ଭୁବନେଶ୍ବର: ଶେଷ ହୋଇଛି ସାଧାରଣ ନିର୍ବାଚନ । ଫଳାଫଳ ମଧ୍ୟ ଘୋଷଣା ହୋଇଛି । ରାଜ୍ୟରେ ୧୪୭ ବିଧାନସଭା ଆସନରୁ ୭୮ ଆସନ ଜିତି ପ୍ରଥମ ଥର ସଂଖ୍ୟାଗରିଷ୍ଠତା ହାସଲ କରିଛି ଭାରତୀୟ ଜନତା ପାର୍ଟି । ୫୧ ଆସନ ବିଜେଡି ଖାତାକୁ ଯାଇଥିବାବେଳେ ୯ରୁ ୧୪ ଆସନରେ ପହଞ୍ଚିଛି କଂଗ୍ରେସ । ସିପିଆଇ(ଏମ୍) ଗୋଟିଏ ଓ ୩ ସ୍ବାଧୀନ ବିଧାୟକ ବିଧାନସଭାକୁ ନିର୍ବାଚିତ ହୋଇଛନ୍ତି । ଏଭଳି ୧୪୭ ବିଧାୟକଙ୍କ ସତ୍ୟପାଠର ବିଶ୍ଳେଷଣକୁ ନେଇ ପ୍ରକାଶ ପାଇଛି ଏଡିଆର ରିପୋର୍ଟ । ନଜର ପକାନ୍ତୁ ଆମ ରାଜ୍ୟ ବିଧାନସଭାକୁ ଏଥର ନିର୍ବାଚିତ ହୋଇଥିବା ବିଧାୟକଙ୍କ ମଧ୍ୟରେ କେତେଜଣ ବିଧାୟକ କୋଟିପତି ଓ କେତେଜଣ ନିଜ ନାମରେ ଅପରାଧିକ ମାମଲା ରହିଥିବା ସତ୍ୟପାଠରେ ଦର୍ଶାଇଛନ୍ତି..
ଅପରାଧିକ ମାମଲା: ଏଥର ବିଧାନସଭାକୁ ନିର୍ବାଚିତ ହୋଇଥିବା ୧୪୭ ବିଧାୟକଙ୍କ ମଧ୍ୟରୁ ୮୫ ଜଣଙ୍କ ନାମରେ ରହିଛି ଅପରାଧିକ ମାମଲା । ଅର୍ଥାତ ମୋଟ ବିଧାୟକଙ୍କ ମଧ୍ୟରୁ ୫୮ ପ୍ରତିଶତ ସେମାନଙ୍କ ନାମରେ ଅପରାଧିକ ମାମଲା ରହିଥିବା ସତ୍ୟପାଠରେ ଦର୍ଶାଇଛନ୍ତି । ସେହିଭଳି ୬୭(୪୬%) ବିଧାୟକଙ୍କ ନାମରେ ରହିଛି ଗୁରୁତର ଅପରାଧ ମାମଲା । ୨୦୧୯ରେ ୧୪୬ ବିଧାୟକଙ୍କ ରିପୋର୍ଟ ପ୍ରକାଶ ପାଇଥିବାବେଳେ ସେମାନଙ୍କ ମଧ୍ୟରେ ୬୭(୪୬%) ବିଧାୟକଙ୍କ ନାମରେ ଅପରାଧିକ ମାମଲା ରହିଥିଲା । ସେମାନଙ୍କ ମଧ୍ୟରୁ ୪୯(୩୪%) ବିଧାୟକ ସେମାନଙ୍କ ନାଁରେ ଗୁରୁତର ଅପରାଧିକ ମାମଲା ଥିବା ଦର୍ଶାଇଥିଲେ ।
ବିଭିନ୍ନ ଦଳରେ ଅପରାଧିକ ମାମଲା ଥିବା ବିଧାୟକ: ବିଜେପିରୁ ଜିତିଥିବା ୭୮ ବିଧାୟକଙ୍କ ମଧ୍ୟରୁ ୫୫(୭୧%) ବିଧାୟକଙ୍କ ନାଁରେ ଅପରାଧିକ ମାମଲା ରହିଥିବାବେଳେ ୪୬(୫୯%) ବିଧାୟକଙ୍କ ନାଁରେ ରହିଛି ଗୁରୁତର ଅପରାଧିକ ମାମଲା । ସେହିଭଳି ବିଜେଡିରୁ ଜିତିଥିବା ୫୧ ବିଧାୟକଙ୍କ ମଧ୍ୟରୁ ୧୫(୨୯%) ବିଧାୟକଙ୍କ ନାଁରେ ରହିଛି ଅପରାଧିକ ମାମଲା । ସେମାନଙ୍କ ମଧ୍ୟରୁ ୧୨(୨୪%) ବିଧାୟକ ନିଜ ନାମରେ ଗୁରୁତର ଅପରାଧିକ ମାମଲା ଥିବା ନିଜ ସତ୍ୟପାଠରେ ଦର୍ଶାଇଛନ୍ତି । କଂଗ୍ରେସର ୧୪ ବିଧାୟକଙ୍କ ମଧ୍ୟରୁ ୧୧ ଜଣଙ୍କ ନାଁରେ ଅପରାଧିକ ମାମଲା ରହିଥିବାବେଳେ ୫(୩୬%) ବିଧାୟକଙ୍କ ନାଁରେ ରହିଛି ଗୁରୁତର ଅପରାଧିକ ମାମଲା । ସିପିଆଇ(ଏମ୍)ରୁ ଜିତିଥିବା ଜଣେ ବିଧାୟକ ଓ ସମସ୍ତ ୩ ସ୍ବାଧୀନ ବିଧାୟକ ନିଜ ନିଜ ନାଁରେ ଗୁରୁତର ଅପରାଧିକ ମାମଲା ରହିଥିବା ସତ୍ୟପାଠରେ ପ୍ରକାଶ କରିଛନ୍ତି ।
କୋଟିପତି ବିଧାୟକ: ଏଥର ବିଧାନସଭାକୁ ନିର୍ବାଚିତ ହୋଇଥିବା ୧୪୭ ବିଧାୟକଙ୍କ ମଧ୍ୟରୁ ୭୩ ପ୍ରତିଶତ, ଅର୍ଥାତ ୧୦୭ ଜଣ ବିଧାୟକ ହେଉଛନ୍ତି କୋଟିପତି । ସେମାନେ ନିର୍ବାଚନ ପୂର୍ବରୁ ଦାଖଲ କରିଥିବା ପ୍ରାର୍ଥୀପତ୍ରରେ ନିଜ ସତ୍ୟପାଠରେ ଦର୍ଶାଇଥିବା ସମ୍ପତ୍ତି ତାଲିକା ଏହି ଏଡିଆର୍ ରିପୋର୍ଟରେ ପ୍ରକାଶ ପାଇଛି । ୨୦୧୯ ନିର୍ବାଚନରେ ୧୪୬ ଜଣ ବିଧାୟକଙ୍କ ରିପୋର୍ଟ ପ୍ରକାଶ ପାଇଥିବାବେଳେ ସେମାନଙ୍କ ମଧ୍ୟରୁ ୯୫(୬୫%) ବିଧାୟକ କୋଟିପତି ରହିଥିଲେ ।
ବିଭିନ୍ନ ଦଳରେ ଥିବା କୋଟିପତି ବିଧାୟକ: ବିଜେପିରୁ ବିଜୟୀ ୭୮ ବିଧାୟକଙ୍କ ମଧ୍ୟରୁ ୬୭ ପ୍ରତିଶତ, ଅର୍ଥାତ ୫୨ ଜଣ ବିଧାୟକ ଦାଖଲ କରିଥିବା ସତ୍ୟପାଠରେ ନିଜ ସମ୍ପତ୍ତି ୧ କୋଟି ବା ତା'ଠାରୁ ଅଧିକା ବୋଲି ଦର୍ଶାଇଛନ୍ତି । ସେହିଭଳି ବିଜେଡିର ସମୁଦାୟ ୫୧ରୁ ୪୩(୮୪%) ବିଧାୟକଙ୍କ ସମ୍ପତ୍ତି କୋଟିଏରୁ ଅଧିକା । କଂଗ୍ରେସର ୯(୬୪%) ବିଧାୟକ କୋଟିପତି ହୋଇଥିବାବେଳେ ଜଣେ ସିପିଆଇଏମ୍ ଓ ୨ ଜଣ ସ୍ବାଧୀନ ବିଧାୟକ ନିଜକୁ କୋଟିପତି ବୋଲି ସତ୍ୟାପାଠରେ ଦର୍ଶାଇଛନ୍ତି ।
ବିଧାୟକ ପ୍ରତି ହାରାହାରି ସମ୍ପତ୍ତି: ଏଥର ଓଡ଼ିଶା ବିଧାନସଭା ନିର୍ବାଚନରେ ଅନେକ କୋଟିପତି ବିଧାୟକ ନିର୍ବାଚିତ ହୋଇଛନ୍ତି । ତେଣୁ ୧୪୭ ବିଧାୟକଙ୍କ ମଧ୍ୟରେ ବିଧାୟକ ପ୍ରତି ହାରାହାରି ସମ୍ପତ୍ତିର ମୂଲ୍ୟ ହେଉଛି ୭.୩୭ କୋଟି । ୨୦୧୯ରେ ଏହି ମୂଲ୍ୟ ୪.୪୧ କୋଟି ରହିଥିଲା । ଅର୍ଥାତ ୨୦୧୯ ଅପେକ୍ଷା ଚଳିତ ଥର କୋଟିପତି ବିଧାୟକଙ୍କ ସଂଖ୍ୟା ବଢ଼ିଛି ।