ହାଇଦ୍ରାବାଦ: ଭାରତ ଓ ଇଂଲଣ୍ଡ ମଧ୍ୟରେ ଗୁରୁବାର (ଜାନୁଆରୀ 25) ଠାରୁ ଆରମ୍ଭ ହେବ 5 ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚ୍ । ହାଇଦ୍ରାବାଦସ୍ଥିତ ରାଜୀବ ଗାନ୍ଧୀ ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମରେ ପ୍ରଥମ ମ୍ଯାଚ୍ ଗୁରୁବାର ସକାଳ 9.30ରୁ ଆରମ୍ଭ ହେବ । ଏହା ପୂର୍ବରୁ ଉଭୟ ଦଳର ସମସ୍ତ ଖେଳାଳି ଏଠାରେ ପହଞ୍ଚି ଜୋରଦାର ଅଭ୍ୟାସ କରିଛନ୍ତି । ତେବେ ଘରୋଇ ମୈଦାନରେ ମ୍ୟାଚ୍ ଖେଳିବା ଆଗରୁ ବାପାଙ୍କୁ ହରାଇଥିବା କଥା କହି ଭାବୁକ ହୋଇଛନ୍ତି ଭାରତୀୟ ଦଳର ଷ୍ଟାର ପେସର ମହମ୍ମଦ ସିରାଜ । ତେବେ ମ୍ୟାଚ୍ ପୂର୍ବରୁ ସେ ଇଂଲଣ୍ଡକୁ ମଧ୍ୟ ଏକ ଖୋଲା ଚେତାବନୀ ଦେଇଛନ୍ତି ।
ବାପାଙ୍କ ମୃତ୍ୟୁ ନେଇ ଭାବୁକ ହେଲେ ସିରାଜ: ମ୍ୟାଚ୍ ପୂର୍ବରୁ ଜିଓ ସିନେମା ସହ ବାର୍ତ୍ତାଳାପ ବେଳେ ନିଜ ବାପାଙ୍କ ନିଧନ ନେଇ ଭାବୁକ ହୋଇଛନ୍ତି ସିରାଜ । ସେ କହିଛନ୍ତି, "ଅଷ୍ଟ୍ରେଲିଆରେ ମୋର ଟେଷ୍ଟ ଡେବ୍ୟୁ ପୂର୍ବରୁ ମୁଁ ମୋ ବାପାଙ୍କୁ ହରାଇଥିଲି । ଏହି ସମୟ ମୋ ଜୀବନର ସବୁଠାରୁ କଷ୍ଟଦାୟକ ସମୟ ଥିଲା । ମୁଁ ସେତେବେଳେ ସଙ୍ଗରୋଧରେ ଏକା ଥିଲି । କେହି ଆସି ମୋତେ ଭେଟି ପାରୁନଥିଲେ । ଏହାପରେ ମୁଁ ଭାବିଲି ଯେ, ମୁଁ ଭାରତ ପାଇଁ ଟେଷ୍ଟ କ୍ରିକେଟ୍ ଖେଳିବା ଉଚିତ୍, ଏହା ମୋର ବାପାଙ୍କ ସ୍ୱପ୍ନ ଥିଲା । ମୁଁ କେବଳ ମୋ ବାପାଙ୍କ ସ୍ୱପ୍ନକୁ ପୂରଣ କରିବାକୁ ଚାହୁଁଥିଲି ।" ଏଭଳି କହି କ୍ୟାମେରା ଆଗରେ ହିଁ କାନ୍ଦ କାନ୍ଦ ହୋଇଯାଇଥିଲେ ସିରାଜ ।
ଏହା ମଧ୍ୟ ପଢ଼ନ୍ତୁ...ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରେ ୱିକେଟ୍କିପିଂ କରିବେନି ରାହୁଲ: ଦ୍ରାବିଡ
ଟେଷ୍ଟ ଡେବ୍ୟୁ ନେଇ ଏମିତି କହିଲେ: ସିରାଜ ନିଜର ଟେଷ୍ଟ ପଦାର୍ପଣ ନେଇ କହିଲେ, "ମେଲବର୍ଣ୍ଣରେ ବକ୍ସିଂ ଡେ' ଟେଷ୍ଟରେ ଡେବ୍ୟୁ କରିବାର ସୁଯୋଗ ପାଇଲି । ସେତେବେଳେ ମୁଁ ଭାବୁଥିଲି ଯଦି ମୋ ବାପା ସେଠାରେ ଥାଆନ୍ତେ, କେତେ ଖୁସି ହୋଇଥାଆନ୍ତେ । କିନ୍ତୁ ତାଙ୍କର ଆଶୀର୍ବାଦ ମୋ ସହିତ ଥିଲା ଏବଂ ତାହା ହିଁ ମୋତେ ଆଗକୁ ବଢ଼ାଇଥିଲା । ଡେବ୍ୟୁ ବିଷୟରେ ଜାଣିବା ପରେ ମୁଁ ମୋ ପରିବାରକୁ ପ୍ରଥମେ କହିଥିଲି ଯେ ମୁଁ କାଲି ଖେଳୁଛି । ଏତେ ଖୁସିରେ ମୋତେ ନିଦ ବି ହେଲା ନାହିଁ ।"