ଭୁବନେଶ୍ବର: ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ଓଡ଼ିଶା ଡ୍ୟାନ୍ସ ଏକାଡେମୀ, ଓଡ଼ିଶା ସଙ୍ଗୀତ ନାଟକ ଏକାଡେମୀ ଏବଂ ଆର୍ଟ ଭିଜନ୍ ଦ୍ବାରା ଆୟୋଜିତ ୨୦ତମ ଧଉଳି କଳିଙ୍ଗ ମହୋତ୍ସବର ଆଜିଥିଲା ଦ୍ବିତୀୟ ସନ୍ଧ୍ୟା । ଐତିହାସିକ ଧଉଳି ପାହାଡ଼ର ପାଦଦେଶ କଥକ ଏବଂ ଓଡ଼ିଶୀ ନୃତ୍ୟ ସହିତ ମୟୂରଭଞ୍ଜ ଛଉ ନୃତ୍ୟରେ ଆଜି ଚଳଚଞ୍ଚଳ । ଏସବୁକୁ ଉପଭୋଗ କରିବା ପାଇଁ ଦର୍ଶକଙ୍କର ମଧ୍ୟ ଖୁବ ସୁଅ ଛୁଟିଛି ।
ଦ୍ବିତୀୟ ସନ୍ଧ୍ୟାର ପ୍ରଥମ କାର୍ଯ୍ୟକ୍ରମ ଥିଲା ଇଶିରା ପାରିଖ ଓ ମୌଲିକ ଶାହଙ୍କ ନେତୃତ୍ବରେ ଅହମ୍ମଦାବାଦର ଅନାର୍ଟ ଡ୍ୟାନ୍ସ କମ୍ପାନୀର ଶିଳ୍ପୀମାନଙ୍କ ଦ୍ବାରା କଥକ ନୃତ୍ୟ । ସେମାନଙ୍କ ପ୍ରଥମ ଉପସ୍ଥାପନାରେ ଥିଲା ଅନ୍ତର ନାଦ, ଯାହା ମଣିଷର ପରମ ଶକ୍ତି ସହିତ ଦୃଢ ସମ୍ପର୍କର ମୂର୍ତ୍ତିମନ୍ତ ପ୍ରତୀକ ଥିଲା । ପରେ ପରେ ସେମାନଙ୍କର ପ୍ରସ୍ତୁତିରେ ଥିଲା 'ନିର୍ବିଘ୍ନମ୍', ଯେଉଁଥିରେ ଭଗବାନ ଗଣେଶଙ୍କୁ ଆରାଧନା କଲେ ମାନବଜାତିର ଶାନ୍ତି, ସୌହାର୍ଦ୍ଦ୍ୟ ଏବଂ ସମୃଦ୍ଧି ଆସିଥାଏ । ପରବର୍ତ୍ତୀ ପ୍ରସ୍ତୁତିଟି 'ରାଘବ ରଘୁରାଇ', ହିନ୍ଦୁ ଧର୍ମ ଓ ପୁରାଣର ଅରାଧ୍ୟ ଦେବତା ପ୍ରଭୁ ଶ୍ରୀରାମଙ୍କ କାହାଣୀ ଉପରେ ଆଧାରିତ ଥିଲା । ପରେ ପରେ 'ବାଁଶୁରିଆ', ଯେଉଁଥିରେ ଶ୍ରୀକୃଷ୍ଣଙ୍କ ମନମୁଗ୍ଧକର ଓ ମାଦକଭରା ବଂଶୀ ବାଦନକୁ ନୃତ୍ୟ ମାଧ୍ୟମରେ ବଖାଣିଥିଲେ ଶିଳ୍ପୀମାନେ । ଅନାର୍ଟ ଡ୍ୟାନ୍ସ କମ୍ପାନୀର ଶେଷ ପ୍ରସ୍ତୁତିରେ ଥିଲା 'ଉତ୍ସବ', ଯାହା ଅନନ୍ଦ ଉଲ୍ଲାସ ଭଳି ଭାବନା ଆମର ଅନ୍ତରତମ ଭାବନା ସହିତ ଜଡ଼ିତ ଏବଂ 'ଉତ୍ସବ' ହେଉଛି ଏହି ଭାବନାକୁ ପ୍ରକାଶ କରିବାର ଇଚ୍ଛା ।
କାର୍ଯ୍ୟକ୍ରମର ଦ୍ବିତୀୟ ପ୍ରସ୍ତୁତିରେ ଥିଲା ମୀରା ଦାସଙ୍କ ଦ୍ବାରା ପ୍ରତିଷ୍ଠିତ କଟକର ଗୁଞ୍ଜନ ଡ୍ୟାନ୍ସ ଏକାଡେମୀ ଶିଳ୍ପୀମାନଙ୍କ ଦ୍ବାରା ଓଡ଼ିଶୀ ନୃତ୍ୟ ପରିବେଷଣ । ନାରୀ ଚରିତ୍ରକୁ ସୁନ୍ଦର ଓ ସର୍ବସମ୍ମତି କ୍ରମେ ନଦୀ ଗତିପଥକୁ ଦର୍ଶାଇଥିବା ଏକ କାଳ୍ପନିକ ବିଷୟ ବସ୍ତୁକୁ ନେଇ ବିନ୍ଦୁରୁ ସିନ୍ଧୁ ନୃତ୍ୟ ପରିବେଷଣ କରିଥିଲେ । ଯାହାର ସଂଳାପ ପ୍ରସ୍ତୁତ କରିଥିଲେ କେଦାର ମିଶ୍ର ଓ ମୀରା ଦାସ, ସଙ୍ଗୀତ ଓ ତାଳ ସଂଯୋଜନା କରିଥିଲେ ଆନନ୍ଦ ପ୍ରସନ୍ନ ପଟ୍ଟନାୟକ ଏବଂ ନୃତ୍ୟ ସଂରଚନା କରିଥିଲେ ଗୁରୁ ମୀରା ଦାସ । କାର୍ଯ୍ୟକ୍ରମ ଶେଷରେ ଥିଲା ଅଭିଷେକ ତ୍ରିପାଠୀ ଓ ସାଥୀଙ୍କ ଦ୍ବାରା ମୟୂରଭଞ୍ଜ ଛଉ ନୃତ୍ୟ ପରିବେଷଣ । ସେମାନଙ୍କ ପ୍ରସ୍ତୁତିରେ ଥିଲା ସାନ୍ନିଧ୍ୟ, ଯାହା ବର୍ତ୍ତମାନ ବ୍ୟବହାର ହେଉଥିବା ପ୍ଲାଷ୍ଟିକର କୁପ୍ରଭାବ ଏବଂ ଭବିଷ୍ୟତ ପୀଢି ପାଇଁ ପରିବେଶ ସୁରକ୍ଷା ଉପରେ ଗୁରୁତ୍ବ ବହନ କରିଥିଲା । ଯାହାର ନୃତ୍ୟ ସଂରଚନା କରିଥିଲେ ପଦ୍ମଶ୍ରୀ ଗୁରୁ ଡକ୍ଟର ଇଲିଆନା ସିତାରିଷ୍ଟ ।