ଚେନ୍ନାଇ: ମ୍ୟୁଜିକ କମ୍ପାନୀ ଇକୋ ଏବଂ ଏଜିଆଇ ଲୋକପ୍ରିୟ ସଙ୍ଗୀତକାର ଇଲାୟାରାଜାଙ୍କ ୪୫୦୦ଗୀତ ବ୍ୟବହାର କରିବାକୁ ଏକ ଚୁକ୍ତିନାମା ସ୍ୱାକ୍ଷର କରିଛନ୍ତି । ହେଲେ ଚୁକ୍ତିନାମା ସମାପ୍ତ ହେବା ପରେ ବି କଣ୍ଠଶିଳ୍ପୀଙ୍କ ବିନା ଅନୁମତିରେ ଏହି ଗୀତଗୁଡିକ ମ୍ୟୁଜିକ କମ୍ପାନୀ ବ୍ୟବହାର କରୁଥିବା ଅଭିଯୋଗ ହୋଇଛି । ଯାହାକୁ ନେଇ ଇଲାୟାରାଜା ମାଡ୍ରାସ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ଏବଂ ସେମାନଙ୍କ ବିରୋଧରେ ଏକ ମକଦ୍ଦମା ରୁଜୁ କରୁଥିଲେ । ଯାହାର ଶୁଣାଣିକୁ ବର୍ତ୍ତମାନ ସ୍ଥଗିତ ରଖିଛନ୍ତି ମାଡ୍ରାସ ହାଇକୋର୍ଟ । ଜୁନ୍ ଦ୍ୱିତୀୟ ସପ୍ତାହରେ ପରବର୍ତ୍ତୀ ଶୁଣାଣି କରାଯିବ ।
ସୂଚନା ଅନୁସାରେ, ମାଡ୍ରାସ ହାଇକୋର୍ଟର ଏକକ ବେଞ୍ଚ ବିଚାରପତି ଅନୀତା ସୁମନ୍ତ 2019ରେ ଏହି ନିର୍ଦ୍ଦେଶ ଦେଇଥିଲେ ଯେ ସଂପୃକ୍ତ ନିର୍ମାତାଙ୍କ ଠାରୁ ଅଧିକାର ପାଇବା ପରେ ସଙ୍ଗୀତ କମ୍ପାନୀ ଗୁଡିକ ଇଲାୟାରାଜାଙ୍କ ଗୀତ ବ୍ୟବହାର କରିବାର ଅଧିକାର ରହିଛି । କିନ୍ତୁ ଏହି ଗୀତ ଗୁଡ଼ିକ ଉପରେ ଇଲାୟାରାଜାଙ୍କର ମଧ୍ୟ ବିଶେଷ ଅଧିକାର ରହିଛି । ସଙ୍ଗୀତ କମ୍ପାନୀକୁ ଅଧିକାର ପ୍ରଦାନ ନିଷ୍ପତ୍ତି ବିରୋଧରେ ଇଲାୟାରାଜାଙ୍କ ଦ୍ୱାରା ଦାଖଲ ହୋଇଥିବା ଆବେଦନ ଉପରେ ଶୁଣାଣି କରୁଥିବା ହାଇକୋର୍ଟର ଡିଭିଜନ୍ ବେଞ୍ଚ ମ୍ୟୁଜିକ୍ କମ୍ପାନୀଗୁଡିକୁ ଇଲାୟାରାଜାଙ୍କ ଗୀତ ବ୍ୟବହାର କରିବାରେ ମଧ୍ୟବର୍ତ୍ତୀକାଳୀନ ପ୍ରତିବନ୍ଧକ ଲଗାଇଥିଲେ ।