How to identify fake paneer: ନିରାମିଷ ଲୋକଙ୍କ ପ୍ରଥମ ପସନ୍ଦ ପନିର୍ । ଭେଜ୍ କଥା ପଡିଲେ ପ୍ରଥମେ ପନିର ନାଁ ମନକୁ ଆସେ । ହେଲେ ଆପଣ କିଣୁଥିବା ପନିର୍ ଅସଲି ତ ? ବଜାରରେ ମିଳୁଥିବା ସବୁ ପନିର୍ ଅସଲି ନ ହୋଇପାରେ । ଆପଣ ଭାବୁଥିବେ ପନିର୍ କେମିତି ନକଲି ହୋଇପାରିବ ! କିନ୍ତୁ ଆଜିକାଲି କିଛି ଅସାଧୁ ବ୍ୟବସାୟୀ ସହଜରେ ଟଙ୍କା ରୋଜଗାର ପାଇଁ ଖାଦ୍ୟ ନାଁରେ ଜହର ସପ୍ଲାଏ କରୁଛନ୍ତି । ଏହି ଖାଦ୍ୟ ବଜାରରୁ ଆଣି ଖାଇଲେ ଆମ ଶରୀରକୁ ବିଭିନ୍ନ ମାରାତ୍ମକ ରୋଗ ଗ୍ରାସ କରିଥାଏ । ତେଣୁ ଖାଦ୍ୟ ସାମଗ୍ରୀ କିଣିବା ପୂର୍ବରୁ ଭଲ ଭାବେ ଏହାର ଯାଞ୍ଚ କରିବା ଉଚିତ୍ ।
ବେଳେବେଳେ ଆମେ ଯାଞ୍ଚ ନ କରି ବଜାରରୁ ପନିର କିଣି ଆଣୁ । ଏହାକୁ ଖାଇବା ପରେ ବିଭିନ୍ନ ସ୍ବାସ୍ଥ୍ୟ ସମସ୍ୟା ଦେଖାଯାଏ । ଏଥିପାଇଁ ପନିର୍ କିଣିବା ପୂର୍ବରୁ ଏହି ଉପାୟରେ ଅସଲି କିମ୍ବା ନକଲି ଚିହ୍ନନ୍ତୁ ।
ହାତରେ ଦବାନ୍ତୁ:
ବଜାରରୁ ଆସିଥିବା ପନିର୍ ଏକ ପ୍ଲେଟରେ ବାହାର କରନ୍ତୁ । ଏହାପରେ ହାତରେ ଏହି ପନିର ଦବାଇବାକୁ ଚେଷ୍ଟା କରନ୍ତୁ । ଯଦି ପନିର୍ ଭାଙ୍ଗିଯାଏ କିମ୍ବା ଖେଳେଇ ହୋଇଯାଏ ଏହାର ଅର୍ଥ କୌଣସି ଅପମିଶ୍ରିତ ହୋଇନାହିଁ । ଯଦି ପନିର ନ ଭାଙ୍ଗେ ତାହେଲେ ବୁଝିଯାଆନ୍ତୁ ଏହା ଅପମିଶ୍ରିତ । ନକଲି ପନିରରେ ମିଶୁଥିବା ତତ୍ତ୍ବ କ୍ଷୀରର ଗୁଣ ନଷ୍ଟ କରି ଏହାକୁ କଠିନ କରିଦିଏ । ତେଣୁ ହାତରେ ଦବାଇଲେ ଏହା ଖେଳେଇ ହୋଇନଥାଏ ।
ଆୟୋଡିନ ଟେଷ୍ଟ:
ପନିରର ଏକ ଟୁକୁଡା ନେଇ ପାଖାପାଖି 5 ମିନିଟ୍ ଯାଏଁ ଫୁଟାନ୍ତୁ । ଏହାକୁ ପ୍ଲେଟରେ ବାହାର କରି ଥଣ୍ଡା ହେବାକୁ ଛାଡି ଦିଅନ୍ତୁ । ଏବେ ଏହା ଉପରେ ଆୟୋଡିନ ଟିଙ୍କଚର କିଛି ବୁନ୍ଦା ପକାନ୍ତୁ । ଯଦି ପନିର ରଙ୍ଗ ସେମିତ ରହେ ତାହେଲେ ଏହା ଭଲ ପନିର୍ । କିନ୍ତୁ ରଙ୍ଗ ନୀଳ ପଡିଲେ ଏହାର ଅର୍ଥ କ୍ଷୀରରେ କିଛି କୃତ୍ରିମ ସାମଗ୍ରୀ ମିଶାଯାଇ ପ୍ରସ୍ତୁତ କରାଯାଇଛି ।