ଭୁବନେଶ୍ବର:ପ୍ରଧାନମନ୍ତ୍ରୀ ମୋଦିଙ୍କର ଚା' ପେ ଚର୍ଚ୍ଚା ପରେ ଏବେ ଟିଫିନ୍ ମିଟିଂ ଉପରେ ଗୁରୁତ୍ଵ । ସଂଗଠନ ମଜବୁତ ପାଇଁ ବିଜେପି କରିଛି ବଡ଼ ପ୍ଲାନ। ଏଣିକି ଗ୍ରାଉଣ୍ଡରେ ନେତା କରିବେ ଟିଫିନ ମିଟିଂ। ଓଡ଼ିଶାରେ କ୍ଷମତାକୁ ଆସିବା ପରେ ଏପରି ନିଷ୍ପତ୍ତି ନିଆଯାଇଛି । କାରଣ ଆଗକୁ ଅଛି ପଞ୍ଚାୟତ ଏବଂ ପୌରନିର୍ବାଚନ।
Tiffin Meeting (ETV Bharat Odisha) ସାଂସଦଙ୍କୁ ମୋଦିଙ୍କ ଟିପ୍ପ:
ଦୁଇ ଦିନ ତଳେ ବିଜେପିର ସବୁ ସାଂସଦ ମାନେ ପ୍ରଧାନମନ୍ତ୍ରୀଙ୍କୁ ଭେଟିଥିଲେ । ସାଂସଦଙ୍କୁ ପ୍ରଧାନମନ୍ତଦ୍ରୀ ନରେନ୍ଦ୍ର ମୋଦି ଟିପ୍ପ ଦେଇଛନ୍ତି ଯେ, ଲୋକଙ୍କ ନିକଟକୁ ଯାଅ ଓ ଲୋକଙ୍କ କଥା ବୁଝ। ଏହା ସହିତ ବିଧାୟକ ଓ ମନ୍ତ୍ରୀମାନଙ୍କୁ ମଧ୍ୟ ଗ୍ରାଉଣ୍ଡରେ ଲୋକମାନଙ୍କୁ ଭେଟିବାକୁ ନିର୍ଦ୍ଦେଶ ମିଳିଛି । କ'ଣ ରହିଛି ସମସ୍ୟା ସମାଧାନ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି।
ଲୋକଙ୍କ ପାଇଁ କାମ କରିବାକୁ ନିର୍ଦ୍ଦେଶ:
ବରଗଡ଼ ସାଂସଦ ପ୍ରଦୀପ ପୁରୋହିତ କହିଛନ୍ତି, "ଓଡ଼ିଶାର 21 ବିଜେପି ସାଂସଦଙ୍କୁ ଗୁରୁମନ୍ତ୍ର ଦେଇଛନ୍ତି ପ୍ରଧାନମନ୍ତ୍ରୀ ମୋଦି । ଏହି ସାକ୍ଷାତରେ ପ୍ରଧାନମନ୍ତ୍ରୀ ଲୋକଙ୍କ ପାଇଁ କାମ କରିବାକୁ କହିଛନ୍ତି । ସିଧାସଳଖ ଲୋକଙ୍କ ନିକଟକୁ ଯିବାକୁ ପରାମର୍ଶ ଦେଇଥିଲେ ମୋଦି । ଖାଲି ସେତିକି ନୁହେଁ, ଗାଁ ଗାଁରେ ପହଞ୍ଚି ଲୋକଙ୍କୁ କେନ୍ଦ୍ର ସରକାରଙ୍କ ଲୋକାଭିମୁଖୀ ଯୋଜନା ସମ୍ପର୍କରେ ବୁଝାଇ ତା'ର କାର୍ଯ୍ୟକାରିତା ଉପରେ ଗୁରୁତ୍ୱ ଦେବାକୁ ସାଂସଦ ମାନଙ୍କୁ ମୋଦି କହିଛନ୍ତି । ସେହିପରି ଟିଫିନ ମିଟିଂ ଉପରେ ଗୁରୁତ୍ୱ ଦେଇଛନ୍ତି ମୋଦି । ଗାଁ ଗାଁରେ ତୃଣମୂଳ ସ୍ତରରେ କାର୍ଯ୍ୟ କରୁଥିବା କର୍ମୀଙ୍କ ପାଖକୁ ଯାଇ ଟିଫିନ ମିଟିଂ ପାଇଁ ମୋଦି କହିଛନ୍ତି । ଏହାସହିତ ଲୋକାଭିମୁଖୀ ବଜେଟ ସମ୍ପର୍କରେ ମଧ୍ୟ ଲୋକଙ୍କୁ ବୁଝାଇବାକୁ ମୋଦି ଦେଇଛନ୍ତି ମନ୍ତ୍ର ।"
ସଂଗଠନ ମଜବୁତ ଲକ୍ଷ୍ୟ:
"ସେପଟେ ରାଜ୍ୟରେ ମଧ୍ୟ ବିଜେପି ପ୍ରଥମ କରି ଏକାକୀ ସରକାର କରିଛି । ତେଣୁ ଏହାକୁ ନେଇ ଆଗକୁ କିପରି ବିଜେପି ନିଜର ସଂଗଠନ ଆହୁରି ମଜବୁତ କରିପାରିବ ତା ଉପରେ ଫୋକସ କରିଛି ଦଳ । ଏନେଇ ମନ୍ତ୍ରୀମାନଙ୍କୁ ଜିଲ୍ଲା ଭ୍ରମଣ ପାଇଁ କୁହାଯିବା ସହିତ ଲୋକଙ୍କ ସମସ୍ୟା ବୁଝିବାକୁ କୁହାଯାଇଛି । ପ୍ରତ୍ୟେକ ମନ୍ତ୍ରୀ ପାଖାପାଖି 3ଟି ଜିଲ୍ଲା ବୁଲି ଲୋକଙ୍କ ନିକଟକୁ ଯିବେ, ଯାହା ଆରମ୍ଭ ମଧ୍ୟ ହୋଇଛି । ଟିଫିନ ମିଟିଂ ନେଇ ଦଳରୁ ନିଷ୍ପତ୍ତି ଆସିଲେ କରାଯିବ" ବୋଲି କହିଛନ୍ତି ଉପମୁକ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ ।
ଟିଫିନ ମିଂଟିଂର ଉଦ୍ଦେଶ୍ୟ:
ସେହିଭଳି ବିଜେପି ରାଜ୍ୟ ସହ ପ୍ରଭାରୀ ଲତା ଉସେଣ୍ଡି କହିଛନ୍ତି, "ସଂଗଠନକୁ ମଜବୁତ କରିବା ପାଇଁ ପ୍ରଧାନମନ୍ତ୍ରୀ ବିଭିନ୍ନ କାର୍ଯ୍ୟକ୍ରମ ହାତକୁ ନେଇଛନ୍ତି । ଲୋକମାନଙ୍କ ସହିତ ତୃଣମୂଳ ସ୍ତରରୁ କେମିତି ଯୋଡ଼ିବେ ପ୍ରଧାନମନ୍ତ୍ରୀ ଆହ୍ଵାନ ଦେଇଛନ୍ତି। ଟିଫିନ ମିଟିଂର ମୂଳ ଲକ୍ଷ୍ୟ ହେଉଛି ବୁଥ ସ୍ତରୀୟ, ପଞ୍ଚାୟତ ସ୍ତରରୁ ନିଜ ଟିଫିନ ନେଇ ଲୋକମାନଙ୍କ ସହିତ ବୈଠକରେ ଆଲୋଚନା କରିବା।"
ଇଟିଭି ଭାରତ, ଭୁବନେଶ୍ବର
