ହାଇଦ୍ରାବାଦ:ଆସୁଛି ସୁପର ଆପ୍ । ହାତପାହାନ୍ତାରେ ଯାତ୍ରୀଙ୍କୁ ମିଳିବ ରେଳବାଇର ସମସ୍ତ ସର୍ଭିସ । ଗୋଟିଏ ଆପରେ ହୋଇପାରିବ ରେଳବାଇ ସମ୍ବନ୍ଧିତ ଅନେକ କାମ । ଯେଉଥିପାଇଁ ଭାରତୀୟ ରେଳବାଇ ବର୍ତ୍ତମାନ ସୁପର୍ ଆପ୍ ପ୍ରସ୍ତୁତି ଚଳାଇଛି । ଏନେଇ କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ସୂଚନା ଦେଇଛନ୍ତି । କ'ଣ ଏହି ସୁପର ଆପ୍, ଆସନ୍ତୁ ଜାଣିବା ।
ରେଳବାଇର ସୁପର ଆପ୍:
ଭାରତୀୟ ରେଳବାଇ ବର୍ତ୍ତମାନ ସୁପର୍ ଆପ୍ ପ୍ରସ୍ତୁତ କରୁଥିବା ଜଣାପଡ଼ିଛି । ଏନେଇ କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି, "ଭାରତୀୟ ରେଳବାଇ ଏକ ଆପ୍ଲିକେସନ ପ୍ରସ୍ତୁତ କରିବାରେ ବ୍ୟସ୍ତ ଅଛି ଯାହାଦ୍ବାରା ରେଳବାଇର ସମସ୍ତ କାମ ହୋଇପାରିବ । ଯଦିଓ ଆପରେ କେଉଁ କେଉଁ ସୁବିଧା ମିଳିବ ସେନେଇ ମନ୍ତ୍ରୀ ସ୍ପଷ୍ଟ ସୂଚନା ଦେଇନାହାନ୍ତି, କିନ୍ତୁ କୁହାଯାଉଛି ଯେ ଟିକେଟ ବୁକିଂରୁ ଆରମ୍ଭ କରି ଟ୍ରେନ୍ ଟ୍ରାକିଂ ଯାଏଁ ସୁବିଧା ମିଳିପାରେ ।"ଜାତୀୟ ଗଣମାଧ୍ୟମ ରିପୋର୍ଟ ଅନୁସାରେ, ଏଥିପାଇଁ ପାଖାପାଖି ୯୦କୋଟି ଟଙ୍କା ଖର୍ଚ୍ଚ ହୋଇପାରେ । ଏଥିସହ ୩ ବର୍ଷରୁ ଅଧିକ ସମୟ ମଧ୍ୟ ଲାଗିପାରେ । ରେଳବାଇର ଏହି ସୁପର ଆପକୁ ପ୍ରସ୍ତୁତ କରିବ CRIS । କହିରଖୁଛୁ, ଏହି ସଂସ୍ଥା ରେଲୱେର ସମସ୍ତ ଆଇଟି କାମ ଦାୟିତ୍ବରେ ଅଛି।
ସୁରକ୍ଷା ବିଷୟରେ ଏମିତି କହିଲେ ମନ୍ତ୍ରୀ:
ରେଳବାଇ ସୁରକ୍ଷା ପ୍ରସଙ୍ଗରେ ମନ୍ତ୍ରୀ କହିଛନ୍ତି, "୧୦ ବର୍ଷ ତଳେ ପ୍ରତିବର୍ଷ ଦେଢ ଶହରୁ ଉର୍ଦ୍ଧ୍ବ ରେଳ ଦୁର୍ଘଟଣା ଘଟୁଥିଲା । ଯାହାକି ଏବେ ୪୦କୁ ହ୍ରାସ ପାଇଛି । ଏହାବ୍ୟତୀତ ସମସ୍ତ ଅତ୍ୟାଧୁନିକ ସୁବିଧା ସୁଯୋଗ ପ୍ରଦାନ ସହ ଯାତ୍ରୀଙ୍କ ସୁରକ୍ଷା ପାଇଁ ଭାରତୀୟ ରେଳବାଇ ପ୍ରତିଶ୍ରୁତିବଦ୍ଧ । ଯେପରିକି ଏହି ଦୁର୍ଘଟଣା ସଂଖ୍ୟା ଆହୁରି ହ୍ରାସ ପାଇବ ସେଥିପାଇଁ ପ୍ରଚେଷ୍ଟା ଚାଲିଛି ।"