ହାଇଦ୍ରାବାଦ: ଆମେରିକା ରାଷ୍ଟ୍ରପତି ନିର୍ବାଚନ ପୂର୍ବରୁ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ହତ୍ୟା ଉଦ୍ୟମ ହୋଇଛି । ସଭାକୁ ସମ୍ବୋଧିତ କରୁଥିବା ବେଳେ ଗୁଳିମାଡ କରିଛି ଆତତାୟୀ । ହେଲେ ଏଥିରେ ଅଳ୍ପକେ ମୃତ୍ୟୁମୁଖରୁ ବର୍ତ୍ତି ଯାଇଛନ୍ତି ଡୋନାଲ୍ଡ ଟ୍ରମ୍ପ । ଏବେ ଏହି ହତ୍ୟା ଉଦ୍ୟମ କରିଥିବା ଅଭିଯୁକ୍ତ ସମ୍ପର୍କରେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି । ଅଭିଯୁକ୍ତର ଫଟୋ ଓ ପରିଚୟ ସାମ୍ନାକୁ ଆସିଛି । କୌଣସି ପେଶାଦାର କିମ୍ବା ଅଭ୍ୟାସଗତ ଅପରାଧୀ ନୁହେଁ ବରଂ ଜଣେ 20 ବର୍ଷୀୟ ତରୁଣ ଛାତ୍ର ଟ୍ରମ୍ପଙ୍କୁ ହତ୍ୟା ଉଦ୍ୟମ କରିଛି । ଗୁଳିକାଣ୍ଡ ଦିନ ସିକ୍ରେଟ ସର୍ଭିସ ସ୍ନାଇପରଙ୍କ ଗୁଳିରେ ଆତତାୟୀର ମୃତ୍ୟୁ ହୋଇଥିଲା । ଆମେରିକାର କେନ୍ଦ୍ରୀୟ ତଦନ୍ତ ଏଜେନ୍ସି (ଏଫବିଆଇ) ଏହି ଅଭିଯୁକ୍ତକର ଫଟୋ ଓ ନାମ ସାର୍ବଜନୀନ କରିଛି । ଏହି ଯୁବକ ହେଉଛି 20ବର୍ଷୀୟ ଛାତ୍ର ଥୋମାସ୍ ମାଥ୍ୟୁ କ୍ରୁକ୍ସ । ପୋଲିସ ଗୁଳିରେ ଅଭିଯୁକ୍ତର ମୃତ୍ୟୁ ହେବା ପରେ ମୃତଦେହ ନିକଟରୁ ଏକ ଏଆର-15 ପରି ଅତ୍ୟାଧୁନିକ ମାରଣାସ୍ତ୍ର ମଧ୍ୟ ଜବତ ହୋଇଛି । ତେବେ ନିର୍ବାଚନ ପୂର୍ବରୁ ଏହା ଏକ ବଡ ସଙ୍କେତ ବୋଲି କହିଛନ୍ତି ଆମେରିକୀୟ । ବର୍ତ୍ତମାନ ବନ୍ଧୁକ ନୀତିରେ ପରିବର୍ତ୍ତନର ସମୟ ଆସିଛି ବୋଲି ମତ ପ୍ରକାଶ ପାଇଛି ।
ରବିବାର ପେନସିଲଭାନିଆ ସହରରେ ଏକ ନିର୍ବାଚନ ରାଲିରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଗୁଳିମାଡ ହୋଇଥିଲା । ଟ୍ରମ୍ପଙ୍କ କାନରେ ଗୁଳି ବାଜିଥିବା ବେଳେ ସାରା ଦେଶରେ ଏକ ସମ୍ବେଦନଶୀଳତା ଦେଖାଦେଇଥିଲା । ଘଟଣାର କିଛି ଘଣ୍ଟା ପରେ ଫେଡେରାଲ୍ ବ୍ୟୁରୋ ଅଫ୍ ଇନଭେଷ୍ଟିଗେସନ (FBI) ଅଭିଯୁକ୍ତ 20 ବର୍ଷୀୟ ଥୋମାସ୍ ମାଥ୍ୟୁ କ୍ରୁକ୍ସ ବୋଲି ଚିହ୍ନଟ କରିଥିଲା । ଏହା ପୂର୍ବରୁ ତାର ମୃତ୍ୟୁ ହୋଇସାରିଥିଲା ।
କିଏ ଏହି 20 ବର୍ଷୀୟ ଅଭିଯୁକ୍ତ:-
ଥୋମାସ୍ ମାଥ୍ୟୁ କ୍ରୁକ୍ସ ହେଉଛି ଜଣେ ଛାତ୍ର । 2022ରେ ସେ ବିଠଲ-ପର୍କ ହାଇସ୍କୁଲର ସ୍ନାତ୍ତକ ପାଠ୍ୟକ୍ରମ ଶେଷ କରିଛି । ଜାତୀୟ ଗଣିତ ଓ ବିଜ୍ଞାନ ବର୍ଗରେ ସେ ଭଲ ପ୍ରଦର୍ଶନ ପାଇଁ ସମ୍ମାନିତ ମଧ୍ୟ ହୋଇଛନ୍ତି । ତାଙ୍କ ସ୍କୁଲ ସହପାଠୀଙ୍କ ବୟାନ ମଧ୍ୟ ଏବେ ଧିରେ ଧିରେ ସାମ୍ନାକୁ ଆସିବାରେ ଲାଗିଲାଣି । ସହପାଠୀଙ୍କ ମଧ୍ୟରେ ବାର୍ତ୍ତାଳାପ ବେଳେ ସେ କୌଣସି ରାଜନୈତିକ ପ୍ରସଙ୍ଗରେ ଆଗ୍ରହ ପ୍ରକାଶ କରନ୍ତି ନାହିଁ, କିମ୍ବା ଟ୍ରମ୍ପଙ୍କ ସମ୍ପର୍କରେ ସେ କେବେ ଆଲୋଚନା କରିବାର ଦେଖାଯାଇନଥିବା ତାଙ୍କ ସହପାଠୀ କହିଛନ୍ତି । ସେ ସ୍କୁଲ ପରିସରରେ ଅଧିକାଂଶ ସମୟରେ ଶାନ୍ତ ରହୁଥିଲେ । ଉତ୍ତେଜିତ ଅବସ୍ଥାରେ ବନ୍ଧୁମାନଙ୍କ ସହ ବିତର୍କ କରିବା କିମ୍ବା ଅନ୍ୟ ଉତ୍ତେଜିତ କାର୍ଯ୍ୟକଳାପରେ ତାଙ୍କୁ କେବେ ହେଲେ ଦେଖାଯାଇନଥିଲା ବୋଲି ମଧ୍ୟ ସହପାଠୀ କହିଛନ୍ତି ।