ହାଇଦ୍ରାବାଦ: ଆଜି ଆଇପିଏଲରେ ଶେଷ ହେବ ଲିଗ ପର୍ଯ୍ୟାୟ ମ୍ୟାଚ । ଶେଷ ଦୁଇଟି ଲିଗ 69 ଓ 70ତମ ମ୍ୟାଚ ଆଜି ଖେଳାଯିବ । ଅପରାହ୍ନରେ ସନରାଇଜର୍ସ ହାଇଦ୍ରାବାଦ ଓ ପଞ୍ଜାବ କିଙ୍ଗ୍ସ ମଧ୍ୟରେ ମୁକାବିଲା ହେବ । ସନ୍ଧ୍ୟାରେ ରାଜସ୍ଥାନ ରୟାଲ୍ସ ଓ କୋଲକାତା ନାଇଟ ରାଇଡର୍ସ ମୁହାଁମୁହିଁ ହେବେ । ପଏଣ୍ଟ ଟେବୁଲର ଦ୍ବିତୀୟ ସ୍ଥାନକୁ ଉନ୍ନୀତ ହେବାକୁ ଲକ୍ଷ୍ୟ ରଖିଛି ହାଇଦ୍ରାବାଦ । ସେପଟେ ଶେଷ ମ୍ୟାଚରେ ବିଜୟୀ ହୋଇ ଅଭିଯାନ ଶେଷ କରିବା ଲକ୍ଷ୍ୟରେ ରହିଛି ପଞ୍ଜାବ । ରାଜସ୍ଥାନ ପରାଜୟ ଧାରାରେ ବ୍ରେକ ଲଗାଇ ବିଜୟ ଧାରାକୁ ଫେରିବାକୁ ବ୍ୟାକୁଳ ହୋଇଥିବା ବେଳେ ପଏଣ୍ଟ ଟେବୁଲର ଶୀର୍ଷରେ ଦବଦବା ଜାରି ରଖିଛି କୋଲକାତା ।
PBKS VS SRH: ଅପରାହ୍ନ 3ଟା 30ରେ ହାଇଦ୍ରାବାଦରେ ଏସଆରଏଚ ଓ ପଞ୍ଜାବ ମଧ୍ୟରେ ମ୍ୟାଚ ଖେଳାଯିବ । ଦଳ ପ୍ଲେ ଅଫରୁ ବାଦ ପଡିଥିଲେ ମଧ୍ୟ ସମ୍ମାନ ବଞ୍ଚାଇବାକୁ ଜୋରଦାର କସରତ କରିବ । ଅଧିନାୟକ ସାମ କୁରାନ ଇଂଲଣ୍ଡ ପ୍ରତ୍ୟାବର୍ତ୍ତନ କରିଥିବା ବେଳେ ଆଜି ଦଳର ନେତୃତ୍ୱ ନେବେ ଜିତେଶ ଶର୍ମା । ହାଇଦ୍ରାବାଦ ପ୍ଲେ ଅଫରେ ପ୍ରବେଶ କରିଥିଲେ ମଧ୍ୟ ପଏଣ୍ଟ ଟେବୁଲର ଦ୍ବିତୀୟ ସ୍ଥାନ ପାଇଁ ଆଜି ଲଢେଇ କରିବ ।