ଓ୍ବାଂଶିଟନ:ଦୀର୍ଘ 10 ବର୍ଷ ଅପେକ୍ଷାର ଅନ୍ତ ଘଟିଛି । ତୃତୀୟ ଥର ପାଇଁ ଟି 20 ବିଶ୍ବକପର ଫାଇନାଲରେ ପ୍ରବେଶ କରିଛି ଟିମ ଇଣ୍ଡିଆ । ସେମିଫାଇାନଲରେ ବର୍ଷା ସାଜିଲାନି ବାଧକ । ଭାରତର ବିଜୟ ଧାରାରେ ବ୍ରେକ ଲଗାଇପାରିଲା ନାହିଁ ବର୍ଷା । ଟି 20 ବିଶ୍ବକପର ସେମିଫାଇନାଲରେ ଟିମ ଇଣ୍ଡିଆର ଦମଦାର ବିଜୟ । 68 ରନରେ ଇଂଲଣ୍ଡକୁ ପରାସ୍ତ କରି 2022 ସେମିଫାଇାନଲର ପ୍ରତିଶୋଧ ନେଲା ମେନ ଇନ ବ୍ଲୁ । ପ୍ରୋଭିଡେନ୍ସ ଷ୍ଟାଡିୟମରେ ହିଟ ମ୍ୟାନଙ୍କ ଛକା ଚୌକାର ବର୍ଷା । ଅକ୍ଷର ଓ କୁଳଦୀପଙ୍କ ଯାଦୁକରୀ ସ୍ପିନ୍ରେ ମାଟି କାମୁଡିଲା ଇଲଂଣ୍ଡ ବାହିନୀ । ଚଳିତ ଟୁର୍ଣ୍ଣାମେଣ୍ଟରେ ବର୍ତ୍ତମାନ ପର୍ଯ୍ୟନ୍ତ ଅପରାଜୟ ରହି ଫାଇନାଲକୁ ପ୍ରବେଶ କରିଛି ରୋହିତ ବାହିନୀ । ତୃତୀୟ ଥର ଟ୍ରଫି ହାତେଇବାର ସ୍ବପ୍ନ ଇଂଲଣ୍ଡର ଧୂଳିସାତ ହୋଇଛି । ଆସନ୍ତା 29 ତାରିଖରେ ଫାଇନାଲ ମ୍ୟାଚ ଖେଳାଯିବ । ଟ୍ରଫି ପାଇଁ ଦକ୍ଷିଣ ଆଫ୍ରିକା ଓ ବାରତ ମଧ୍ୟରେ ମହାମୁକାବିଲା ହେବ ।
10 ବର୍ଷ ପରେ ଟି 20 ବିଶ୍ବକପ ଫାଇାନଲରେ ଭାରତ:10 ବର୍ଷ ପୂର୍ବେ ଅର୍ଥାତ 2014ରେ ଏହି ଟୁର୍ଣ୍ଣାମେଣ୍ଟର ବାଂଲାଦେଶ ଆୟୋଜନ କରିଥିଲା । ସେର ଇ ବାଂଲା ଷ୍ଟାଡିୟମରେ ଭାରତ ଏବଂ ଶ୍ରୀଲଙ୍କା ମଧ୍ୟରେ ଫାଇନାଲ ମୁକାବିଲା ଖେଳାଯାଇଥିଲା । ଏହି ମ୍ୟାଚ୍ରେ ପ୍ରଥମେ ଭାରତ ବ୍ୟାଟିଂ କରି 20 ଓଭରରେ 4 ୱିକେଟ୍ ହରାଇ 130 ରନ୍ କରିଥିଲା। ଏହାର ଜବାବରେ ଶ୍ରୀଲଙ୍କା 17.5 ଓଭରରେ 5 ୱିକେଟ୍ ହରାଇ 134 ରନରେ ବିଜୟୀ ବିଶ୍ୱକପ 2014 ଟାଇଟଲ ଜିତିଥିଲା। ଏବେ ଭାରତ 10 ବର୍ଷ ପରେ ପୁଣିଥରେ ଟି -20 ବିଶ୍ୱକପ ଫାଇନାଲରେ ପହଞ୍ଚିଛି ।
ତୃତୀୟ ଥର ଫାଇନାଲରେ ଭାରତ:ଟି 20 ବିଶ୍ବକପରେ ତୃତୀୟ ଥର ପାଇଁ ଫାଇନାଲରେ ପ୍ରବେଶ କରିଛି ଟିମ୍ ଇଣ୍ଡିଆ । 2007ରେ ପ୍ରଥମ ଥର ଆରମ୍ଭ ହୋଇଥିଲା ଟି 20 ବିଶ୍ବକପରେ ମହେନ୍ଦ୍ରେ ସିଂ ଧୋନିଙ୍କ ନେତୃତ୍ବରେ ଭାରତ ଫାଇନାଲରେ ପ୍ରବେଶ କରି ଟ୍ରଫି ହାତେଇଥିଲା । ଏହାପରେ 2014ରେ ଧୋନିଙ୍କ ନେତୃତ୍ବରେ ଫାଇନାଲରେ ପ୍ରବେଶ କରିଥିଲା । କିନ୍ତୁ ଶ୍ରୀଲଙ୍କା ଠାରୁ ପରାଜିତ ହୋଇ ଟ୍ରଫି ହାତେଇବାରେ ଗୋଟିଏ ପାଦ ପଛରେ ରହିଯାଇଥିଲା ଭାରତ । ଏହାପରେ ଚଳିତ ଟୁର୍ଣ୍ଣାମେଣ୍ଟରେ ତୃତୀୟ ଥର ପାଇଁ ଭାରତ ଫାଇନାଲରେ ପ୍ରବେଶ କରିଛି ଓ ପୁଣି ଥରେ ଟ୍ରଫି ନେବାର ସ୍ବପ୍ନକୁ ପୂରଣ କରିବାକୁ ଯାଉଛି ।