ମୁମ୍ବାଇ: ମହିଳା ପ୍ରିମିୟର ଲିଗ୍ 2024 ପାଇଁ ଆରମ୍ଭ ହେଲା କାଉଣ୍ଟ ଡାଉନ୍ । ଏନେଇ କ୍ରୀଡ଼ାସୂଚୀ ଘୋଷଣା କରିଛି ବିସିସିଆଇ । ଆସନ୍ତା ଫେବୃଆରୀ 23ରୁ ଆରମ୍ଭ ହେବ ଏହି ହାଇପ୍ରୋଫାଇଲ୍ ମହିଳା କ୍ରିକେଟ୍ ଲିଗ୍ । ଟୁର୍ଣ୍ଣାମେଣ୍ଟର ସମସ୍ତ ମ୍ୟାଚ୍ ବେଙ୍ଗାଲୁରୁ ଓ ଦିଲ୍ଲୀରେ ଅନୁଷ୍ଠିତ ହେବାକୁ ଥିବାବେଳେ 17 ମାର୍ଚ୍ଚରେ ଏହାର ଫାଇନାଲ୍ ମ୍ୟାଚ୍ ଖେଳାଯିବ । ଏହି ରୋମାଞ୍ଚକର ମହିଳା କ୍ରିକେଟ୍ ଲିଗ୍ରେ ମୋଟ 5ଟି ଦଳ ଅଂଶଗ୍ରହଣ କରୁଥିବା ବେଳେ 20ଟି ଲିଗ୍ ପର୍ଯ୍ୟାୟ ମ୍ୟାଚ୍ ଏବଂ ଦୁଇଟି ପ୍ଲେ ଅଫ୍ ମ୍ୟାଚ୍ ଖେଳାଯିବ । ଯାହା ପ୍ରଶଂସକଙ୍କୁ ବେଶ ମନୋରଞ୍ଜନ କରିବ ବୋଲି ଆଶା କରାଯାଉଛି ।
ଫେବୃଆରୀ 23ରୁ ଆରମ୍ଭ ହେବାକୁ ଥିବା ଏହି ହାଇପ୍ରୋଫାଇଲ୍ ମହିଳା କ୍ରିକେଟ୍ ଟୁର୍ଣ୍ଣାମେଣ୍ଟର ଏଥର ସିଜିନ୍ରେ କେବଳ ସିଙ୍ଗିଲ୍ ହେଡର ରହିବ । ଅର୍ଥାତ, ଦିନକୁ ଗୋଟିଏ ମ୍ୟାଚ୍ ହିଁ ଖେଳାଯିବ । ପ୍ରତି ମ୍ୟାଚ୍ ସନ୍ଧ୍ୟା 7.30ରୁ ଆରମ୍ଭ ହେବ । ଏହି ଟୁର୍ଣ୍ଣାମେଣ୍ଟର ପ୍ରଥମ 11ଟି ମ୍ୟାଚ୍ ବେଙ୍ଗାଲୁରୁରେ ଖେଳାଯିବା ନେଇ ମହିଳା ପ୍ରିମିୟର ଲିଗ୍ର ଅଫିସିଆଲ୍ ୱେବ୍ସାଇଟ୍ରେ ଘୋଷଣା କରାଯାଇଥିବା ବେଳେ ଅବଶିଷ୍ଟ 9ଟି ମ୍ୟାଚ୍ ଏବଂ ଦୁଇଟି ପ୍ଲେ ଅଫ୍ ମ୍ୟାଚ୍ ଦିଲ୍ଲୀରେ ଅନୁଷ୍ଠିତ ହେବ । ଲିଗ୍ ପର୍ଯ୍ୟାୟ ଶେଷ ହେବା ସୁଦ୍ଧା ପଏଣ୍ଟସ୍ ଟେବୁଲର ଶୀର୍ଷରେ ଥିବା ଦଳ ସିଧାସଳଖ ଫାଇନାଲ୍କୁ ପ୍ରବେଶ କରିବ । ଏହାପରେ ଦ୍ବିତୀୟ ଫାଇନାଲିଷ୍ଟ ପାଇଁ ପଏଣ୍ଟସ୍ ଟେବୁଲର 2ୟ ଓ 3ୟ ସ୍ଥାନରେ ଥିବା ଦଳ ମଧ୍ୟରେ ଏଲିମିନେଟର ଖେଳାଯିବ ।