ହାଇଦ୍ରାବାଦ: ଇସ୍ରାଏଲ- ପାଲେଷ୍ଟାଇନ ଯୁଦ୍ଧ ପରେ ଏବେ ମଧ୍ୟ-ପ୍ରାଚ୍ୟରେ ଆଉ ଏକ ବଡ ଯୁଦ୍ଧ ସଙ୍କଟ । ଲେବନନରୁ ଇରାନର ସମର୍ଥିତ ଆତଙ୍କୀ ଗୋଷ୍ଠୀ ‘ହିଜବୁଲ୍ଲା’ ବିରୋଧରେ ଗତ ସପ୍ତାହେ ଧରି ପ୍ରଚଣ୍ଡ ଆକ୍ରମଣ ଜାରି ରଖିଥିବା ଇସ୍ରାଏଲ ଏବେ ସୀମାପାର ଗ୍ରାଉଣ୍ଡ ଅପରେସନ ଆରମ୍ଭ କରିବାକୁ ଯାଉଛି । ଇସ୍ରାଏଲ ଏୟାରଫୋର୍ସର ଏୟାରଷ୍ଟ୍ରାଇକ ଓ ଡ୍ରୋନ ଆକ୍ରମଣରେ ଲେବନନ ଛାରଖାର ହୋଇସାରିଲାଣି । ‘ହିଜବୁଲ୍ଲା’ର ପ୍ରାୟ ଦୁଇ ହଜାରରୁ ଅଧିକ ଠିକଣାକୁ ଟାର୍ଗେଟ କରାଯାଇଛି । ଏଥିରେ ସଂଗଠନର ଅନେକ କମାଣ୍ଡରଙ୍କ ସମେତ ପ୍ରାୟ 6ଶହ ଲୋକଙ୍କର ମୃତ୍ୟୁ ହୋଇଛି । ହଜାର ହଜାର ସଂଖ୍ୟାରେ ଲୋକ ଆହତ ହୋଇଛନ୍ତି । ଏବେ ମଧ୍ୟ ଉଭୟ ପାର୍ଶ୍ବରୁ ଆକ୍ରମଣ ଓ ପ୍ରତିଆକ୍ରମଣ ଜାରି ରହିଛି ।
- ଚିନ୍ତା ବଢାଇଲା ବାଇଡେନଙ୍କ ମନ୍ତବ୍ୟ :-
ମଧ୍ୟ-ପ୍ରାଚ୍ୟରେ ଅଖଣ୍ଡ ପ୍ରଭାବ ରଖୁଥିବା ଓ ସାମରିକ ସ୍ଥିତିକୁ ନିୟନ୍ତ୍ରଣ କରୁଥିବା ଆମେରିକାର ରାଷ୍ଟ୍ରପତି ଜୋ.ବାଇଡେନ ଏହି ପ୍ରସଙ୍ଗରେ ଏକ ବଡ ମନ୍ତବ୍ୟ ଦେଇଛନ୍ତି । ଏକ ଗଣମାଧ୍ୟମ ପ୍ରତିକ୍ରିୟାରେ ସେ କହିଛନ୍ତି, ମଧ୍ୟ-ପ୍ରାଚ୍ୟରେ ଏକ ବଡ ତଥା ପୂର୍ଣ୍ଣ ଯୁଦ୍ଧର ଆଶଙ୍କାକୁ ଏଡାଇ ଦିଆଯାଇନପାରେ । ହେଲେ ରକ୍ତପାତ ରୋକିବାର କୌଣସି ରାସ୍ତା ବାହାରିବା ଉଚିତ ।
ବଡ ଯୁଦ୍ଧ ସଙ୍କେତ ଦେଲେ ବାଇଡେନ (ETV Bharat Odisha) ଏପରି ସ୍ଥଳେ ଇସ୍ରାଏଲ ମଧ୍ୟ ‘ହିଜବୁଲ୍ଲା’ ବିରୋଧରେ ବ୍ୟାପକ କାର୍ଯ୍ୟାନୁଷ୍ଠାନ ଜାରି ରଖିଛି । ‘ହିଜବୁଲ୍ଲା’ ଏକ ଆତଙ୍କୀ ସଂଗଠନ ହୋଇଥିବା କାରଣରୁ ଏହା ସହ ଆଲୋଚନାର କୌଣସି କାରଣ ନଥିବା ଟେଲ-ଆଭିବ କହିଛି । ଫଳରେ ହିଜବୁଲ୍ଲାକୁ ସମୂଳେ ସମାପ୍ତ କରିବା ପାଇଁ ଇସ୍ରାଏଲ ସେନା ଏବେ ଗ୍ରାଉଣ୍ଡ ଅପରେସନ ଆରମ୍ଭ କରିବାକୁ ପ୍ରସ୍ତୁତ ହୋଇଛି । ଇସ୍ରାଏଲ ସେନା ଏବେ ସୀମା ପାର କରି ଲେବନନରେ ପ୍ରବେଶ କରିବା ସହ ଇନପୁଟ ସୂଚନା ଆଧାରରେ ‘ହିଜବୁଲ୍ଲା’ ଆତଙ୍କୀଙ୍କୁ ଖୋଜି ଖୋଜି ମାରିବ ।
ପ୍ରଚଣ୍ଡ ଆକ୍ରମଣ ପରେ ଏବେ ଲେବନନରେ ଗ୍ରାଉଣ୍ଡ ଅପରେସନ ଆରମ୍ଭ କରିବ ଇସ୍ରାଏଲ, (ETV Bharat Odisha) - ପେଜର ଓ ଓ୍ବାକି-ଟକି ବିସ୍ଫୋରଣ ସମଗ୍ର ବିଶ୍ବକୁ ସ୍ତବ୍ଦ କରିଦେଇଥିଲା :-
ଚଳିତମାସ 17 ଓ 18 ତାରିଖରେ ଇସ୍ରାଏଲ ଗୁଇନ୍ଦା ସଂସ୍ଥା ଲେବନନର ଏକାଧିକ ଠିକଣାରେ ଅଭିନବ ବିସ୍ପୋଣ ଘଟାଇଥିଲା । ‘ହିଜବୁଲ୍ଲା’ ସଂଗଠନ ବ୍ୟବହାର କରୁଥିବା କମ୍ୟୁନିକେସନ ଡିଭାଇସ ‘ପେଜର’ ଓ ଓ୍ବାକିଟକିରେ ବିସ୍ପୋରକ ଚିର ଲଗାଇ ବିସ୍ଫୋରଣ ଘଟାଇବାରେ ସଫଳ ହୋଇଥିଲା ଇସ୍ରାଏଲ । ଏଥିରେ ହିଜବୁଲ୍ଲାର ପ୍ରାୟ 35ରୁ ଅଧିକ ଆତଙ୍କୀ ପ୍ରାଣ ହରାଇଥିଲେ । ଆହତଙ୍କ ସଂଖ୍ୟା 3 ହଜାର ଛୁଇଁଥିଲା । ଏହାକୁ ନେଇ ଉତ୍ତେଜିତ ହୋଇଥିଲା ‘ହିଜବୁଲ୍ଲା’ । ପ୍ରତିଶୋଧମୂଳକ ଭାବେ ଇସ୍ରାଏଲର ଏକାଧିକ ଠିକଣାରେ ଘନ ଘନ ରକେଟ ମାଡ କରିଥିଲା । ଇସ୍ରାଏଲ ମଧ୍ୟ ଏହାର ଜବାବରେ, ‘ହିଜବୁଲ୍ଲା’ର ପ୍ରାୟ ହଜାରରୁ ଅଧିକ ଠିକଣାରେ ପ୍ରଚଣ୍ଡ ଏୟାର ଓ ଡ୍ରୋନ ଷ୍ଟ୍ରାଇକ କରିଥିଲା ।
ସୀମା ଡେଇଁବ ଇସ୍ରାଏଲ (ETV Bharat Odisha) - ଇସ୍ରାଏଲୀ ଗୁଇନ୍ଦା ସଂସ୍ଥା ମୁଖ୍ୟାଳୟକୁ ରେକଟ ମାଡ :
‘ହିଜବୁଲ୍ଲା’ ବିରୋଧରେ ପୁରା ଅପରେସନର ପ୍ରଚ୍ଛଦ ନେତୃତ୍ବ ନେଉଥିବା ଇସ୍ରାଏଲୀ ଗୁଇନ୍ଦା ସଂସ୍ଥା ‘ମୋସାଦ’ର ମୁଖ୍ୟାଳୟକୁ ଟାର୍ଗେଟ କରି ଗତକାଲି ହିଜବୁଲ୍ଲା ଏକ କ୍ଷେପଣାସ୍ତ୍ର ମାଡ କରିଥିଲା । ମାତ୍ର ଏହାକୁ ପଣ୍ଡ କରିବାରେ ଇସ୍ରାଏଲ ସଫଳ ହୋଇଥିଲା । ଇସ୍ରାଏଲର ବାୟୁ ପ୍ରତିରକ୍ଷା ପ୍ରଣାଳୀ ‘ଆଇରନ ଡୋମ’ ଏହି କ୍ଷେପଣାସ୍ତ୍ରକୁ ମଝି ଆକାଶରେ ଇଣ୍ଟରସେଫ୍ଟ କରିଥିବା ଇସ୍ରାଏଲ ଦାବି କରିଛି । ଅନ୍ୟପଟେ ଇସ୍ରାଏଲ ବିରୋଧରେ ଯୁଦ୍ଧ ଜାରି ରହିବ ବୋଲି ହିଜବୁଲ୍ଲା କହିଛି ।
‘ହିଜବୁଲ୍ଲା’ ବିରୋଧରେ ଗ୍ରାଉଣ୍ଡ ଅପରେସନ (ETV Bharat Odisha) - ଇସ୍ରାଏଲ-ହିଜବୁଲ୍ଲା ଶତ୍ରୁତା:-
ହିଜବୁଲ୍ଲା ହେଉଛି ଇରାନ ସମର୍ଥିତ ଲେବନନର ଏକ ଇସଲାମିକ ଆତଙ୍କୀ ସଂଗଠନ । ପାଲେଷ୍ଟାଇନ ଅଧିକୃତ ଗାଜାରୁ ସଞ୍ଚାଳିତ ହେଉଥିବା ଆତଙ୍କୀ ସଂଗଠନ ‘ହମାସ’ ବିରୋଧରେ ଇସ୍ରାଏଲ ଯୁଦ୍ଧ ଘୋଷଣା କରିବା ପରଠାରୁ ‘ହିଜବୁଲ୍ଲା’ ମଧ୍ୟ ଇସ୍ରାଏଲ ବିରୋଧରେ ଅପରେସନ ଜାରି ରଖିଛି । ଗାଜାରେ ପ୍ରବଳ ଆକ୍ରମଣରେ ‘ହମାସ’ ଏବେ ପ୍ରାୟ ନିଶ୍ଚିହ୍ନ ହୋଇସାରିଛି । ଇରାନ ସମର୍ଥନରେ ହିଜବୁଲ୍ଲା ଉତ୍ତର- ଇସ୍ରାଏଲ ଅଞ୍ଚଳରେ ପ୍ରବଳ ରକେଟ ମାଡ କରିଥିଲା । ଇସ୍ରାଏଲୀ ନାଗରିକମାନେ ଉତ୍ତର-ଇସ୍ରାଏଲରୁ ପଳାୟନ କରିବାକୁ ବାଧ୍ୟ ହୋଇଥିଲା । ପରେ ଇସ୍ରାଏଳ ସେନା ହିଜବୁଲ୍ଲା ବିରୋଦୀ ଲଢେଇକୁ ବ୍ୟାପକ କରିଥିଲା । ଏବେ ଇସ୍ରାଏଲର ଆକ୍ରମଣରେ ଲେବନନର ରାଜଧାନୀ ବେରୁଟ ସମେତ ଏକାଧିକ ପ୍ରମୁଖ ସହର ଧ୍ବଂସସ୍ତୂପରେ ପରିଣତ ହୋଇସାରିଲାଣି । ଏବେ ଏହି ଅପରେସନ ଗ୍ରାଉଣ୍ଡ ମିଶନରେ ପରିବର୍ତ୍ତନ ହେବାକୁ ଯାଉଛି । ଫଳରେ ବାଇଡେନଙ୍କ ଚେତାବନୀ ଅନୁସାରେ, ମଧ୍ୟପ୍ରାଚ୍ୟରେ ବଡ ଯୁଦ୍ଧ ସଂଗଠିତ ହୋଇପାରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
