ହାଇଦ୍ରାବାଦ:ପରଦାରେ ଧମାକା କରିବାକୁ ପ୍ରସ୍ତୁତ ବଲିଉଡ ଅଭିନେତା ଅକ୍ଷୟ କୁମାର ଏବଂ ଟାଇଗର ଶ୍ରଫ । ଫିଲ୍ମ 'ବଡେ ମିୟାଁ ଛୋଟେ ମିୟାଁ' ସହ ସିଲଭର ସ୍କ୍ରିନରେ ଜଲୱା ଦେଖାଇବେ ଏହି ଦୁଇ ଅଭିନେତା । ଯାହାର ରିଲିଜକୁ ଫ୍ୟାନ୍ସ ଉତ୍ସାହର ସହ ଅପେକ୍ଷା କରିଛନ୍ତି । ଏହାରି ମଧ୍ୟରେ ବର୍ତ୍ତମାନ ନିର୍ମାତା ଫିଲ୍ମର ରିଲିଜ ତାରିଖ ଘୁଞ୍ଚାଇ ଦେଇଛନ୍ତି । ରିଲିଜର ଗୋଟିଏ ଦିନ ପୂର୍ବରୁ ନିର୍ମାତା ଫିଲ୍ମ 'ବଡେ ମିୟାଁ ଛୋଟେ ମିୟାଁ'ର ରିଲିଜ ତାରିଖ ବୃଦ୍ଧି କରିଛନ୍ତି । ତେବେ କାହିଁକି ଏହି ପରିବର୍ତ୍ତନ କରାଗଲା ଏବଂ କେବେ ଫିଲ୍ମ ପରଦାକୁ ଆସିବ ସେନେଇ ଏକ ଭିଡିଓ ବାର୍ତ୍ତା ଜରିଆରେ ପ୍ରତିକ୍ରିୟା ଦେଇଛନ୍ତି ଅକ୍ଷୟ ଏବଂ ଟାଇଗର ।
ଏହି ଦିନ ରିଲିଜ ହେବ 'ବଡେ ମିୟାଁ ଛୋଟେ ମିୟାଁ'
ଆସନ୍ତାକାଲି ଅର୍ଥାତ୍ ଏପ୍ରିଲ ୧୦ରେ ଏହି ଫିଲ୍ମ ରିଲିଜ ହୋଇଥାନ୍ତା । ହେଲେ ରିଲିଜର ଗୋଟିଏ ଦିନ ପୂର୍ବରୁ ରିଲିଜ ତାରିଖ ପରିବର୍ତ୍ତନ କରିଛନ୍ତି ନିର୍ମାତା । ଏବେ ଏପ୍ରିଲ ୧୦ ନୁହଁ ବରଂ ୧୧ ତାରିଖରେ ପରଦାରେ ମୁକ୍ତିଲାଭ କରିବ ଫିଲ୍ମ 'ବଡେ ମିୟାଁ ଛୋଟେ ମିୟାଁ' । ଅକ୍ଷୟ କୁମାର ଏବଂ ଟାଇଗର ଶ୍ରଫ ନିଜ ଇନଷ୍ଟାଗ୍ରାମରେ ଏକ ଭିଡିଓ ପୋଷ୍ଟ କରି ଏହି ସୂଚନା ଦେଇଥିବା ବେଳେ ଏହା କାହିଁକି ପରିବର୍ତ୍ତନ କରାଗଲା ତାହାର କାରଣ ମଧ୍ୟ କହିଛନ୍ତି ।
ଏହି କାରଣରୁ ବଦଳିଲା 'ବଡେ ମିୟାଁ ଛୋଟେ ମିୟାଁ' ରିଲିଜ ଡେଟ୍
ଭିଡିଓରେ ଅକ୍ଷୟ ଏବଂ ଟାଇଗର କହିଛନ୍ତି, "ମୁଁ ଏବଂ ଟାଇଗର ବର୍ତ୍ତମାନ ଆବୁଧାବିରେ ଅଛୁ । ଆମ ଚଳଚ୍ଚିତ୍ରର ପ୍ରମୋସନ ପାଇଁ ଆମେ ଏଠାକୁ ଆସିଛୁ । ଏଠାରେ ଇଫତାର ପାଇଁ ଶେଖଙ୍କ ସ୍ଥାନରୁ ଆମନ୍ତ୍ରଣ ପାଇଥିଲୁ । ଆମେ ମଧ୍ୟ ତାଙ୍କୁ ଭେଟିଲୁ ଏବଂ ଏହା ଆମକୁ ବହୁତ ଭଲ ଲାଗିଲା । ସେଠାରେ ଆମେ ଜାଣିବାକୁ ପାଇଲୁ ଯେ ୟୁଏଇ ଘୋଷଣା କରିଛି ଯେ ଇଦ୍ ଏପ୍ରିଲ ୧୦ରେ ପାଳନ ହେବ । ଏହାର ଅର୍ଥ ହେଉଛି ଭାରତରେ ଇଦ ଏପ୍ରିଲ ୧୧ରେ ପାଳନ ହେବ । ତେବେ ଆମେ ଯେହେତୁ ପୂର୍ବରୁ କହିଥିଲୁ ଯେ, ଆମେ ଇଦ ଅବସରରେ ଫିଲ୍ମ ରିଲିଜ କରିବୁ ଯାହା ଏପ୍ରିଲ ୧୦ରେ ଥିଲା । ତେବେ ଭାରତରେ ଇଦ ପାଳନର ତାରିଖ ୧୧କୁ ବୃଦ୍ଧି ହୋଇଥିବା ନେଇ ଆମେ ମଧ୍ୟ ଏପ୍ରିଲ ୧୧ରେ ଫିଲ୍ମ ରିଲିଜ କରିବାକୁ ନିଷ୍ପତ୍ତି ନେଲୁ ।" ଶେଷରେ ଉଭୟ ସମସ୍ତ ଫ୍ୟାନ୍ସଙ୍କୁ ଇଦର ଶୁଭକାମନା ମଧ୍ୟ ଜଣାଇଛନ୍ତି ।
ଏହା ମଧ୍ୟ ପଢନ୍ତୁ:'ବଡ଼େ ମିୟାଁ ଛୋଟେ ମିୟାଁ' ଟିଜର ରିଲିଜ, ଟାଇଗର-ଅକ୍ଷୟଙ୍କ ଆକ୍ସନ ଅବତାର ଉଡ଼ାଇଲା ହୋସ୍
'ବଡେ ମିୟାଁ ଛୋଟେ ମିୟାଁ' ଫିଲ୍ମ ବିଷୟରେ କହିବାକୁ ଗଲେ,ବାସୁ ଭଗ୍ନାନୀ ଏବଂ ଜ୍ୟାକି ଭଗ୍ନାନୀଙ୍କ ଦ୍ବାରା ପୂଜା ଏଣ୍ଟରଟେନମେଣ୍ଟ ବ୍ୟାନରରେ ନିର୍ମିତ ଏହି ଫିଲ୍ମ । 'ଭାରତ' ଏବଂ 'ସୁଲତାନ' ଫିଲ୍ମ ନିର୍ଦ୍ଦେଶକ ଅଲି ଅବ୍ବାସ ଜାଫର 'ବଡ଼େ ମିୟାଁ ଛୋଟେ ମିୟାଁ'ର ନିର୍ଦ୍ଦେଶନା ଦେଇଛନ୍ତି । ଏହି ଫିଲ୍ମ ଅଲ୍ଲିଙ୍କ ତୃତୀୟ ଇଦ୍ ରିଲିଜ ଫିଲ୍ମ ହେବ । ଏହି ଫିଲ୍ମ ହିନ୍ଦୀ, ତେଲୁଗୁ ଓ ତାମିଲ, କନ୍ନଡ ଏବଂ ମାଲାୟାଲମ ଭାଷାରେ ରିଲିଜ ହେବ । ଏହି ଫିଲ୍ମରେ ଅକ୍ଷୟ, ଟାଇଗରଙ୍କ ବ୍ୟତୀତ ସାଉଥ ତାରକା ପୃଥ୍ବୀରାଜ ସୁକୁମାରନ ପ୍ରଥମ ଥର ପାଇଁ ଏକାଠି ନଜର ଆସିବେ । ଏହି ଫିଲ୍ମରେ ବଲିଉଡ ଅଭିନେତ୍ରୀ ସୋନାକ୍ଷୀ ସିହ୍ନା, ମାନୁଷୀ ଚିଲର୍ ଏବଂ ଆଲାୟା ଏଫ୍ ପ୍ରମୁଖ ମଧ୍ୟ ମୁଖ୍ୟ ଭୂମିକାରେ ଅଭିନୟ କରିଛନ୍ତି ।
