ସମ୍ବଲପୁର: ବୁର୍ଲା ଭୀମସାର ମେଡିକାଲର ବର୍ଜ୍ୟବସ୍ତୁ ପରିଚାଳନାରେ ଅନିୟମିତତା ହେଉଥିବା ଯୋଗୁଁ ପ୍ରଦୂଷଣ ନିୟନ୍ତ୍ରଣ ବୋର୍ଡର ଛାଟ । ଭୀମସାର ମେଡିକାଲକୁ 11 ଲକ୍ଷ 22 ହଜାର ଟଙ୍କାର ଫାଇନ କଲା ପ୍ରଦୂଷଣ ନିୟନ୍ତ୍ରଣ ବୋର୍ଡ । ବର୍ଜ୍ୟବସ୍ତୁ ପରିଚାଳନା ପାଇଁ ସବୁ ପ୍ରକାର ଯନ୍ତ୍ରପାତି ଓ ସୁବିଧା ଥାଇ ମଧ୍ୟ ଏହାର ବ୍ୟବହାର ସଠିକ୍ ଭାବରେ ହେଉନଥିବାର ଜଣା ପଡିବା ପରେ ପ୍ରଦୂଷଣ ନିୟନ୍ତ୍ରଣ ବୋର୍ଡ ଏହି ଭଳି ପଦକ୍ଷେପ ନେଇଛି । ଏନେଇ ସମ୍ବଲପୁର ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ଏସ.ଏନ.ନନ୍ଦ ସୂଚନା ଦେଇଛନ୍ତି ।
ଭୀମସାର ମେଡିକାଲକୁ ପ୍ରଦୂଷଣ ନିୟନ୍ତ୍ରଣ ବୋର୍ଡର ଛାଟ:
ମେଡିକାଲ ବର୍ଜ୍ୟବସ୍ତୁ ପରିଚାଳନାରେ 10ଟି ଅନିୟମିତତା ନଜରକୁ ଆସିଥିବା ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ସୂଚନା ଦେଇଛନ୍ତି । ଏନେଇ ସମ୍ବଲପୁର ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ଏସ.ଏନ. ନନ୍ଦ କହିଛନ୍ତି," ଭୀମସାରରେ ପଲ୍ୟୁସନ କଣ୍ଟ୍ରୋଲ ବୋର୍ଡର ନିୟମ ହିସାବରେ ତାଙ୍କର ସବୁ ଜିନିଷ ଅଛି । କିନ୍ତୁ ତାଙ୍କର ଯେଉଁ Incinerator ମେସିନ ଅଛି, Incineratorରେ ହାଇଟେମ୍ପ୍ରେଚର ରହିବା କଥା ସେଠି ଟେମ୍ପ୍ରେଚର ଇନ୍ସପେକ୍ସନ ବେଳେ ଦେଖା ଯାଇଥିଲା, ସେତିକି ଟେମ୍ପ୍ରେଚର ମେଣ୍ଟେନ ହେଉନାହିଁ । ସବୁ ଇନଷ୍ଟୁମେଣ୍ଟ ଅଛି କିନ୍ତୁ ଇନଷ୍ଟୁମେଣ୍ଟର କିଛି କାର୍ଯ୍ୟକ୍ଷମ ହେଉ ନାହିଁ । ଯେଉଁ ଟେମ୍ପ୍ରେଚରେ ଜଳିବା କଥା ତାହା ନଥିଲା ।"
ବର୍ଜ୍ୟବସ୍ତୁ ପରିଚାଳନାରେ ଅବ୍ୟବସ୍ଥା:
ସୂଚନାମୁତାବକ ଏହି ମେସିନରେ ହାଇ ଟେମ୍ପ୍ରେଚର ମେଡିକାଲ ବର୍ଜ୍ୟବସ୍ତୁ ଜଳା ଯାଇଥାଏ । ଏଥିରେ ତାପମାତ୍ରା 1050 ଡିଗ୍ରୀ ତାପମାତ୍ରା ରହିବା କଥା, ତେବେ ଯେତେବେଳେ ପ୍ରଦୂଷଣ ନିୟନ୍ତ୍ରଣ ବୋର୍ଡର ସରପ୍ରାଇଜ ଭିଜିଟ ହୋଇଥିଲା ସେତେବେଳେ ଏଥିରେ ତାପମାତ୍ରା ମାତ୍ର 350 ଡିଗ୍ରୀ ଥିଲା । ଠିକ ସେହିପରି ସେଠାରେ ମେଡିକାଲ ବର୍ଜ୍ୟବସ୍ତୁ ପରିଚାଳନା ବ୍ୟବସ୍ଥା ନେଇ ଥିବା ଅନଲାଇନ ସିଷ୍ଟମ ମେସିନ କାର୍ଯ୍ୟକ୍ଷମ ନଥିଲା । ଏହା ସହ Incinerator ମେସିନରୁ ବାହାରୁ ଥିବା ପାଉଁଶକୁ Hazardous waste ଭାବେ ପରିଗଣିତ କରାଯାଏ, ତେବେ ସେଟା Hazardous waste ଅଟେ କି ନୁହେଁ ତାହା ଟେଷ୍ଟ କରାଯାଇନଥିଲା ।