वर्ध्याच्या एवोनिथ कंपनीमध्ये भीषण स्फोट; कंपनीतील 20 कामगार जखमी - NAGPUR FIRE

नागपूर : विदर्भातील वर्धा शहराच्या अगदी शेजारीचं असलेल्या भूगाव येथील एवोनिथ स्टील कंपनीत बुधवारी रात्री भीषण स्फोट झाल्याची घटना घडलीय. भूगाव येथील कंपनीत फर्निशच्या बाजूला हा स्फोट होऊन मोठी आग लागली आहे. कंपनीत कुलिंग प्रोसेसचं काम सुरू असताना स्फोट झाल्याची प्राथमिक माहिती समोर आली आहे. या स्फोटात सुमारे 20 कामगार जखमी आहेत.  यातील काही कामगार गंभीर असल्याची माहिती आहे. स्फोटाच्या घटनेनंतर स्थानिकांच्या मदतीनं जखमी आणि गंभीर जखमींना शहरातील सावंगी येथील आचार्य विनोबा भावे ग्रामीण रुग्णालयात दाखल करण्यात आलं आहे. या दुर्घटनेतील गंभीर जखमींना नागपूरला हलविण्यात येत असल्याची माहिती आहे. दरम्यान, स्फोटाच्या घटनेनंतर अग्निशमन दलास पाचारण करण्यात आलं असून आग आटोक्यात आणण्याचे प्रयत्न सुरू होते.