ଭୁବନେଶ୍ବର: ନିର୍ବାଚନରେ ସାମାଜିକ ଗଣମାଧ୍ୟମ ବା ସୋସିଆଲ ମିଡିଆର ଭୂମିକା ଅତ୍ୟନ୍ତ ଗୁରୁତ୍ବପୂର୍ଣ୍ଣ ପ୍ରମାଣିତ ହୋଇଛି । ସୋସିଆଲ ମିଡିଆ ମାଧ୍ୟମରେ ଅଧିକରୁ ଅଧିକ ଭୋଟରମାନଙ୍କ ପାଖରେ ପହଞ୍ଚିବା ସମ୍ଭବ ହୋଇପାରୁଛି । ତେଣୁ 2024 ସାଧାରଣ ନିର୍ବାଚନ ପୂର୍ବରୁ କଂଗ୍ରେସ ଫୋକସ୍ରେ ମିଡିଆ ଏବଂ ସୋସିଆଲ ମିଡିଆ । ଏହାର ସମ୍ପୂର୍ଣ୍ଣ ଫାଇଦା ଉଠାଇବା ପାଇଁ ରୋଡ୍ ମ୍ୟାପ୍ ପ୍ରସ୍ତୁତ କରୁଛି ଓଡିଶା ପ୍ରଦେଶ କଂଗ୍ରେସ ।
କଂଗ୍ରେସ ଫୋକସରେ ମିଡିଆ ଓ ସୋସିଆଲ ମିଡିଆ । ନିର୍ବାଚନ ପୂର୍ବରୁ ସୋସିଆଲ ମିଡିଆକୁ ଅସ୍ତ୍ର କରି ଜନତାଙ୍କ ପାଖକୁ ଯିବାକୁ ଚେଷ୍ଟା କରୁଛି କଂଗ୍ରେସ ଦଳ । ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ବିଫଳତାକୁ ସୋସିଆଲ ମିଡିଆ ମାଧ୍ୟମରେ କିପରି ନେଇ ଜନସାଧାରଣଙ୍କ ପାଖରେ ପହଞ୍ଚାଇବ, ସେନେଇ ଆଜି ବସିଛି କଂଗ୍ରେସ ସୋସିଆଲ ମିଡିଆ ସେଲ୍ର ଗୁରୁତ୍ବପୂର୍ଣ୍ଣ ବୈଠକ । ଏଥିପାଇଁ ଭୁବନେଶ୍ବରର ଏକ ଘରୋଇ ହୋଟେଲରେ ଦଳର ମୁଖପାତ୍ର ଓ ବରିଷ୍ଠ ନେତାଙ୍କୁ ନେଇ ସୋମବାର ବସିଥିଲା 'ସଂକଳ୍ପ' କର୍ମଶାଳା । ପିସିସି ସଭାପତି ଶରତ ପଟ୍ଟନାୟକଙ୍କ ସହ ଜାତୀୟ ମୁଖପାତ୍ର ଅଭୟ ଦୁବେ ଓ ପ୍ରଭାରୀ ଅଜୟ କୁମାର ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ ।
ଏହି କାର୍ଯ୍ୟକ୍ରମରେ କଂଗ୍ରେସ ମିଡିଆ ସେଲ ଅଧ୍ୟକ୍ଷ ବିଶ୍ବରଞ୍ଜନ ମହାନ୍ତି କହିଛନ୍ତି, "ସୋସିଆଲ ମିଡିଆକୁ ଅସ୍ତ୍ର କରି ସରକାରଙ୍କ ବିଫଳତା ଓ କଂଗ୍ରେସର ସଫଳତା ଏବଂ ବିଭିନ୍ନ ମୁଦ୍ଦାକୁ କିପରି ଲୋକଙ୍କ ପାଖରେ କଂଗ୍ରେସ ପହଞ୍ଚାଇବ, ସେନେଇ ରୋଡ୍ମ୍ୟାପ୍ ପ୍ରସ୍ତୁତ ହୋଇଛି । ଏହାସହ ଫେକ୍ ନ୍ୟୁଜକୁ କିଭଳି କାଉଣ୍ଟର କରାଯିବ ସେନେଇ ମଧ୍ୟ ଆଲୋଚନା କରାଯାଇଛି ।" ସେହିଭଳି ପିସିସି ସଭାପତି ଶରତ ପଟ୍ଟନାୟକ କହିଛନ୍ତି, "24 ବର୍ଷର ବିଜେଡି ସରକାର ଏଠାରେ ସାମ୍ବାଦିକ, ଗଣମାଧ୍ୟମ ଉପରେ ଯେଉଁ ଦମନଲୀଳା ଚଳାଇଛନ୍ତି ଏହାର ବିରୋଧ କରିବ କଂଗ୍ରେସ । ଗଣମାଧ୍ୟମର କଣ୍ଠରୋଧ ବିରୋଧୀ ଆଭିମୁଖ୍ୟକୁ ପଣ୍ଡ କରିବାକୁ ଆଲୋଚନା ହୋଇଛି । ଦୁର୍ନୀତିରେ ବୁଡି ରହିଥିବା ବିଜେଡି ସରକାରର କଳାକାରନାମାକୁ ପଦାକୁ ଆଣିଲେ ସାମ୍ବାଦିକମାନଙ୍କ ବିରୋଧରେ ମିଛ କେସ କରାଯାଉଛି । ଏହାର ବିରୋଧରେ ଆମେ ଲଢେଇ କରିବୁ । ବିଜେଡି ସରକାର ଯେଉଁଭଳି ବ୍ୟାପକ ଭାବେ ଦୁର୍ନୀତିରେ ବୁଡି ରହିଛି, ସେମାନଙ୍କ ବିଷୟରେ ଜନସାଧାରଣଙ୍କୁ ଅବଗତ କରାଇବାକୁ ଆଜି କଂଗ୍ରେସ ରଣନୀତି ପ୍ରସ୍ତୁତ କରୁଛି । କେନ୍ଦ୍ରରେ ମୋଦି ସରକାର ଆଜି ପର୍ଯ୍ୟନ୍ତ ଯେଉଁ ମିଛ କହିଚାଲିଛନ୍ତି, ତାର ବାସ୍ତବତା ଲୋକଙ୍କ ପାଖରେ ପହଞ୍ଚାଇବୁ ।"