ବେଙ୍ଗାଲୁରୁ: କର୍ଣ୍ଣାଟକରେ ବର୍ତ୍ତମାନ ଚିନ୍ତାର କାରଣ ସାଜିଛି ମଙ୍କି ଫିଭର । ଦିନକୁ ଦିନ ବୃଦ୍ଧି ପାଇଛି ମଙ୍କି ଫିଭର ରୋଗୀଙ୍କ ସଂଖ୍ୟା । ଗତ ମାସରୁ ଆଜି ଯାଏଁ କର୍ଣ୍ଣାଟକରେ 50ରୁ ଅଧିକ ମାମଲା ସାମ୍ନାକୁ ଆସିଥିବା ବେଳେ 2ଜଣଙ୍କର ମୃତ୍ୟୁ ହୋଇଥିବା ସୂଚନା ରହିଛି । ତେବେ ରାଜ୍ୟରେ ମଙ୍କି ଫିଭର ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଏହାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ସତର୍କ ରହିବା ପାଇଁ ସୂଚନା ଦିଆଯାଇଛି । ସ୍ବାସ୍ଥ୍ୟ ବିଶେଷଜ୍ଞମାନେ ଏହାକୁ ବିପଜ୍ଜନକ ବୋଲି କହିଛନ୍ତି ।
ମଙ୍କି ଫିଭର କଣ ?: ମଙ୍କି ଫିଭର କ୍ୟାସାନୁର ଫରେଷ୍ଟ ଡିଜିଜ (KFD) ଭାବରେ ମଧ୍ୟ ଜଣାଶୁଣା । ଏହା ଏକ ଭାଇରାଲ୍ ହେମୋରେଜିକ୍ ଜ୍ୱର । କ୍ୟାସାନୁର ଫରେଷ୍ଟ ଡିଜିଜ ଭାଇରସ କାଣରୁ ଏହି ରୋଗ ହୋଇଥାଏ । ଏହି ଭାଇରସ ଫ୍ଲାଭିଭାଇରସର ଏକ ଅଂଶ ଅଟେ । ଏହି ରୋଗ ମୁଖ୍ୟତଃ ଜଙ୍ଗଲରେ ରହୁଥିବା ମାଙ୍କଡ, ହନୁ କାମୁଡିବା ଦ୍ବାରା ହୋଇଥାଏ । ଜଙ୍ଗଲୀ ପଶୁମାନଙ୍କ ଠାରୁ ମନୁଷ୍ୟକୁ ବ୍ୟାପିଥାଏ ଏହି ରୋଗ ।
କିଭଳି ବ୍ୟାପେ ଏହି ରୋଗ ?: ମଙ୍କି ଫିଭର ବା କ୍ୟାସାନୁର ଫରେଷ୍ଟ ଡିଜିଜ କୀଟ ଦ୍ବାରା ବ୍ୟାପିଥାଏ । ଏହା ସାଧାରଣତଃ ମାଙ୍କଡ଼ ନିକଟରେ ଦେଖାଯାଏ । ଅନ୍ୟପଟେ ଜଙ୍ଗଲକୁ ଯାଉଥିବା ବ୍ୟକ୍ତିମାନଙ୍କୁ ମଧ୍ୟ ଏହି ଜ୍ବର ହେବାର ସମ୍ଭାବନା ଅଧିକ ରହିଥାଏ । ମଣିଷକୁ କାମୁଡିବା ଦ୍ବାରା ରକ୍ତର ସଂର୍ଶରେ ଆସି ଜଣେ ସଂକ୍ରମିତ ହୋଇଥାଏ । ଅନ୍ୟପଟେ ସଂକ୍ରମିତ ପଶୁମାନଙ୍କର କ୍ଷୀର ପିଇବା ଦ୍ବାରା ମଧ୍ୟ ସଂକ୍ରମଣ ହେବାର ଆଶଙ୍କା ରହିଥାଏ । କିନ୍ତୁ ଜଣେ ମନୁଷ୍ୟ ଠାରୁ ଅନ୍ୟଜଣଙ୍କୁ ବ୍ୟାପିବା ବିରଳ ଅଟେ ।