ରାଜଧାନୀରେ ଭୁଶୁଡିଲା ଦୁଇ ମହଲା କୋଠା, 2 ମୃତ ଜଣେ ଆହତ

Delhi Building Collapse: ଦିଲ୍ଲୀର କବିର ନଗର ଅଞ୍ଚଳରେ ଭୁଶୁଡିଲା ଦୁଇ ମହଲା କୋଠା । ଦୁଇ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଆହତ । ଅଧିକ ପଢନ୍ତୁ

ନୂଆଦିଲ୍ଲୀ: ଦିଲ୍ଲୀରେ ଭୁଶୁଡିଲା ଦୁଇ ମହଲା ବିଶିଷ୍ଟ କୋଠା । ଭଙ୍ଗା କୋଠା ତଳେ ଚାପି ହୋଇ 2 ଜଣଙ୍କର ମୃତ୍ୟୁ ହୋଇଥିବା ବେଳେ ଜଣ ଆହତ ହୋଇଥିବା ସୂଚନା ମିଳିଛି । କବିର ନଗର ଅଞ୍ଚଳରେ କୋଠାଟି ଭୁଶୁଡି ପଡିଛି । ବିଳମ୍ବିତ ରାତି ପ୍ରାୟ 2ଟା 26 ମିନିଟ ସମୟରେ ଏହି ଅଘଟଣ ଘଟିଥିବା କୁହାଯାଉଛି । ଦୁଇ ଜଣ ମୃତକ ହେଉଛନ୍ତି ଅର୍ଶାଦ ଓ ତୌହିଦ, ଉଭୟ ଶ୍ରମିକ । ଆହତ ଜଣଙ୍କ ହେଉଛନ୍ତି ରୋହନ । ତାଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି ।

ଭୁଶୁଡିଥିବା ବିଲ୍ଡିଂର ପ୍ରଥମ ମହଲାଟି ଖାଲିଥିବା ବେଳେ ତଳ ମହଲାରେ ଜିନ୍ସ କଟିଂ ପାଇଁ ବ୍ୟବହୃତ ହେଉଥିଲା । ସେଠାରେ ଗତକାଲି ରାତିରେ କାମ ଚାଲିଥିବା ବେଳେ ବିଲ୍ଡିଂ ଭୁଶୁଡି ପଡିଥିଲା । ଏହି ଖବର ପ୍ରସାରିତ ହେବା ପରେ ପୋଲିସ ଏବଂ ସ୍ଥାନୀୟ ଲୋକଙ୍କ ଘଟଣାସ୍ଥଳରେ ସହଯୋଗରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ଏହାପରେ ଖବର ପାଇ ସଙ୍ଗେ ସଙ୍ଗେ ଉଦ୍ଧାରକାରୀ ଟିମ ଘଟଣାସ୍ଥଳରେ ପହଞ୍ଚିଥିଲା । ଭଙ୍ଗା କୋଠା ତଳେ ଚାପି ହୋଇଥିବା ତିନି ଶ୍ରମିକଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଥିଲା ।

ଡାକ୍ତର ସେଠାରେ 2 ଜଣଙ୍କୁ ମୃତ ଘୋଷଣା କରିଥିଲେ । ଗୁରୁତର ଶ୍ରମିକଙ୍କ ଚିକିତ୍ସା ଜିଟିବି ହସ୍ପିଟାଲରେ ଜାରି ରହିଛି । ବିଲ୍ଡିଂର ମାଲିକ ସହିଦ ବୋଲି ଜଣାପଡିଛି । ତାଙ୍କୁ ଧରିବାକୁ ପୋଲିସ ଉଦ୍ୟମ ଆରମ୍ଭ କରିଛି । ଏହି ପ୍ରସଙ୍ଗରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉତ୍ତର ପୂର୍ବ ଡିସିପି ଆନନ୍ଦ ତିର୍କି କହିଛନ୍ତି ।

ଏହି ଘଟଣାରେ ଷ୍ଟେସନ ଅଫିସର ଅନୁପ କହିଛନ୍ତି, ''ବିଳମ୍ବିତ ରାତିରେ ବିଲ୍ଡିଂ ଭୁଶୁଡିଥିବା ଖବର ଆମକୁ ମିଳିଥିଲା । ଏହାପରେ ସଙ୍ଗେ ସଙ୍ଗେ ଆମ ଟିମ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା । ଭୁଶୁଡିଥିବା କୋଠାଟି ବହୁ ପୁରୁଣା ଅଟେ ।'' NDRF ଟିମ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଆଉ କେହି ଭଙ୍ଗା କୋଠା ତଳେ ଚାପି ହୋଇ ରହିଛନ୍ତି ନା ନାହିଁ ତାହା ଉଦ୍ଧାର କାର୍ଯ୍ୟ ଶେଷ ପରେ ଜଣାପଡିବ । ଆହୁରି କିଛି ଶ୍ରମିକ ମଧ୍ୟ ଆବର୍ଜନା ତଳେ ଚାପି ହୋଇ ରହିଥିବା ଅନୁମାନ କରାଯାଉଛି ।