ପ୍ୟାରିସ (ଫ୍ରାନ୍ସ):ନିଜ କ୍ୟାରିୟରରପ୍ରଥମ ଅଲିମ୍ପିକ୍ସ ଖେଳିବାକୁ ଯାଇଥିବା ଓଡ଼ିଆ ପୁଅ କିଶୋର ଜେନା ଯୋଗ୍ୟତା ପର୍ଯ୍ୟାୟରେ ଫେଲ ମାରିଛନ୍ତି । ସେ ଯଥାସମ୍ଭବ ପ୍ରୟାସ ସତ୍ତ୍ବେ ସେ 80.73 ମିଟର ହିଁ ଶ୍ରେଷ୍ଠ ପ୍ରଦର୍ଶନ ଦେଇପାରିଛନ୍ତି । ଫଳରେ ସେ ଯୋଗ୍ୟତା ପର୍ଯ୍ୟାୟରେ 9ମ ସ୍ଥାନରେ ରହିଛନ୍ତି । ଅନ୍ୟପଟେ ଭାରତର ସୁନା ପୁଅ ନୀରଜ ଚୋପ୍ରା ପ୍ରଥ ଥ୍ରୋ'ରେ ହିଁ କମାଲ କରିଛନ୍ତି । ସେ 89.35 ମିଟର ଦୂରକୁ ଜାଭେଲିନ ଫିଙ୍ଗି ସିଧାସଳଖ ଫାଇନାଲକୁ ଯୋଗ୍ୟତା ଅର୍ଜନ କରିଛନ୍ତି ।
ବେଷ୍ଟ ଦେଇପାରିଲେନି କିଶୋର :-
କିଶୋର ଜେନା ଆଜି ନିଜ ସର୍ବଶ୍ରେଷ୍ଠ ପ୍ରଦର୍ଶନ ଦେଇପାରିନାହାନ୍ତି । ପ୍ରଥମ ପ୍ରୟାସରେ ସେ 80.73 ମିଟର ଦୂରକୁ ଜାଭେଲିନ ଫିଙ୍ଗିଥିଲେ । ଦୁର୍ଭାଗ୍ୟବଶତଃ ଦ୍ବିତୀୟ ପ୍ରଚେଷ୍ଟା ସେ ଫାଉଲ କରିଦେଇଥିଲେ । ଏହାପରେ ତୃତୀୟ ପ୍ରୟାସରେ ସେ 80.21 ଦୂରତାକୁ ବର୍ଚ୍ଛା ଫିଙ୍ଗି ପାରିଥିଲେ । ତେବେ ପ୍ରଥମ ପ୍ରୟାସରେ ସେ ଫିଙ୍ଗିଥିବା 80.73 ଆଜି ତାଙ୍କର ଶ୍ରେଷ୍ଠ ପ୍ରଦର୍ଶନ ଥିବାରୁ ଏହାକୁ ହିଁ ଗଣତିକୁ ନିଆଯାଇଥିଲା । ହେଲେ ସିଧାସଳଖ ଫଇନାଲ୍ରେ ପ୍ରବେଶ କରିବା ପାଇଁ ନିର୍ଦ୍ଧାରିତ ଦୂରତା ହେଉଛି 84 ମିଟର । ଯଦି କୌଣସି ଆଥଲେଟ୍ 3 ଥର ପ୍ରୟାସ ଭିତରେ 84 ମିଟର ଦୂରତାକୁ ଜାଭେଲିନ ଫିଙ୍ଗି ଦିଅନ୍ତି, ତେବେ ସେ ସିଧାସଳଖ ଫାଇନାଲକୁ ଉନ୍ନୀତ ହେବେ । ହେଲେ 2022 ଏସିଆନ ଗେମ୍ସରେ 87.54 ମିଟର ଦୂରତାକୁ ଜାଭେଲିନ ଫିଙ୍ଗି ରୌପ୍ୟ ପଦକ ଜିତିଥିବା ଓଡ଼ିଆ ପୁଅ କିଶୋର ଜେନା ଆଜି ନିଜର ସର୍ବଶ୍ରେଷ୍ଠ ଦେବାରେ ବିଫଳ ହୋଇଥିଲେ । ଫଳରେ 80.73 ମିଟର ଶ୍ରେଷ୍ଠ ପ୍ରଦର୍ଶନ ସହ ସେ ଫାଇନାଲ ରେସ୍ରୁ ବାଦ ପଡ଼ିଛନ୍ତି ।
ଗୋଟିଏ ଥ୍ରୋ'ରେ ଫାଇନାଲ୍ରେ ନୀରଜ ଚୋପ୍ରା :-
ଅନ୍ୟପଟେ ଭାରତର ଷ୍ଟାର ଜାଭେଲିନ୍ ଥ୍ରୋୟର ନୀରଜ ଚୋପ୍ରା ଚମତ୍କାର ପ୍ରଦର୍ଶନ କରିଛନ୍ତି । ଭାରତର ସୁନା ପୁଅ ନୀରଜ ନିଜର ପ୍ରଥମ ଥ୍ରୋରେ ଯୋଗ୍ୟତା ମାର୍କ ଅତିକ୍ରମ କରି ଫାଇନାଲରେ ପ୍ରବେଶ କରିଛନ୍ତି । ନୀରଜ 89.34 ମିଟର ଦୂରକୁ ଜାଭେଲିନ ଫିଙ୍ଗି ନିଜର ଅଲିମ୍ପିକ୍ସ କ୍ୟାରିୟରର ଶ୍ରେଷ୍ଠ ଥ୍ରୋ କରିଛନ୍ତି । ପୁରୁଷ ଜାଭେଲିନ୍ ଥ୍ରୋ ଇଭେଣ୍ଟର ଯୋଗ୍ୟତା ପର୍ଯ୍ୟାୟରେ ଭାରତର ସୁନା ପୁଅ ନୀରଜ ଚୋପ୍ରା ନିଜ ପ୍ରଥମ ପ୍ରୟାସରେ ହିଁ 89.34 ମିଟର ଦୂରକୁ ଚମତ୍କାର ଥ୍ରୋ କରିଥିଲେ । ଫଳସ୍ୱରୂପ, ସେ ସହଜରେ ଯୋଗ୍ୟତା ମାର୍କ ଅତିକ୍ରମ କରି କ୍ରମାଗତ ଦ୍ବିତୀୟ ଥର ପାଇଁ ଅଲିମ୍ପିକ୍ସ ଫାଇନାଲରେ ପ୍ରବେଶ କରିଛନ୍ତି । ଟୋକିଓ 2020 ଚାମ୍ପିଅନ୍ ନୀରଜ ଚୋପ୍ରା ପ୍ୟାରିସ୍ରୁ ମଧ୍ୟ ସ୍ବର୍ଣ୍ଣ ଆଣିବେ ବୋଲି 140 କୋଟି ଭାରତୀୟ ଆଶା ରଖିଛନ୍ତି ।