ହାଇଦ୍ରାବାଦ:ସର୍ବଦା ନିଜ ବୟାନକୁ ନେଇ ବିବାଦରେ ରହୁଥିବା ବଲିଉଡ କୁଇନ କଙ୍ଗନା ରାଣାୱତ ପୁଣିଥରେ ବିବାଦରେ ଛନ୍ଦି ହୋଇଛନ୍ତି । ଅଭିନେତ୍ରୀ ଗୋମାଂସ ପସନ୍ଦ କରୁଥିବା ଏବଂ ଏହାକୁ ଖାଇବାକୁ ଭଲପାଉଥିବା ଅଭିଯୋଗ ହୋଇଛି । ନିକଟରେ କଂଗ୍ରେସ ନେତା ବିଜୟ ୱଡେଟିୱାର କଙ୍ଗନାଙ୍କ ନାଁରେ ଏହି ଅଭିଯୋଗ କରିଥିବା ବେଳେ ଅଭିନେତ୍ରୀ ଏଭଳି ଅଭିଯୋଗକୁ ନେଇ ତାତିବା ସହ ଉଚିତ ଜବାବ ଦେଇଛନ୍ତି । ହିମାଚଳ ପ୍ରଦେଶର ମଣ୍ଡି ଲୋକସଭା ଆସନରୁ ବିଜେପି ପ୍ରାର୍ଥୀ ହେବା ପରେ କଙ୍ଗନାଙ୍କ ନାଁରେ ଏହି ଅଭିଯୋଗ କରାଯାଇଥିବା ଜଣାପଡିଛି ।
ଗୋମାଂସ ଖାଇବା ଖବର ଉପରେ କଙ୍ଗନାଙ୍କ ପ୍ରତିକ୍ରିୟା
ନିଜ ସୋସିଆଲ ମିଡିଆ ହ୍ୟାଣ୍ଡେଲ ଏକ୍ସରେ କଙ୍ଗନା ଏକ ପୋଷ୍ଟ ସେୟାର କରି ଗୋମାଂସ ଖାଇବା ଖବର ନେଇ ପ୍ରତିକ୍ରିୟା ଦେଇଛନ୍ତି । ସେ ଲେଖିଛନ୍ତି, ''ମୁଁ ଗୋମାଂସ କିମ୍ବା କୌଣସି ପ୍ରକାରର ଲାଲ ମାଂସ ଖାଏ ନାହିଁ । ଏହା ଲଜ୍ଜାଜନକ ଯେ ମୋ ବିଷୟରେ ସଂପୂର୍ଣ୍ଣ ଭିତ୍ତିହୀନ ଗୁଜବ କଥା ପ୍ରଚାରିତ ହେଉଛି । ମୁଁ ଦୀର୍ଘ ଦଶନ୍ଧି ଧରି ଯୋଗ ଏବଂ ଆୟୁର୍ବେଦିକ ଜୀବନଶୈଳୀକୁ ପ୍ରୋତ୍ସାହିତ କରିଆସୁଛି । ଏଭଳି ରଣନୀତି ମୋର ଭାବମୂର୍ତ୍ତିକୁ ଖରାପ କରିବା ପାଇଁ କାମ କରିବ ନାହିଁ କାରଣ ଲୋକମାନେ ମୋତେ ଜାଣନ୍ତି ଯେ ମୁଁ ଜଣେ ଗର୍ବିତ ହିନ୍ଦୁ । ତେଣୁ ଏଭଳି କୌଣସି ଖବର ସେମାନଙ୍କୁ କେବେ ବି ବିଭ୍ରାନ୍ତ କରିପାରିବ ନାହିଁ । ଜୟ ଶ୍ରୀ ରାମ ।''