ପାଟନା: ପ୍ରଥମେ ଧୋକା ଦେଇ ବିବାହ, ପରେ ମହିଳାଙ୍କୁ ହତ୍ୟା । ଏଭଳି ଚାଞ୍ଚଲ୍ୟକର ଘଟଣା ଘଟିଛି ବିହାରର ପୂର୍ଣ୍ଣିଆରେ । ଜିଲ୍ଲାର ଶଶି ଥାନା ଅନ୍ତର୍ଗତ କୋସୀ ନଦୀରେ ଜଣେ ମହିଳାଙ୍କ ମୃତ ଦେହ ମିଳିଥିଲା । ମୃତକଙ୍କ ନାଁ ପୁତୁଲ ଦେବୀ ହୋଇଥିବା ବେଳେ ତାଙ୍କ ସ୍ବାମୀଙ୍କ ନାଁ ଅଜୟ ବୋଲି ଜଣା ପଡିଥିଲା । ତେବେ ମୃତ ପୁତୁଲଙ୍କ ପରିବାର ଲୋକ ତାଙ୍କ ସ୍ବାମୀ ଉପରେ ହତ୍ୟାର ଅଭିଯୋଗ ଆଣିଛନ୍ତି । ସୂଚନା ଅନୁସାରେ ଏହି ଘଟଣା ପରେ ଅଜୟ ନିଜର ସମ୍ପୂର୍ଣ୍ଣ ପରିବାର ସହିତ ଫେରାର ହୋଇ ଯାଇଛି ।
କଟିହାର ଜିଲ୍ଲାର ସମେଲି ଚାନ୍ଦପୁର ଗାଁରେ ରହୁଥିବା ମୃତକ ପୁତୁଲଙ୍କ ପରିବାରବର୍ଗ କହିଛନ୍ତି ଯେ, ଗତ ମାର୍ଚ୍ଚ ମାସ ୧୧ ତାରିଖରେ ବେଶ ଧୁମଧାମରେ ଅଜୟ ସହିତ ପୁତୁଲଙ୍କ ବିବାହ ହୋଇଥିଲା । କିନ୍ତୁ ଅଜୟ ପୂର୍ବରୁ ବିବାହିତ ଥିଲେ ଓ ତାଙ୍କର ୨ ଟି ସନ୍ତାନ ଥିବା କଥା ପୁତୁଲଙ୍କ ପରିବାରକୁ ଜଣା ନଥିଲା । ପୁତୁଲଙ୍କ ପରିବାର ଲୋକ କହିଛନ୍ତି ଯେ, ଅଜୟଙ୍କ ଦ୍ବିତୀୟ ବିବାହ ବିଷୟରେ ଅଜୟଙ୍କ ପ୍ରଥମ ପତ୍ନୀଙ୍କ ବାପଘର ଲୋକ ଜାଣିବା ପରେ ଘରକୁ ଆସି ପୁତୁଲଙ୍କୁ ଘର ଛାଡିଦେବା ପାଇଁ ଧମକେଇଥିଲେ । ପୁତୁଲ ନିଜ ବାପଘର ଯିବା ପରେ ସେଠାରେ ତାଙ୍କ ପରିବାର ଲୋକ ଅଜୟଙ୍କ ଘରକୁ ପୁଣି ନଯିବା ପାଇଁ କହିଥିଲେ ମାତ୍ର ପୁତୁଲ ଅଜୟଙ୍କ ସହ ବିବାହ ହୋଇଥିବାରୁ ତାଙ୍କ ସହ ରହିବେ ବୋଲି କହି ଚାଲିଯାଇଥିଲେ ।