ବିଟ୍ରେ ଅନେକ ସ୍ବାସ୍ଥ୍ୟପଯୋଗୀ ଗୁଣ ରହିଛି । ଗାଢ ଲାଲ ରଙ୍ଗର ଏହି ପରିବା ପୋଷଣରେ ଭରପୂର । ଆପଣ ଏହାକୁ ସାଲାଡରେ ଖାଆନ୍ତୁ କି ଜୁସ୍ କରି ପିଅନ୍ତୁ, ସବୁ ରୂପରେ ବିଟ୍ ଲାଭଦାୟକ । ଏହା ଆଇରନ, ପୋଟାସିୟମ, ଫାଇବର, ଆଣ୍ଟିଅକ୍ସିଡାଣ୍ଟର ଭଲ ଉତ୍ସ । ନିୟମିତ ବିଟ୍ ଖାଇଲେ ତ୍ବଚା ଚମକିବା ସହ ହୃଦୟ, ଯକୃତ ଓ ମସ୍ତିଷ୍କ ସୁସ୍ଥ ରହିଥାଏ । ଶରୀରରେ ଷ୍ଟାମିନ ବଢେ, ରୋଗ ପ୍ରତିରୋଧକ ବୃଦ୍ଧିପାଏ ଏବଂ ଆହୁରି ଅନେକ ମାରାତ୍ମକ ରୋଗରୁ ରକ୍ଷା ମିଳେ ।
ଏନେଇ ମୁମ୍ବାଇର ଆହାର ଓ ପୋଷଣ ବିଶେଷଜ୍ଞ ରୁଶେଲ ଜର୍ଜ କହିଛନ୍ତି, ବିଟ୍ ଖାଇଲେ ରକ୍ତଚାପ ନିୟନ୍ତ୍ରିତ ହୁଏ, ରକ୍ତହୀନତା ଦୂର ହୁଏ ଓ ହୃଦରୋଗକୁ ରୋକିବାରେ ସାହାଯ୍ୟ କରେ । ଏଥିରେ ପ୍ରଚୁର ପରିମାଣରେ ନାଇଟ୍ରେଟ ଥାଏ, ଯାହା ଶରୀରରେ ନାଇଟ୍ରିକ ଅକ୍ସାଇଡରେ ପରିଣତ ହୁଏ ଏବଂ ଶରୀରରେ ରକ୍ତ ସଞ୍ଚାଳନ ଉନ୍ନତ କରେ । ଏଥିସହ ବିଟରେ ଥିବା ଆଣ୍ଟିଅକ୍ସିଡାଣ୍ଟ ଫ୍ରି ରାଡିକଲ୍ସ ଜନିତ ସମସ୍ୟାରୁ ରକ୍ଷା କରେ । ଖାସ୍ କରି ଏହା ଆଥଲେଟଙ୍କ ପାଇଁ ଅଧିକ ଲାଭକାରୀ । କାରଣ ଏହି ପରିବା ଷ୍ଟାମିନା ବଢାଇବାରେ ସାହାଯ୍ୟ କରେ ।
ବିଟରେ ଥିବା ପୌଷ୍ଟିକ ତତ୍ତ୍ବ:
ଆଇରନ: ବିଟ୍ ଆଇରନର ଏକ ଭଲ ଉତ୍ସ ଯାହା ଶରୀରରେ ରକ୍ତ ବଢାଏ ।
ଫୋଲେଟ:ଏହି ପୌଷ୍ଟିକ ତତ୍ତ୍ବ କୋଶିକାଗୁଡିକ ବୃଦ୍ଧି ଓ ମରାମତି ଲାଗି ଜରୁରୀ । ଖାସ୍ କରି ଗର୍ଭବତୀ ମହିଳାଙ୍କ ପାଇଁ ।
ପୋଟାସିୟମ: ଏହା ହୃଦୟ ଗତି ନିୟମିତ ରଖେ ଓ ମାଂସପେଶୀ ମଜଭୁତ କରେ ।
ଫାଇବର: ପାଚନ ତନ୍ତ୍ର ସୁସ୍ଥ ରଖିବାରେ ଏବଂ ଓଜନ ନିୟନ୍ତ୍ରଣରେ ସାହାଯ୍ୟ କରେ ।
ଭିଟାମିନ ସି: ଏହା ଇମ୍ୟୁନିଟି ମଜଭୁତ କରେ ଓ ତ୍ବଚାକୁ ଚମକଦାର ବନାଏ ।
ଆଣ୍ଟିଅକ୍ସିଡାଣ୍ଟ (ବିଟାଲେନ): ଏହା ବିଟ୍କୁ ଗାଢ ଲାଲ ରଙ୍ଗ ଦିଏ ଏବଂ ଶରୀରକୁ ଡିଟକ୍ସ କରିବାରେ ସାହାଯ୍ୟ କରେ ।
ବିଟ୍ ଖାଇବାର ଫାଇଦା:
- ବ୍ଲଡପ୍ରେସର ନିୟନ୍ତ୍ରଣ କରେ ଓ ହୃଦରୋଗ ଆଶଙ୍କା କମାଏ ।
- ଏଥିରେ ପ୍ରଚୁର ଆଇରନ ଓ ଫୋଲେଟ ଥାଏ ଯାହା ଶରୀରରେ ରକ୍ତ ବଢାଇ ଏନିମିଆରୁ ରକ୍ଷା କରେ ।
- ବିଟ୍ରେ ବିଟାଲେନ ନାମକ ଆଣ୍ଟିଅକ୍ସିଡାଣ୍ଟ ମିଳେ । ଏହା କ୍ୟାନ୍ସର ଓ ଅନ୍ୟାନ୍ୟ ରୋଗରୁ ବଞ୍ଚାଇବାରେ ସହାୟକ ହୁଏ ।
- ଶରୀରରୁ ବିଷାକ୍ତ ପଦାର୍ଥ ବାହାରେ କରେ । ଫଳରେ ଲିଭର ଓ କିଡନୀ ସୁସ୍ଥ ରହେ ।
- ବିଟରେ ଥିବା ଫାଇବର ହଜମ କ୍ରିୟା ଠିକ୍ ରଖେ । କୋଷ୍ଠକାଠିନ୍ୟ ଦୂର କରେ ଓ ଶରୀରରେ ରୋଗ ପ୍ରତିରୋଧକ କ୍ଷମତା ବୃଦ୍ଧି କରେ ।
- ବିଟ୍ ଜୁସ ଷ୍ଟାମିନା ବୃଦ୍ଧି ଓ ଥକ୍କାପଣ କମ୍ କରିବାରେ ସାହାଯ୍ୟ କରେ ।
- ଏଥିରେ ଥିବା ଆଣ୍ଟିଅକ୍ସିଡାଣ୍ଟ ଓ ଭିଟାମିନ-ସି ତ୍ବଚାକୁ ଚମକଦାର ଓ କେଶକୁ ମଜଭୁତ କରେ ।
- ନିୟମିତ ବିଟ୍ ଖାଇଲେ ମସ୍ତିଷ୍କ ଠିକ୍ ଭାବେ କାର୍ଯ୍ୟ କରେ ଓ ସ୍ମରଣ ଶକ୍ତି ବଢେ ।
କେଉଁମାନେ ବିଟ୍ ଖାଇବା ଅନୁଚିତ୍:
ଡାଇବେଟିସ, କିଡନୀ ଷ୍ଟୋନ ଏବଂ ଲୋ ବ୍ଲଡପ୍ରେସର ସମସ୍ୟା ଥିବା ଲୋକେ ନିୟମିତ ବିଟ୍ ଖାଇବା ପୂର୍ବରୁ ଥରେ ଡାକ୍ତରଙ୍କ ପରାମର୍ଶ ନେବା ଉଚିତ୍ । ଏହାର ଗ୍ଲାଇସେମିକ ଇଣ୍ଡେକ୍ସ ଅଧିକ ତେଣୁ ଏହାକୁ ଅଧିକ ମାତ୍ରାରେ ଖାଇବା ଦ୍ବାରା ରକ୍ତରେ ସୁଗାର ସ୍ତର ବଢିପାରେ । ତେଣୁ ଡାଇବେଟିସ ରୋଗୀ ଏହାକୁ ନିୟମିତ ସେବନ କରିବା ଠିକ୍ ନୁହେଁ । ସେହିପରେ ଏଥିରେ ଅକ୍ସାଲେଟ ମାତ୍ରା ରହିଛି, ଯାହା ଷ୍ଟୋନ ରୋଗୀଙ୍କ ସମସ୍ୟା ବଢାଇପାରେ ।
