ରାଞ୍ଚି: ଜମି ଘୋଟାଲା ମାମଲାରେ ଗତକାଲି ରାତିରେ ଗିରଫ ହୋଇଥିବା ଝାଡଖଣ୍ଡ ପୂର୍ବତନ ମୁଖ୍ୟମନ୍ତ୍ରୀ ତଥା ଜେଏମଏମ କାର୍ଯ୍ୟକାରୀ ସଭାପତି ହେମନ୍ତ ସୋରେନଙ୍କୁ ଆଜି କୋର୍ଟରେ ହାଜର କରାଯାଇଛି । ଆଜି ଅପରାହ୍ନ ପ୍ରାୟ 2 ଟାରେ ରାଞ୍ଚି ସ୍ଥିତ ପିଏମଏଲଏ କୋର୍ଟରେ ତାଙ୍କୁ ହାଜର କରାଏଯାଇଛି । ଇଡି ଲମ୍ବା ଅବଧି ରିମାଣ୍ଡ ଆବେଦନ କରିବା ନେଇ ଅନୁମାନ କରାଯାଉଛି । ଏହାରି ମଧ୍ୟରେ ଗତକାଲି ସଂଧ୍ୟାରେ ଜେଏମଏମ ନେତୃତ୍ବାଧୀନ ମହାମେଣ୍ଟର ବିଧାୟକ ଦଳ ନେତା ନିର୍ବାଚିତ ହୋଇଥିବା ଚମ୍ପାଇ ସୋରେନ ରାଜ୍ଯପାଳଙ୍କୁ ଆଜି ଅପରାହ୍ନ 3 ଟାରେ ଭେଟିବା ପାଇଁ ସମୟ ମାଗି ଏକ ଚିଠି ଲେଖିଥିଲେ । ହେଲେ ତାଙ୍କୁ ସାଢେ 5ଟାରେ ସାକ୍ଷାତ କରିବା ପାଇଁ ରାଜ୍ୟପାଳ ସମୟ ଦେଇଛନ୍ତି ।
ଏହାରି ମଧ୍ୟରେ ଅପରାହ୍ନରେ ଜଏମଏମ ନେତୃତ୍ବାଧୀନ ମହାମେଣ୍ଟର ସମସ୍ତ ବିଧାୟକଙ୍କୁ ଚାଟାର୍ଡ ଫ୍ଲାଇଟରେ ହାଇଦ୍ରାବାଦ ନେବା ପାଇଁ ଯୋଜନା ଥିବା କୁହାଯାଇଥିଲା । ହେଲେ ରାଜ୍ୟପାଳ ସଂଧ୍ୟାରେ ଭେଟିବା ପାଇଁ ସମ ଦେବା ପରେ ଏହି ଯୋଜନାରେ ପରିବର୍ତ୍ତନ କରାଯାଇପାରେ । ହେଲେ ସରକାର ଗଠନ ହେବାର ସମୟ ବିଳମ୍ବ ସାଙ୍ଗରେ ଘୋଡା ବେପାର ଭୟ ମଧ୍ୟ ବଢିଛି ।
ତେବେ ଗତକାଲିଠାରୁ ବିଧାୟକ ଦଳର ନୂଆ ନେତା ଚୟନ ଶେଷ କରିସାରିଛି ଜେଏମଏମ । ଏହା ସହ ସଂଧ୍ଯାରେ ହେମନ୍ତ ସୋରେନ ରାଜ୍ୟପାଳଙ୍କୁ ଭେଟି ଇସ୍ତଫା ଦେବା ପରେ, ଚମ୍ପାଇ ସୋରେନ ଦଳୀୟ ବିଧାୟକଙ୍କ ସହ ରାଜଭବନ ଗସ୍ତ କରିଥିଲେ । ବିଧାୟକଙ୍କ ସମର୍ଥନପତ୍ର ସହ ସରକାର ଗଠନ କରିବାକୁ ଦାବି କରିବାକୁ ସମୟ ମାଗିଥିବା ବେଳେ ରାଜ୍ୟପାଳ ସମୟ ଦେଇନଥିଲେ । ତେଣୁ ବିଳମ୍ବ ହେଉଥିବା କାରଣରୁ ଜେଏମଏମ ଓ କଂଗ୍ରେସ ବିଧାୟକମାନଙ୍କୁ କଂଗ୍ରେସ ଶାସିତ ତେଲେଙ୍ଗାନା ରାଜଧାନୀ ହାଇଦ୍ରାବାଦକୁ ସ୍ଥାନାନ୍ତରିତ କରାଯାଇପାରେ । ଏହାରି ମଧ୍ୟରେ ରାଜ୍ୟପାଳ ପୁଣି ସମୟ ଦେବାକୁ ରାଜି ହୋଇଥିବା ସୂଚନା ମିଳିଛି ।