ନୂଆଦିଲ୍ଲୀ:କୋଲକାତା ଆରଜି କର ମେଡିକାଲରେ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାକୁ ନେଇ ଜାରି ରହିଛି ଆନ୍ଦୋଳନ । ଆଜି ପୀଡିତାଙ୍କୁ ନ୍ୟାୟ ଦାବିରେ ଦିଲ୍ଲୀର ଜନ୍ତରମନ୍ତରରେ ଶାନ୍ତିପୂର୍ଣ୍ଣ ଧାରଣା ଦେବ ଫେଡେରେସନ୍ ଅଫ୍ ଅଲ ଇଣ୍ଡିଆ ମେଡିକାଲ ଆସୋସିଏସନ । ଏହାରି ମଧ୍ୟରେ ଦୁଷ୍କର୍ମ ନିରୋଧୀ କଠୋର ଆଇନ ଆଣିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖି କହିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ଏହା ପୂର୍ବରୁ ମଧ୍ୟ ସମାନ ପ୍ରସଙ୍ଗରେ ସେ ମୋଦିଙ୍କୁ ଚିଠି ଲେଖିଥିଲେ । କିନ୍ତୁ କୌଣସି ଉତ୍ତର ନମିଳିବାରୁ ଦ୍ବିତୀୟ ଥର ଚିଠି ଲେଖିଛନ୍ତି ମମତା ।
ପ୍ରଥମ ଚିଠିର ଉତ୍ତର ନମିଳିବାରୁ ମୋଦିଙ୍କୁ ମମତାଙ୍କ ଦ୍ବିତୀୟ ଚିଠି:
ମମତା ବାନାର୍ଜୀ ଦ୍ବିତୀୟ ଚିଠିରେ ଲେଖିଛନ୍ତି, '' ଅଗଷ୍ଟ 22 ରେ ଆପଣଙ୍କ ପାଖକୁ ଲେଖିଥିବା ଚିଠିକୁ ଆପଣ ମନେ ରଖିଥିବେ । ଯେଉଁଥିରେ ଦେଶରେ ବଢୁଥିବା ଦୁଷ୍କର୍ମ ପରି ଜଘନ୍ୟ ଅପରାଧ ଉପରେ ରୋକ ଲଗାଇବା ପାଇଁ କଠୋର ନିୟମ ଆଣିବା ଉପରେ ଉଲ୍ଲେଖ କରାଯାଇଥିଲା। କିନ୍ତୁ ଏହି ସମ୍ବେଦନଶୀଳ ପ୍ରସଙ୍ଗରେ ଆପଣଙ୍କ ପକ୍ଷରୁ କୌଣସି ପ୍ରତିକ୍ରିୟା ଆସିଲା ନାହିଁ । ମହିଳା ଏବଂ ଶିଶୁ ବିକାଶ ମନ୍ତ୍ରଣାଳୟ ପକ୍ଷରୁ ଉତ୍ତର ଦିଆୟାଇଥିଲା, କିନ୍ତୁ ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ଏହା ଯଥେଷ୍ଟ ନୁହେଁ। ମୁଁ ଅନୁଭବ କରୁଛି ଯେ ଏହି ବିଷୟ ଉପରେ ଅଧିକ ଗୁରୁତ୍ବ ଦିଆଯାଇ ନାହିଁ । ''