ଜାକର୍ତ୍ତା: ପୁଣି ଥରିଲା ଇଣ୍ଡୋନେସିଆ । ଶନିବାର ଦିନ ଇଣ୍ଡୋନେସିଆର ଜାଭା ଦ୍ୱୀପରେ ଶକ୍ତିଶାଳୀ ଭୂକମ୍ପ ଝଟକା ଅନୁଭୂତ ହୋଇଛି । ରିକ୍ଟର ସ୍କେଲରେ ଏହାର ତୀବ୍ରତା ୬.୧ ରେକର୍ଡ କରାଯାଇଛି । ତେବେ ଏହି ଭୂକମ୍ପଜନିତ ଆହତ କିମ୍ବା କ୍ଷୟକ୍ଷତି ସମ୍ବନ୍ଧରେ ଏବେ ସୁଦ୍ଧା କୌଣସି ସୂଚନା ମିଳିପାରିନାହିଁ । ଅନ୍ୟପଟେ ସୁନାମୀ ନେଇ ମଧ୍ୟ ଆଲର୍ଟ ଜାରି କରାଯାଇନାହିଁ । ଭୂକମ୍ପ ସମୟରେ ସ୍ଥାନୀୟ ଲୋକମାନେ ଭୟଭୀତ ହୋଇ ସୁରକ୍ଷିତ ସ୍ଥାନକୁ ଚାଲି ଯାଇଥିଲେ ।
ୟୁଏସ ଜିଓଲୋଜିକାଲ ସର୍ଭେ ଦ୍ୱାରା ଦିଆଯାଇଥିବା ସୂଚନା ଅନୁଯାୟୀ, ଏହି ଭୂମିକମ୍ପର କେନ୍ଦ୍ରସ୍ଥଳୀ ଇଣ୍ଡୋନେସିଆର ବଞ୍ଜାର ସହରର ଦକ୍ଷିଣରୁ ୧୦୨ କିଲୋମିଟର (୬୩ ମାଇଲ୍ସ) ଦୂର ଏହଂ ଏହାର ଗଭୀରତା ୬୬.୩ କିଲୋମିଟର (୪୨.୪ ମାଇଲ୍ସ) । ଅନ୍ୟପଟେ ଭୂକମ୍ପ ଯୋଗୁଁ ଏବେସୁଦ୍ଧା ସୁନାମି ଆଲର୍ଟ ଜାରି କରାଯାଇନାହିଁ । ଇଣ୍ଡୋନେସିଆ ପାଣିପାଗ ସଂସ୍ଥା ପକ୍ଷରୁ ଜାରି ସୂଚନା ଅନୁଯାୟୀ, ରାଜଧାନୀ ଜାକର୍ତ୍ତାରେ ପାଖାପାଖି ୧ ମିନିଟ ପର୍ଯ୍ୟନ୍ତ ଏହି ଭୂମିକମ୍ପ ଅନୁଭୂତ ହୋଇଥିଲା । ପଶ୍ଚିମ ଜାଭା ପ୍ରାଦେଶିକ ରାଜଧାନୀ ବାନ୍ଦୁଙ୍ଗ, ଡିପୋକ, ତାଙ୍ଗେରାଙ୍ଗ, ବୋଗୋର ଓ ବେକାଶିରେ ମଧ୍ୟ ଏହା ଅନୁଭୂତ ହୋଇଛି । ଏହାର ପ୍ରଭାବ ପଶ୍ଚିମ ଜାଭା, ୟୋଗ୍ୟାର୍ତ୍ତାରେ ମଧ୍ୟ ଦେଖିବାକୁ ମିଳିଛି । ଲୋକମାନଙ୍କୁ ସତର୍କ ରହିବାକୁ ପରାମର୍ଶ ଦେଇଛି ପାଣିପାଗ ବିଭାଗ ।