେ କାର୍ଯ୍ୟରତ ହୋମଗାର୍ଡଙ୍କ ମୃତ୍ୟୁ ହେଲେ କ୍ଷତିପୂରଣ ଦେବାକୁ ଯୋଜନା ଚାଲିଛି । ମୃତ୍ୟୁ ପରେ ପରିବାରର ଜଣଙ୍କୁ ଚାକିରି ଦେବାକୁ ମଧ୍ୟ ଯୋଜନା ଚାଲିଛି । "
ପୋଲିସ ପାଇବେ ୯ ହଜାର ବାଇକ-
ରାଜ୍ୟର ପ୍ରତିଟି ଥାନାକୁ ଗୋଟିଏ ଲେଖାଏଁ ନୂଆ ବାଇକ ମିଳିବ । ଏହି କ୍ରମରେ ୯୦୦୦ ହଜାର ବାଇକ ବଣ୍ଟାଯିବ । ପ୍ରତି ଥାନାକୁ ଆଉ ଗୋଟିଏ ଲେଖାଏଁ ଚାରି ଚକିଆ ଗାଡ଼ି ବି ଦିଆଯିବ । ଫିଲ୍ଡ ଡ୍ୟୁଟି ପାଇଁ ଗୋଟିଏ ମୋଟର ସାଇକେଲ ଅଛି । ଖୁବଶୀଘ୍ର ଥାନାରେ ଦୁଇ ଓ ଚାରି ଚକିଆ ଗାଡ଼ି ବଢ଼ାଯିବ । ଆଉ ୧୦ଟି ଓଡ୍ରାଫ୍ ୟୁନିଟ ବଢ଼ାଯିବ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।