ଅଗ୍ନିବୀରଙ୍କ ଲାଗି ବଡ଼ ଘୋଷଣା; ମିଳିବ 10% ସଂରକ୍ଷଣ, ବୟସ ସୀମାରେ ବି କୋହଳ - Reservation For former Agniveer

RESERVATION FOR FORMER AGNIVEER: ଅଗ୍ନିବୀର ଯୋଜନାକୁ ବାଦ ବିବାଦ ମଧ୍ୟରେ କେନ୍ଦ୍ର ସରକାରଙ୍କ ବଡ଼ ଘୋଷଣା । ଏଣିକି ପୂର୍ବତନ ଅଗ୍ନିବୀରଙ୍କୁ ମିଳିବ ଏହି ସମସ୍ତ ସୁବିଧା । ଅଧିକ ପଢନ୍ତୁ

ନୂଆଦିଲ୍ଲୀ: କେନ୍ଦ୍ର ସରକାର ଅଗ୍ନିବୀରଙ୍କ ଲାଗି କରିଛନ୍ତି ବଡ଼ ଘୋଷଣା । ପୂର୍ବ ଅଗ୍ନିବୀରଙ୍କୁ ଅର୍ଦ୍ଧସୈନିକ ବଳ CISF ଓ BSFରେ ଏଣିକି 10 ପ୍ରତିଶତ ସଂରକ୍ଷଣ ମିଳିବ । ଏହାବାଦ ବୟସ ସୀମାରେ ମଧ୍ୟ କୋହଳ ମିଳିବ । ସିଆଇଏସଏଫ ଓ ବିଏସଏଫ ପ୍ରମୁଖ ଗୁରୁବାର ଏହି ଘୋଷଣା କରିଛନ୍ତି । କେନ୍ଦ୍ର ଗୃହ ମନ୍ତ୍ରଣାଳୟର ନିଷ୍ପତ୍ତି ଅନୁସାରେ କନେଷ୍ଟବଳ ନିଯୁକ୍ତିରେ 10 ପ୍ରତିଶତ ପଦବୀ ପୂର୍ବତନ ଅଗ୍ନିବୀରଙ୍କ ଲାଗି ସଂରକ୍ଷିତ ରହିବ । ସେନା, ନୌସେନା ଏବଂ ବାୟୁସେନାରେ ସ୍ବଳ୍ପକାଳୀନ କର୍ମଚାରୀ ନିଯୁକ୍ତି ପାଇଁ ଅଗ୍ନିପଥ ଯୋଜନାକୁ ନେଇ ପ୍ରଶ୍ନ ଉଠିଥିବା ବେଳେ ସିଆଇଏସଏଫ ଏବଂ ବିଏସଏଫ ଏହି ଘୋଷଣା କରିଛି ।

ସିଆଇଏସଏଫ ମହାନିର୍ଦ୍ଦେଶିକା ନୀନା ସିଂ କହିଛନ୍ତି ଯେ ପୂର୍ବତନ ଅଗ୍ନିବୀର କର୍ମଚାରୀମାନଙ୍କ ନିଯୁକ୍ତି ନେଇ କେନ୍ଦ୍ର ଗୃହ ମନ୍ତ୍ରଣାଳୟ ଏକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇଛି । ଯାହା ଅନୁଯାୟୀ ପୂର୍ବତନ ଅଗ୍ନିବୀରଙ୍କ ନିଯୁକ୍ତି ପାଇଁ ସିଆଇଏସଏଫ ମଧ୍ୟ ପ୍ରକ୍ରିୟା ପ୍ରସ୍ତୁତ କରୁଛି । ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ୍ ସିକ୍ୟୁରିଟି ଫୋର୍ସ (ସିଆଇଏସଏଫ) ର ମୁଖ୍ୟ କହିଛନ୍ତି ଯେ ବର୍ତ୍ତମାନଠାରୁ ସମସ୍ତ କନଷ୍ଟେବଳ ନିଯୁକ୍ତିରେ ପୂର୍ବତନ ଅଗ୍ନିବୀରଙ୍କ ପାଇଁ 10 ପ୍ରତିଶତ ପଦବୀ ସଂରକ୍ଷିତ ରହିବ ।

ଫିଜିକାଲ ଟେଷ୍ଟରେ ବି କୋହଳ:-

ଡିଡି ନ୍ୟୁଜ୍ ସହ ଆଲୋଚନା ସମୟରେ ନୀନା ସିଂ କହିଛନ୍ତି ଯେ ଶାରୀରିକ ପରୀକ୍ଷା ଓ ବୟସ ସୀମାରେ ମଧ୍ୟ ଅଗ୍ନିବୀରଙ୍କୁ କୋହଳ କରାଯିବ । ପ୍ରଥମ ବର୍ଷରେ ବୟସ ସୀମା ପାଞ୍ଚ ବର୍ଷ ପାଇଁ କୋହଳ କରାଯାଇଥିବା ବେଳେ ପରବର୍ତ୍ତୀ ବର୍ଷରେ ବୟସ ସୀମା ତିନି ବର୍ଷକୁ କୋହଳ କରାଯାଇଛି । ନୀନା ଆହୁରି କହିଛନ୍ତି ଯେ ପୂର୍ବତନ ଅଗ୍ନିବୀର ଏହାର ଫାଇଦା ଉଠାଇ ପାରିବେ ଏବଂ ସିଆଇଏସଏଫ ନିଶ୍ଚିତ କରିବ ଯେ ସେମାନେ ନିଯୁକ୍ତିର ଲାଭ ପାଇବେ । ଏହା CISF ପାଇଁ ମଧ୍ୟ ଲାଭଦାୟକ, କାରଣ ସାମରିକ ବାହିନୀକୁ ତାଲିମପ୍ରାପ୍ତ ଏବଂ ଶୃଙ୍ଖଳିତ ସୈନ୍ୟ ମିଳିବେ ।

'ଅଗ୍ନିବୀର ଅନୁଶାସିତ ଓ ପ୍ରଶିକ୍ଷିତ କର୍ମୀ'

ସୀମା ସୁରକ୍ଷା ବଳ (ବିଏସଏଫ)ର ମହାନିର୍ଦ୍ଦେଶକ ନୀତିନ ଅଗ୍ରୱାଲ କହିଛନ୍ତି ଯେ ପୂର୍ବ ଅଗ୍ନିବୀରଙ୍କୁ 4ବର୍ଷର ଅଭିଜ୍ଞତା ରହିଛି । ସେ ସମ୍ପୂର୍ଣ୍ଣ ଭାବେ ଅନୁଶାସିତ ଓ ପ୍ରଶିକ୍ଷିତ । ଏହା ବିଏସଏଫ ପାଇଁ ବହୁତ ଭଲ କଥା । କାରଣ ବଳକୁ ପ୍ରଶିକ୍ଷିତ ଯବାନ ମିଳୁଛନ୍ତି । କିଛି ଦିନର ତାଲିମ ପରେ ସେମାନଙ୍କୁ ସୀମାବର୍ତ୍ତୀ ଅଞ୍ଚଳରେ ନିଯୁକ୍ତି ପ୍ରଦାନ କରାଯାଇପାରିବ ।

କଣ ଅଗ୍ନିପଥ ଯୋଜନା ଓ କାହିଁକି ଏହାର ବିରୋଧ ?

ଭାରତର ତିନି ସେନାରେ ବୟସ ସୀମା ହ୍ରାସ କରିବା ଉଦ୍ଦେଶ୍ୟରେ ସରକାର ଜୁନ 2022ରେ ଅଗ୍ନିପଥ ନିଯୁକ୍ତି ଯୋଜନା ଆରମ୍ଭ କରିଥିଲେ । 17ରୁ 21 ବର୍ଷ ବୟସର ଯୁବକମାନଙ୍କୁ 4ବର୍ଷ ଲାଗି ନିଯୁକ୍ତି ଦେବା ପାଇଁ ଏକ ବ୍ୟବସ୍ଥା କରାଯାଇଥିଲା । ସମସ୍ତ ଅଗ୍ନିବୀର 4 ବର୍ଷ ପାଇଁ ସେନାରେ ଭର୍ତ୍ତି ହେବେ । 4 ବର୍ଷର ସେବା ପରେ ଯବାନଙ୍କ ଦକ୍ଷତା ଓ ଦାୟିତ୍ବ ସମୀକ୍ଷା ହେବ । ସମୀକ୍ଷା ପରେ ମୋଟ ଅଗ୍ନିବୀର ରୁ 25 ପ୍ରତିଶତ ଅଗ୍ନିବୀର ଯବାନଙ୍କ ରେଗୁଲାର ସେନାରେ କାମ କରିବେ । ଅଗ୍ନିବୀରରୁ ଯାଇଥିବା ଯବାନ ମଧ୍ୟ ରେଗୁଲାର ସେବା ପରେ ସେନାର ବିଭିନ୍ନ ପଦପଦବୀ ସୁବିଧା ସୁଯୋଗ ପାଇବେ । ଅବଶିଷ୍ଟ 75 ପ୍ରତିଶତ ଅଗ୍ନିବୀର ଅବସର ଗ୍ରହଣ କରିବେ ।

କଂଗ୍ରେସ ସମେତ ଅନେକ ବିରୋଧୀ ଦଳ ଏହି ଯୋଜନାକୁ ବିରୋଧ କରିଛନ୍ତି । ଚାରି ବର୍ଷର ସେବା ପରେ 75 ପ୍ରତିଶତ ଅଗ୍ନିଶମ କର୍ମଚାରୀଙ୍କ ସହିତ କ’ଣ ହେବ ବୋଲି ସେମାନେ ପ୍ରଶ୍ନ କରିଛନ୍ତି।

ବ୍ୟୁରୋ ରିପୋର୍ଟ, ଇଟିଭି ଭାରତ