ନୂଆଦିଲ୍ଲୀ : ଭାରତର ଷ୍ଟାର ମହିଳା ରେସଲର ଭିନେଶ ଫୋଗାଟ ରବିବାର (25 ଅଗଷ୍ଟ) ତାଙ୍କର 30ତମ ଜନ୍ମଦିନ ପାଳନ କରୁଛନ୍ତି । ପ୍ୟାରିସ୍ ଅଲିମ୍ପିକ୍ସ 2024ରେ 100 ଗ୍ରାମ ଅଧିକ ଓଜନ ହେତୁ ଫାଇନାଲରେ ପହଞ୍ଚି ମଧ୍ୟ ଭିନେଶଙ୍କୁ ଅଯୋଗ୍ୟ ଘଷୋଣା କରାଯାଇଥିଲା । ଏହା ସହିତ ସେ ସ୍ୱର୍ଣ୍ଣ ପଦକ ହରାଇବା ସହିତ ତାଙ୍କୁ ଅନେକ ସମସ୍ୟାର ସମ୍ମୁଖୀନ ମଧ୍ୟ ହେବାକୁ ପଡିଛି । ତେବେ ଏଠାରେ ଭିନେଶଙ୍କ ଜୀବନ ସହ ଜଡିତ କିଛି ଗୁରୁତ୍ୱପୂର୍ଣ୍ଣ କଥା ଏବଂ ତାଙ୍କର କିଛି ଦମଦାର ରେକର୍ଡ ବିଷୟରେ ଆମେ ଆପଣଙ୍କୁ କହିବାକୁ ଯାଉଛୁ ।
ଭିନେଶଙ୍କ ଜୀବନ ସହ ଜଡ଼ିତ କିଛି ଗୁରୁତ୍ବପୂର୍ଣ୍ଣ କଥା :-
- ଭାରତର ଷ୍ଟାର ମହିଳା ରେସଲର ଭିନେଶ ଫୋଗାଟ 25 ଅଗଷ୍ଟ 1994ରେ ହରିୟାଣାର ଭିୱାନୀ ଜିଲ୍ଲାର ବଲାଲି ଗ୍ରାମରେ ଜନ୍ମଗ୍ରହଣ କରିଥିଲେ ।
- ଭିନେଶଙ୍କ ପରିବାରରେ ତାଙ୍କ ବଡ଼ ବାପା ମହାବୀର ସିଂ ଫୋଗାଟ କୁସ୍ତିଯୋଦ୍ଧା ଥିଲେ । ସେ ତାଙ୍କ ଝିଅ ଗୀତା ଓ ବବିତାଙ୍କୁ ଆଗଧାଡ଼ିର କୁସ୍ତିଯୋଦ୍ଧା ଭାବେ ଦେଶରେ ପରିଚିତ ଦେଇଥିଲେ ।
- ଭିନେଶ ନିଜ ସମ୍ପର୍କୀୟ ଭଉଣୀଙ୍କ ସହିତ ହିଁ ନିଜ ବଡ଼ ବାପାଙ୍କଠାରୁ କୁସ୍ତି ଶିଖିବା ଆରମ୍ଭ କରିଥିଲେ ।
- ଭିନେଶ କେବଳ 9 ବର୍ଷ ବୟସରେ ନିଜ ପିତା ରାଜପାଲ ଫୋଗାଟଙ୍କୁ ହରାଇ ଥିଲେ । ଏହାପରେ ତାଙ୍କ ମାଆ କ୍ୟାନ୍ସରରେ ପୀଡ଼ିତ ହୋଇଥିଲେ ।
- ଏହି ଷ୍ଟାର ଭାରତୀୟ ରେସଲର ସୋମବୀର ରାଠୀଙ୍କୁ ବିବାହ କରିଥିଲେ । ସୋମବୀର ମଧ୍ୟ ଜଣେ ରେସଲର ଥିଲେ । ସେ ନିଜ ବିବାହରେ ହୋମ କୁଣ୍ଡ ଚାରିପାଖରେ 7 ବଦଳରେ 8 ଘେରା ବୁଲି ଚର୍ଚ୍ଚାକୁ ଆସିଥିଲେ । 'ବେଟି ବଚାଓ ବେଟି ପଢ଼ାଓ' ଅଭିଯାନର ପ୍ରଚାର ପାଇଁ ସେ ଅଷ୍ଟମ ଘେରା ବୁଲିଥିଲେ ।
- ଭାରତୀୟ କୁସ୍ତି ସଂଘର ପୂର୍ବତନ ସଭାପତି ତଥା ବିଜେପି ନେତା ବ୍ରିଜ ଭୂଷଣ ଶରଣ ସିଂହଙ୍କ ବିରୋଧରେ ଯୌନ ଉତ୍ପୀଡ଼ନ ମାମଲାରେ ହୋଇଥିବା କୁସ୍ତିଯୋଦ୍ଧାଙ୍କ ଆନ୍ଦୋଳନରେ ଭିନେଶ ଏକ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥିଲେ । ସେ ଦିଲ୍ଲୀର ଜନ୍ତରମନ୍ତରଠାରେ ବ୍ରିଜଭୂଷଣ ଶରଣ ସିଂଙ୍କ ବିରୋଧରେ ଆନ୍ଦୋଳନ କରି ବହୁତ ସଙ୍ଘର୍ଷ କରିଛନ୍ତି ।
ଭିନେଶଙ୍କ କ୍ୟାରିୟର ଓ ତାଙ୍କ ରେକର୍ଡ :-
- 2013ରେ ଦିଲ୍ଲୀରେ ଅନୁଷ୍ଠିତ ଏସିଆନ ରେସଲିଂ ଚାମ୍ପିୟନସିପରେ 52 କିଲୋଗ୍ରାମ ଓଜନ ବର୍ଗରେ ବ୍ରୋଞ୍ଜ ପଦକ ଜିତି ଭିନେଶ ପ୍ରଥମେ ଲାଇମଲାଇଟକୁ ଆସିଥିଲେ ।
- ଏହା ପରେ ଭିନେଶ ଦକ୍ଷିଣ ଆଫ୍ରିକାର ଜୋହାନ୍ସବର୍ଗରେ ଚାଲିଥିବା କମନୱେଲଥ ରେସଲିଂ ଚାମ୍ପିୟନସିପରେ ରୌପ୍ୟ ପଦକ ଜିତିଥିଲେ ।
- 2014 କମନୱେଲଥ ଗେମ୍ସରେ ଏବଂ ଏସୀୟ ଗେମ୍ସ 2018ରେ ସ୍ୱର୍ଣ୍ଣ ପଦକ ଜିତିଛନ୍ତି ଭିନେଶ ଫୋଗାଟ ।
- 2018 କମନୱେଲଥ ଗେମ୍ସରେ 50 କିଲୋଗ୍ରାମ ଓଜନ ବର୍ଗରେ ଭିନେଶ ସ୍ବର୍ଣ୍ଣ ପଦକ ଜିତିଥିଲେ ।
- କମନୱେଲଥ୍ ଗେମ୍ସରେ 3ଟି ସ୍ବର୍ଣ୍ଣ ପଦକ, ବିଶ୍ବ ଚାମ୍ପିୟନସିପରେ 2ଟି ବ୍ରୋଞ୍ଜ ପଦକ, ଏସୀୟ ଗେମ୍ସରେ ଗୋଟିଏ ସ୍ୱର୍ଣ୍ଣ ପଦକ, 2019 ବିଶ୍ୱ ଚାମ୍ପିଅନସିପ୍ ବ୍ରୋଞ୍ଜ ଏବଂ 2021 ଏସୀୟ ଚାମ୍ପିଅନ୍ରେ ସ୍ୱର୍ଣ୍ଣ ପଦକ ଜିତିଛନ୍ତି ଭିନେଶ ।
- ଭିନେଶ ରିଓ ଅଲିମ୍ପିକ୍ସ 2016, ଟୋକିଓ ଅଲିମ୍ପିକ୍ସ 2020 ଏବଂ ପ୍ୟାରିସ ଅଲିମ୍ପିକ୍ସ 2024ରେ ଅଂଶଗ୍ରହଣ କରିଛନ୍ତି ।
- 2024ରେ ଡିଫେଣ୍ଡିଂ ଚାମ୍ପିୟନ ସୁସାକିଙ୍କୁ କ୍ବାର୍ଟର ଫାଇନାଲରେ ହରାଇଥିଲେ ଏବଂ ସେମିଫାଇନାଲ ଜିତି ଅଲିମ୍ପିକ୍ସ ଫାଇନାଲରେ ପ୍ରବେଶ କରିଥିବା ପ୍ରଥମ ଭାରତୀୟ ରେସଲର ହୋଇଥିଲେ ଭିନେଶ ଫୋଗାଟ । କିନ୍ତୁ ତାଙ୍କୁ ଫାଇନାଲ ମ୍ୟାଚ୍ ପୂର୍ବରୁ ଅଯୋଗ୍ୟ ଘୋଷିତ କରାଯିବାରୁ ସେ ପଦକ ଜିତିପାରିନଥିଲେ ।