ପ୍ୟାରିସ (ଫ୍ରାନ୍ସ): କ୍ବାର୍ଟର ଫାଇନାଲ୍ରେ ପ୍ରବେଶ କଲେ ଭାରତୀୟ ଷ୍ଟାର ସଟ୍ଲର୍ ଲକ୍ଷ୍ୟ ସେନ୍ । ଇଣ୍ଡୋନେସିଆର ଜୋନାଥନ୍ ଖ୍ରୀଷ୍ଟିଙ୍କୁ ଯଥାକ୍ରମେ 21-18 ଓ 21-12 ସ୍କେରରେ ପରାସ୍ତ କରି ରାଉଣ୍ଡ ଅଫ୍ 16ରେ ପହଞ୍ଚିଛନ୍ତି ଲକ୍ଷ୍ୟ ସେନ୍ । ସେ ମ୍ୟାଚ୍ ଆରମ୍ଭରୁ ପଛରେ ପଡ଼ିଯାଇଥିଲେ । କିନ୍ତୁ ସେ ଚ୍ୟାଲେଞ୍ଜରୁ ପଛକୁ ହଟିନଥିଲେ ଏବଂ ଖ୍ରୀଷ୍ଟିଙ୍କୁ କଡ଼ା ମୁକାବିଲା କରିଥିଲେ । କଡ଼ା ସଙ୍ଘର୍ଷପୂର୍ଣ୍ଣ ପ୍ରଥମ ସେଟ୍କୁ 21-18ରେ ଜିତିନେିଥିଲେ ଲକ୍ଷ୍ୟ ସେନ୍ । ଏହାପରେ ଦ୍ବିତୀୟ ସେଟ୍ରେ ସେ ଆହୁରି ପ୍ରଭାବୀ ପ୍ରଦର୍ଶନ କରିଥିଲେ । ଏହି ସେଟ୍କୁ ସେ 21-12 ସ୍କୋର ସହିତ ସହଜରେ ଜିତିନେଇଥିଲେ ।
କ୍ବାର୍ଟର ଫାଇନାଲ୍ରେ ମୁହାଁମୁହିଁ ହେବେ ଦୁଇ ଭାରତୀୟ !:-
22 ବର୍ଷୀୟ ଷ୍ଟାର ଇଣ୍ଡିଆନ ସଟ୍ଲର୍ ଲକ୍ଷ୍ୟ ସେନ୍ ବେଶ ପରିପକ୍ବତା ଏବଂ କୌଶଳ ଦକ୍ଷତା ପ୍ରଦର୍ଶନ କରି ଏସୀୟ ଚମ୍ପିଆନ୍ ଜୋନାଥନ୍ ଖ୍ରୀଷ୍ଟିଙ୍କୁ ଯଥାକ୍ରମେ 21-18 ଓ 21-12 ସ୍କୋର ସହିତ ଉଭୟ ସେଟ୍ରେ ପରାସ୍ତ କରିଛନ୍ତି । ବିଶ୍ବର 3 ନମ୍ବର ମାନ୍ୟତା ପ୍ରାପ୍ତ ସଟ୍ଲର୍ଙ୍କୁ ଏକପାଖିଆ ଭାବେ ହରାଇଛନ୍ତି 22 ବର୍ଷୀୟ ଭାରତୀୟ ସଟ୍ଲର୍ ଲକ୍ଷ୍ୟ ସେନ୍ । ଅନ୍ୟପଟେ ଆଜି ରାତିରେ ଗ୍ରୁପ୍ ପର୍ଯ୍ୟାୟ ମ୍ୟାଚରେ ଭିଏତନାମର ଡ୍ୟୁକ୍ ଫାଟ ଲେ'ଙ୍କୁ ଭେଟିବେ ଭାରତୀୟ ସଟ୍ଲର୍ ଏଚଏସ ପ୍ରଣୟ । ସେ ଯଦି କ୍ବାର୍ଟର ଫାଇନାଲ୍କୁ ଯୋଗ୍ୟତା ଅର୍ଜନ କରନ୍ତି, ତେବେ କ୍ବାର୍ଟର ଫାଇନାଲ୍ରେ ଦୁଇ ଭାରତୀୟ ସଟ୍ଲର୍ ପରସ୍ପର ମୁହାଁମୁହିଁ ହୋଇପାରନ୍ତି । ଅର୍ଥାତ ରାଉଣ୍ଡ ଅଫ୍ 16ରେ ଲକ୍ଷ୍ୟ ସେନ୍ ଓ ଏଚଏସ ପ୍ରଣୟଙ୍କ ମଧ୍ୟରେ ମ୍ୟାଚ୍ରେ ହେବାର ସମ୍ଭାବନା ରହିଛି ।