ହାଇଦ୍ରାବାଦ: ୱାୟନାଡଲୋକସଭା ଉପ-ନିର୍ବାଚନ ଜିତିଲେ ପ୍ରିୟଙ୍କା ଗାନ୍ଧୀ ଭଦ୍ରା । କେରଳର ଓ୍ବାୟନାଡରୁ କଂଗ୍ରେସ ପ୍ରାର୍ଥୀ ପ୍ରିୟଙ୍କା ଗାନ୍ଧୀ ଭଦ୍ରା ବଡ଼ ବ୍ୟବଧାନରେ ବିଜୟୀ ହୋଇଥିବା ବେଳେ, ଭାଇ ରାହୁଲ ଗାନ୍ଧୀଙ୍କ ରେକର୍ଡ ଭାଙ୍ଗିଛନ୍ତି । ଏହାସହ ପ୍ରଥମ ଥର ପାଇଁ ଲୋକସଭାକୁ ନିର୍ବାଚିତ ହୋଇଛନ୍ତି ପ୍ରିୟଙ୍କା । ରାହୁଲ ଗାନ୍ଧୀଙ୍କ ଇସ୍ତଫା ପରେ ୱାୟନାଡ଼ ଆସନ ଖାଲି ପଡ଼ିଥିଲା । ରାହୁଲ ରାୟବରେଲି ଆସନ ନିଜ ହାତରେ ରଖିଥିବା ବେଳେ, ୱାୟନାଡ଼ ଛାଡ଼ି ଦେଇଥିଲେ ।
ପ୍ରିୟଙ୍କା ଗାନ୍ଧୀଙ୍କ ରେକର୍ଡ ବିଜୟ:
UDF ପ୍ରାର୍ଥିନୀ ତଥା କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧି ୱାୟନାଡ଼ ଉପନିର୍ବାଚନରେ ବିପୁଳ ବିଜୟ ହାସଲ କରିଛନ୍ତି । ରାହୁଲ ଗାନ୍ଧୀ ଏହି ଆସନରୁ ଗତ ସାଧାରଣ ନିର୍ବାଚନରେ ପାଖାପାଖି ୩ ଲକ୍ଷ ୬୦ ହଜାର ଭୋଟ ବ୍ୟବଧାନରେ ବିଜୟୀ ହୋଇଥିବା ବେଳେ, ପ୍ରିୟଙ୍କା ଗାନ୍ଧୀ 4,04,619 ଭୋଟରେ ବିଜୟୀ ହୋଇଥିବା ସୂଚନା ମିଳିିଛି । ସୂଚନା ଅନୁସାରେ, ପ୍ରିୟଙ୍କା 6,12,020 ଭୋଟ ପାଇଥିବା ବେଳେ, LDF ପ୍ରାର୍ଥିନୀ ସତ୍ୟାନ ମୋକେରୀ 2,07,401 ଭୋଟ ସହ ଦ୍ବିତୀୟ ସ୍ଥାନରେ ରହିଛନ୍ତି । ସେହିପରି BJP ପ୍ରାର୍ଥୀ 1,08,080 ଭୋଟ ପାଇଛନ୍ତି ।
ରାହୁଲଙ୍କ ଇସ୍ତଫା ପରେ ପ୍ରାର୍ଥୀ ହୋଇଥିଲେ ପ୍ରିୟଙ୍କା:-
ଭାଇ ରାହୁଲ ଗାନ୍ଧୀ 2024 ସାଧାରଣ ନିର୍ବାଚନରେ ଦୁଇଟି ଆସନ, ଉତ୍ତର ପ୍ରଦେଶର ରାଏ-ବରେଲୀ ଓ କେରଳର ଓ୍ବାୟନାଡରୁ ନିର୍ବାଚନ ଜିତିଥିଲେ । ରାହୁଲ ରାଏ-ବରେଲୀରୁ ସାଂସଦ ପଦ ବଜାୟ ରଖି ଓ୍ବାୟନାଡରୁ ଇସ୍ତଫା ଦେବା ପରେ ସେଠାରେ ଉପ-ନିର୍ବାଚନ ହୋଇଥିଲା । ଏଥିରେ ପ୍ରଥମ ଥର କଂଗ୍ରେସର ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ନିର୍ବାଚନୀ ଡେବ୍ୟୁ କରିଛନ୍ତି । ଓ୍ବାୟନାଡରେ କଂଗ୍ରେସର ସ୍ଥିତି ଭଲ ରହିଛି ଓ ଦଳ ସଂଯୁକ୍ତ ଗଣତାନ୍ତ୍ରିକ ମେଣ୍ଟ (ୟୁଡିଏଫ) ବ୍ୟାନରେ ନିର୍ବାଚନ ଲଢୁଛି । ରାହୁଲ ଗାନ୍ଧୀ 2019 ଓ 2024 ସହ ଦୁଇଥର ଏହି ଆସନରୁ ନିର୍ବାଚନ ଜିତିଥିଲେ ।
- ରାହୁଲଙ୍କ ରେକର୍ଡ ଭାଙ୍ଗିଲେ ପ୍ରିୟଙ୍କା