ପାଟନା:କୁହାଯାଏ, ଇଚ୍ଛା ଥିଲେ ଉପାୟ ଆପେ ଆପେ ଆସେ । ଆଉ ଏହା କାମରେ କରି ଦେଖାଇଛନ୍ତି ବିହାରର ଜଣେ ଯୁବକ । ମାତ୍ର ୧୫ ହଜାର ଟଙ୍କା ଦରମାରେ ଚାକିିରୀ କରୁଥିବା ଅଜୟ ରାୟ ଆଜି ନିଜସ୍ବ ଉଦ୍ୟମରେ ହୋଇପାରିଛନ୍ତି କୋଟିପତି । ଆସନ୍ତୁ ଜାଣିବା ଉଦ୍ୟୋଗପତି (Entrepreneur) ଅଜୟ ରାୟ ଙ୍କ ସଫଳତାର ଯାତ୍ରା କିପରି ଥିଲା ? ଏତେ କମ ବୟସରେ ସେ କେମିତି ନିଜ ବ୍ୟବସାୟକୁ ଶିଖରରେ ପହଞ୍ଚାଇ ପାରିଲେ ?
Ajay Rai Success Story (ETV Bharat Bihar) ୧୫ ହଜାର ଦରମାରେ ଚାକିରୀ କରୁଥିଲେ:
ଡିଗ୍ରୀ ହାସଲ କରିବା ପରେ ୨୦୧୭ରେ ଅଜୟ ରାୟ ଇଣ୍ଟର୍ଣ୍ଣସିପ୍ କରୁଥିଲେ । ଯେଉଁଥିରେ ତାଙ୍କୁ ଷ୍ଟାଇପେଣ୍ଡ ବାବଦକୁ ମିଳୁଥିଲା ମାତ୍ର ୩ ହଜାର ଟଙ୍କା । ଏହାପରେ ସେ ଏକ କମ୍ପାନୀରେ ୧୫ ହଜାର ଟଙ୍କା ଦରମାରେ କାମ ଆରମ୍ଭ କରିଥିଲେ । ପରେ ତାଙ୍କୁ ଲାଗିଥିଲା ଚାକିରିରେ କୌଣସି କ୍ୟାରିୟର ନାହିଁ । ତେଣୁ ସେ କିଛି ନୂଆ କରିବା ପାଇଁ ନିଷ୍ପତ୍ତି ନେଇଥିଲେ ।
୬ ମାସ କଥା ହେଉନଥିଲେ ବାପା:
ଚାକିରି ଛାଡିବାରୁ ଅଜୟଙ୍କ ବାପା ତାଙ୍କ ସହ ୬ ମାସ ଧରି କଥାବାର୍ତ୍ତା ହେଉନଥିଲେ । ଏପରିକି ପରିବାରର ଅନ୍ୟ ସଦସ୍ୟମାନେ ମଧ୍ୟ ଅଜୟଙ୍କ ଏଭଳି ନିଷ୍ପତ୍ତିରେ ସହମତ ନଥିଲେ ।
'ମୋତେ ବହୁତ ରାଗ ଲାଗିଥିଲା'
ଅଜୟଙ୍କ ସଫଳତା ପରେ ତାଙ୍କ ବାପା କହିଛନ୍ତି, "ମୋତେ ଲାଗୁଥିଲା ପୁଅ ହୁଏତ କିଛି କରିପାରିବ ନାହିଁ । କାରଣ ସେ ଇଞ୍ଜିନିୟରିଂ ପରେ ଚାକିରୀ କରୁଥିଲା । ହେଲେ କିଛିଦିନ ପରେ ଚାକିରୀ ଛାଡି ଦେଇଥିଲା । ଯେଉଁ କଥାକୁ ମୁଁ ଆଦୌ ଗ୍ରହଣ କରିନଥିଲି । ମୋତେ ବହୁ ରାଗ ଲାଗିଥିଲା । ହେଲେ ଅଜୟର ପରିଶ୍ରମର ଫଳ ଭଗବାନ ତାକୁ ଦେଇଛନ୍ତି । ଆଜି ସେ ନିଜର ପରିଚୟ ସୃଷ୍ଟି କରିବାରେ ସଫଳ ହୋଇପାରିଛି ।"
Ajay Rai Success Story (ETV Bharat Bihar) ବସରେ ବସି କାମ କରୁଥିଲେ:
୨୦୨୦ରେ ଅଜୟ ନିର୍ମାଣ କରିଥିବା କମ୍ପାନୀର ନାଁ ଅପକୋଚ(UPcoach) ରଖିଥିଲେ । ଏହାପରେ ସେ ବିଦେଶୀ ଗ୍ରାହକଙ୍କ ସହ ସମ୍ପର୍କ ସ୍ଥାପନା କରିଥିଲେ । ପୂର୍ବରୁ ଅଜୟ ବାଇକ ଯୋଗେ ଡ୍ୟୁଟି ଯାଉଥିବାବେଳେ ପରେ ସେ ବସ ଯୋଗେ ଯାତ୍ରା କରୁଥିଲେ । କାରଣ ବସରେ ଯାତ୍ରା ସମୟରେ ତାଙ୍କର କାମ କରିବା ପାଇଁ ୩ ଘଣ୍ଟାର ସମୟ ମିଳୁଥିଲା । ସେ ଅନଲାଇନ କୋଚିଂ ଦେଉଛନ୍ତି ।
ବିଦେଶରେ ଖୋଲିଲେ ଅଫିସ:
ଅଫିସରେ ଥିବା ସିନିୟରଙ୍କ ପାଖରେ ବସିବା ସମୟରେ ରିସର୍ଚ୍ଚ ଡେଭଲପମେଣ୍ଟ କାମ ଶିଖିଥିଲେ ଅଜୟ । ବସରେ ଯାତ୍ରା କରିବା ସମୟରେ ସେ ସୋସିଆଲ ମିଡିଆରେ ଗ୍ରାହକଙ୍କୁ ଫ୍ରେଣ୍ଡ ରିକ୍ବେଷ୍ଟ ପଠାଇ ଯୋଗାଯୋଗ କରୁଥିଲେ । ଏହାପରେ ତାଙ୍କୁ ଧୀରେ ଧୀରେ କାମ ମିଳିବା ଆରମ୍ଭ ହେଲା । ସମୟକ୍ରମେ ଦୁବାଇ ଓ କଲମ୍ବିଆରେ ଅଫିସ ଖୋଲିଲେ ଅଜୟ ।
ୟୁରୋପୀୟ ଦେଶରେ ବ୍ୟବସାୟ:
୧୫-୧୬ ଦେଶରେ ରହିଛନ୍ତି ଅଜୟଙ୍କ ଗ୍ରାହକ । ତେବେ ଅଜୟ କିଛି ଭିନ୍ନ ଯୋଜନାକୁ ନେଇ କାମ ଆରମ୍ଭ କରିଥିଲେ । ସେ ୟୁରୋପରେ ବିଜନେସ କୋଚ୍ ପାଇଁ ମନସ୍ଥ କରିଥିଲେ । ଅର୍ଥାତ୍, ସେହି କୋଚଙ୍କ ଜରିଆରେ ଲୋକଙ୍କ ସମସ୍ୟାର ସମାଧାନ କରାଯାଇପାରିବ । ଯଦି ଜଣଙ୍କୁ ବିବାହ କରିବାର ଅଛି ସେଥିପାଇଁ ମଧ୍ୟ କୋଚଙ୍କ ପରାମର୍ଶ ନିଆଯାଇପାରିବ । ଏହିପରିଭାବେ କୋଚଙ୍କ ବ୍ରାଣ୍ଡିଂ କାମ ଆରମ୍ଭ କରିଥିଲେ ଅଜୟ ।
Ajay Rai Success Story (ETV Bharat Bihar) ୫୦ରୁ ଅଧିକ ଲୋକଙ୍କୁ ଦେଲେ ରୋଜଗାର:
ଏହାବ୍ୟତୀତ ଅଜୟ ନିଜର ଆଉ ଏକ କମ୍ପାନୀର ନାମ ରଖିଥିଲେ 'ଟ୍ରାଫିକ ଏକ୍ସପର୍ଟ' । ଯାହାର ମୁଖ୍ୟାଳୟ ନ୍ୟୁୟର୍କରେ ହୋଇଥିବାବେଳେ ଏହା ଗୁଗୁଲ ଟ୍ରାଫିକ ଉପରେ ନଜର ରଖିଥାଏ । ଏହି କମ୍ପାନୀରେ ଅଜୟଙ୍କ ଜଣ ସହଯୋଗୀ ପାର୍ଟନରସିପ୍ ମଧ୍ୟ ରହିଛନ୍ତି । ତେବେ କମ୍ପାନୀର ଟର୍ଣ୍ଣଓଭର ୧୦କୋଟିରୁ ଅଧିକ ହୋଇଥିବାବେଳେ ସେ ୫୦ରୁ ଅଧିକ ଲୋକଙ୍କୁ ରୋଜଗାରକ୍ଷମ କରାଇଛନ୍ତି ।
ଏନେଇ ଅଜୟ କହିଛନ୍ତି, "୧୫ ହଜାର ଟଙ୍କାର ଚାକିରିରେ ମୁଁ ସନ୍ତୁଷ୍ଟ ନଥିଲି । ତେଣୁ ନିଜର ବ୍ୟବସାୟ ଆରମ୍ଭ କରିବାକୁ ନିଷ୍ପତ୍ତି ନେଇଥିଲି । ସେତେବେଳେ ମୋ ଉପରେ ବାପା ବିରକ୍ତ ହେଉଥିଲେ । ହେଲେ ଆଜି ପରିବାରର ସମସ୍ତ ଦାୟିତ୍ବ ତୁଲାଉଛି ।"
ଏହା ବି ପଢନ୍ତୁ...ଦିନେ ଚାକିରି କରୁଥିଲେ ଏବେ କିନ୍ତୁ ସଫଳ ବ୍ୟବସାୟୀ, ନିଜ ଅଞ୍ଚଳରେ ପିଲାଙ୍କୁ ଦେଇଛନ୍ତି ରୋଜଗାର - Gayadhar Parida sasmi tea company
ସମାଜସେବା ପ୍ରତି ଆଗ୍ରହ:
ଜନକଲ୍ୟାଣକାରୀ କାର୍ଯ୍ୟ ତଥା ସମାଜ ପାଇଁ କିଛି କରିବାକୁ ସେ ବହୁତ ଆଗ୍ରହୀ । ଯେତେବେଳେ ବି ସୁଯୋଗ ମିଳେ, ନିଜ ଗାଁ ଡୁମ୍ରାଓରେ ଗରିବ ଲୋକଙ୍କ ମୁହଁରେ ହସ ଫୁଟାଇବାକୁ ସେ ସମସ୍ତ ପ୍ରକାର ସାହାଯ୍ୟ ସହଯୋଗ କରିଥାନ୍ତି । କୋଭିଡ ମହାମାରୀ ସମୟରେ ମଧ୍ୟ ସେ ଅନେକ କାମ କରିଛନ୍ତି । ଏହାସହ ଗରିବ ଲୋକଙ୍କୁ ରୋଜଗାର ଯୋଗାଉଥିବାବେଳେ ଜଣେ ବ୍ୟକ୍ତିଙ୍କ ଝିଅର ବିବାହ ଖର୍ଚ୍ଚ ମଧ୍ୟ ତୁଲାଇଛନ୍ତି । ଅଜୟ କହିଛନ୍ତି, "ମୁଁ ବିହାର ପାଇଁ କିଛି କରିବାକୁ ଚାହୁଁଛି । ଯୁବବର୍ଗଙ୍କ ପାଇଁ ପାଟନାରେ ଏକ ତାଲିମ କେନ୍ଦ୍ର ଖୋଲିବାର ଲକ୍ଷ୍ୟ ରହିଛି ।"
ଇଟିଭି ଭାରତ, ପାଟନା
