କଟକ: ରାହୁଲ ଗାନ୍ଧୀଙ୍କୁ ନେଇ ଓଡ଼ିଆ ଅଭିନେତା ବୁଦ୍ଧାଦିତ୍ୟ ମହାନ୍ତି ସୋସିଆଲ ମିଡିଆରେ ଟିପ୍ପଣୀ ଦେବା ପ୍ରସଙ୍ଗ । କ୍ଷମା ମାଗିଲେ ଅଭିନେତା ବୁଦ୍ଧାଦିତ୍ୟ ମହାନ୍ତି । ଥାନାରେ ଏତଲା ଏବଂ କଂଗ୍ରେସର ଜୋରଦାର ବିରୋଧ ପରେ କ୍ଷମା ମାଗିଛନ୍ତି ଅଭିନେତା । ଆଜି(ଅକ୍ଟୋବର 21)ରେ ଏକ ସାମ୍ବାଦିକ ସମ୍ମିଳନୀ କରି ସର୍ବସମ୍ମୁଖରେ ରାହୁଲ ଗାନ୍ଧୀଙ୍କ ସମେତ ସମସ୍ତ କଂଗ୍ରେସ ନେତା ଓ କର୍ମକର୍ତ୍ତା ଏବଂ ଓଡ଼ିଶାବାସୀଙ୍କୁ କ୍ଷମା ପ୍ରାର୍ଥନା କରିଛନ୍ତି ଅଭିନେତା ।
କ୍ଷମା ମାଗିଲେ ବୁଦ୍ଧାଦିତ୍ୟ
ସାମ୍ବାଦିକ ସମ୍ମିଳନୀରେ ବୁଦ୍ଧାଦିତ୍ୟ କହିଛନ୍ତି, ''ଏଇଟା ମୋର ଭୁଲ ଥିଲା । ମୁଁ ଅଜାଣତରେ ଏହି ଭୁଲ କରିଥିଲି । ମୋର ମନ ଓ ଆଙ୍ଗୁଠି ଉପରେ ନିୟନ୍ତ୍ରଣ ରହି ନ ଥିଲା । ଭୁଲଟା ଜାଣି ପାରି ତୁରନ୍ତ ସୋସିଆଲ ମିଡିଆରୁ ପୋଷ୍ଟଟି ଡିଲିଟ୍ କରିଦେଇଥିଲି ଏବଂ ପୋଷ୍ଟ କରି କ୍ଷମା ମଧ୍ୟ ମାଗିଥିଲି । ତେବେ ଆଜି ମୁଁ ସମଗ୍ର ଓଡ଼ିଶାବାସୀ ଏବଂ ଗଣମାଧ୍ୟମ ସମ୍ମୁଖରେ ପୁଣି ରାହୁଲ ଗାନ୍ଧୀଙ୍କ ସମେତ ରାଜ୍ୟ କଂଗ୍ରେସକୁ କ୍ଷମା ମାଗୁଛି ଏବଂ ବରିଷ୍ଠ କଂଗ୍ରେସ ନେତା ସୁର ରାଉତରାୟ, ଜୟଦେବ ଜେନା, ମୋକିମ, ବିଧାୟିକା ସୋଫିଆ, ଯୁବ କଂଗ୍ରେସ ଓ ଛାତ୍ର କଂଗ୍ରେସକୁ ହାତ ଯୋଡ଼ି କ୍ଷମା ମାଗୁଛି । ଏହା ମୋର ପ୍ରଥମ ଭୁଲ ଭାବି କ୍ଷମା କରନ୍ତୁ ।'' ସେପଟେ ଲରେନ୍ସ ବିଷ୍ଣୌଇ ସହ ମୋର କୌଣସି ସମ୍ପର୍କ ନାହିଁ ବୋଲି ବୁଦ୍ଧାଦିତ୍ୟ କହିଛନ୍ତି ।
ସୋସିଆଲ ମିଡିଆରେ କ'ଣ ଲେଖିଥିଲେ ବୁଦ୍ଧାଦିତ୍ୟ ?
ସୋସିଆଲ ମିଡିଆ ପୋଷ୍ଟରେ ବୁଦ୍ଧାଦିତ୍ୟ ଲେଖିଥିଲେ, ''ଜର୍ମାନରେ ଗେଷ୍ଟାପୋ, ଇସ୍ରାଏଲର ମୋସାଦ, ଆମେରିକାରେ ସିଆଇଏ... ବର୍ତ୍ତମାନ ଭାରତରେ ଲରେନ୍ସ ବିଷ୍ଣୋଇ, ପରବର୍ତ୍ତୀ ତାଲିକାରେ ଓୱେସି ଏବଂ ରାହୁଲ ଗାନ୍ଧୀ ନା ରହିବା ଦରକାର ।'' ଅଭିନେତାଙ୍କ ଏପରି ପୋଷ୍ଟ ପରେ ଝଡ଼ ସୃଷ୍ଟି ହୋଇଥିଲା । ଯାହା ପରେ ବିବାଦ ତେଜିବା ସହ ଥାନାକୁ ଗଲା ମାମଲା । ରାହୁଲ ଗାନ୍ଧୀ ଲରେନ୍ସ ବିଷ୍ଣୌଇର ପରବର୍ତ୍ତୀ ଟାର୍ଗେଟ ବୋଲି ଲେଖିଥିବା ଅଭିଯୋଗରେ ବୁଦ୍ଧାଦିତ୍ୟଙ୍କ ନାଁରେ କ୍ୟାପିଟାଲ ଥାନାରେ ଲିଖିତ ଅଭିଯୋଗ କରିଥିଲା ଛାତ୍ର କଂଗ୍ରେସ । ସୋସିଆଲ ମିଡିଆରେ ଆମ ନେତାଙ୍କ ବିରୋଧରେ ଏଭଳି ମନ୍ତବ୍ୟ ଆମେ ଗ୍ରହଣ କରିବୁ ନାହିଁ ବୋଲି କହିଛନ୍ତି ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନ କହିଥିଲେ । ଯଦିଓ ବୁଦ୍ଧାଦିତ୍ୟ ପୋଷ୍ଟ ଡିଲିଟ କରିଥିଲେ କିନ୍ତୁ ଆମେ ଚାହୁଁଛୁ ସେ ଯେଉଁଭଳି ଭୁଲ ପୋଷ୍ଟ କରିଥିଲେ ସେଭଳି ସର୍ବସମ୍ମୁଖରେ କ୍ଷମା ମାଗନ୍ତୁ । ନହେଲେ ଆଗାମୀ ଦିନରେ ତାଙ୍କୁ ବାଟ ଚଳାଇ ଦେବୁନାହିଁ, କାଳିମାଡ କରିବୁ ବୋଲି ଚେତାବନୀ ଦେଇଥିଲା ଛାତ୍ର କଂଗ୍ରେସ ।