हैदराबाद :जगातील पहिला ट्रिपल फोल्ड फोन लॉंच होण्यासाठी सज्ज आहे. कंपनीच्या या फोनचं नाव Huawei Mate XT असेल. सप्टेंबर 2024 मध्ये लाँच झालेला हा फोन सध्या फक्त चीनमध्ये उपलब्ध आहे. आता फोन 18 फेब्रुवारी रोजी जागतिक बाजारपेठेत लाँच होणार आहे. आतापर्यंत Huawei ही ट्रिपल-फोल्ड फोन लाँच करणारी जगातील एकमेव कंपनी आहे.
18 फेब्रुवारीला जागतिक लाँच
आज सकाळी, हुआवेईनं त्यांच्या अधिकृत एक्स पेजवर एक नवीन पोस्ट केलीय. टीझरमध्ये 18 फेब्रुवारी रोजी क्वालालंपूरमध्ये 'हुआवेई इनोव्हेटिव्ह प्रोडक्ट लाँच' करणार असल्याचं म्हटलंय. Huawei Mate XT अलीकडेच TDRA प्रमाणन वेबसाइटवर दिसला होता. हा फोन तिथं GRL-LX9 मॉडेल नंबर म्हणून सूचीबद्ध झालाय. आता कंपनी 2025 मध्ये या फोनला जगातीक बाजारपेठेत लाँच करणार आहे.
Huawei Mate XT चा डिस्प्ले
या फोनमध्ये एक उत्तम OLED डिस्प्ले असेल. त्याचा स्क्रीन आकार 6.4 इंच असेल, परंतु उघडल्यावर तो मोठा होईळ. जेव्हा हा फोन अर्धा उघडला जाईल, तेव्हा त्याचा स्क्रीन आकार 7.9 इंच असणार आहे. फोन पूर्णपणे उघडल्यानंतर त्याची स्कीन 10.2 इंच होईल. फोनचा इतका मोठा डिस्प्ले असूनही, तो पूर्णपणे उघडल्यानंतर त्याची जाडी 3.6 मिमी राहते. त्यात Huawei चा Kirin 9010 5G चिपसेट देण्यात आला आहे.