ନୂଆଦିଲ୍ଲୀ:ପାକିସ୍ତାନ ଅଧିକୃତ କାଶ୍ମୀର (POK) ଉପରେ ଭାରତ କେବେବି ନିଜର ଦାବିଦାରୀକୁ ଦୁର୍ବଳ କରିବ ନାହିଁ । ଏହା ଭାରତର ଅବିଚ୍ଛେଦ୍ୟ ଅଂଶ । କିନ୍ତୁ ଏହି ଅଞ୍ଚଳକୁ ବଳପୂର୍ବକ ଦଖଲକୁ ମଧ୍ୟ ନେବାର ଆବଶ୍ୟକତା ନାହିଁ । କାରଣ କାଶ୍ମୀର, ଏହି କ୍ଷେତ୍ରରେ ପ୍ରତିରକ୍ଷା କ୍ଷେତ୍ରରେ ଦେଖାଯାଇଥିବା ପରିବର୍ତ୍ତିତ କ୍ରମଃବିକାଶକୁ ଦେଖିଲେ ଏହା ସ୍ପଷ୍ଟ ଯେ, ପିଓକେ ଅଧିବାସୀ ଭାରତର ଅଂଶ ହେବାକୁ ଚାହାନ୍ତି ବୋଲି କହିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ।
ଜାତୀୟ ଖବର ସରବରାହ ସଂସ୍ଥା ‘ପିଟିଆଇ’କୁ ଏକ ସ୍ବତନ୍ତ୍ର ସାକ୍ଷାତକାରରେ ରାଜନାଥ କହିଛନ୍ତି ଯେ, ବର୍ତ୍ତମାନ ଜମ୍ମୁ-କାଶ୍ମୀରରେ ପୂର୍ବ ସ୍ଥିତିରେ ଯଥେଷ୍ଟ ଉନ୍ନତି ହୋଇଛି । ସେଠାରେ ଏବେ ସ୍ଥିରତା ଫେରୁଛି । ଭାରତ ସପକ୍ଷରେ ଜନମତ ମଧ୍ୟ ବଢିବାରେ ଲାଗିଛି । ଖୁବଶୀଘ୍ର ଜମ୍ମୁ କାଶ୍ମୀରରେ ସଶସ୍ତ୍ର ବଳ ସ୍ବତନ୍ତ୍ର କ୍ଷମତା ଆଇନ (AFSPA) ବଳବତ୍ତର ରଖିବାର ଆବଶ୍ୟକତା ରହିବ ନାହିଁ । ଏହାକୁ ପ୍ରତ୍ୟାହାର କରାଯିବ । ଏହି ପ୍ରକ୍ରିୟାଗତ ବିଷୟ ଏବେ କେନ୍ଦ୍ର ଗୃହ ମନ୍ତ୍ରଣାଳୟ ଅଧୀନରେ ବିଚାରାଧୀନ ରହିଛି । ସଠିକ ସମୟରେ ଏ ସମ୍ପର୍କରେ ପ୍ରଭାବୀ ନିଷ୍ପତ୍ତି ମଧ୍ୟ ଗ୍ରହଣ କରାଯିବ । କାଶ୍ମୀରରେ ନିର୍ବାଚନ ନିଶ୍ଚିତ ହେବ ଓ ପାକ ଅଧିକୃତ କାଶ୍ମୀର ମଧ୍ୟ ଭାରତରେ ବିଲୟ ହେବ ।
ରାଜନାଥ କହିଛନ୍ତି, ‘‘ଏହି ପ୍ରକ୍ରିୟା ପାଇଁ ଭାରତକୁ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଆବଶ୍ୟକତା ରହିବ ନାହିଁ । ସେଠାରେ ଏବେ ଯେଉଁ ଅର୍ଥନୈତିକ ଉନ୍ନତି ହେଉଛି, ସେଠାକାର ସ୍ଥାନୀୟ ଲୋକେ ମଧ୍ୟ ଭାରତରେ ମିଶିବା ପାଇଁ ଆଗ୍ରହ ପ୍ରକାଶ କରୁଛନ୍ତି । ସେତେବେଳେ ସେମାନେ ନିଜେ ଭାରତରେ ବିଲୟ ହେବା ପାଇଁ ଦାବି ଉଠାଇବେ । ପାକ ଅଧିକୃତ କାଶ୍ମୀର ପାକିସ୍ତାନର ବଳପୂର୍ବକ ଦଖଲ ଅଞ୍ଚଳ । ଏହି ଭୂଖଣ୍ଡ ପୂର୍ବୁର ମଧ୍ୟ ଭାରତର ଅବିଚ୍ଛେଦ୍ୟ ଅଂଶ ଥିଲା ଓ ଏବେ ମଧ୍ୟ ରହିଛି । ଭାରତ କେବେ ମଧ୍ୟ ନିଜର ଏହି ଆଭିମୁଖ୍ୟରେ ପରିବର୍ତ୍ତନ କରିପାରିବ ନାହିଁ ।’’