आता ठाण्यात बिनधास्त लावा बॅनर; ठाणे महापालिका बॅनर धोरणातून उभारणार कोट्यवधी रुपये

Thane Corporation On Banner : शहरात लागलेल्या अनधिकृत बॅनरमुळं शहर विद्रूप दिसते, असा आरोप नेहमी करण्यात येतो. मात्र तरीही नागरिक मोठमोठे बॅनर लावतात. आता ठाणे महापालिका प्रशासनानं बॅनर लावणाऱ्यांना मुभाच दिली आहे. फक्त त्यासाठी नागरिकांना पैसे मोजावे लागणार आहेत.

ठाणे Thane Corporation On Banner :महानगरपालिका क्षेत्रामध्ये तात्पुरते बॅनर आणि पोस्टर लावण्याचं धोरण निश्चित करण्यात आलं आहे. त्यानुसार ठाणे शहरातील 204 जागा निश्चित केल्या गेल्या आहेत. ठाणे महानगरपालिकेची ऑनलाईन परवानगी घेऊनच हे पोस्टर आणि बॅनर लावता येतील. ऑनलाईन परवानगी मिळाल्यानंतरच सदर जागेवर तीन दिवसांपर्यंत पोस्टर आणि बॅनर लावण्याची मुभा दिली जाणार आहे. या धोरणामुळं ठाणे महापालिका प्रशासनाच्या तिजोरीत कोट्यवधी रुपयांचं उत्पन्न येणार आहे.

ठाण्यात लावण्यात आलेले बॅनर

शहरातील 204 जागांवर लावता येईल बॅनर :ठाणे महापालिका क्षेत्रातील मोक्याच्या ठिकाणी अनेक अनधिकृत बॅनर्स आणि पोस्टर्सची गर्दी नेहमीच पाहायला मिळते. महापालिकेच्या अधिकृत जागेवर असलेले पोस्टर्स अनधिकृतरित्या लावलेले आपण नेहमीच पाहतो. परंतु या पोस्टर्स आणि बॅनरमधून कोणतंच उत्पन्न मात्र महापालिकेला मिळत नसल्यानं मोठा आर्थिक फटका ठाणे महापालिका प्रशासनाला बसतो. त्यासाठी ठाणे महापालिका प्रशासनानं एक धोरण आखलं आहे. त्यानुसार ठाणे महापालिका क्षेत्रामध्ये होर्डिंग, फ्लेक्स, बॅनर्स आणि पोस्टर्स लावण्यासाठी तब्बल 204 जागा निश्चित करण्यात आल्या आहेत.

ऑनलाईन पद्धतीनं दिली जाईल परवानगी :ठाणे महानगरपालिकेचे आयुक्त अभिजीत बांगर यांनी दिलेल्या निर्देशानुसार या जागा निश्चित करण्यात आल्या आहेत. या प्रक्रियेसाठी एक पोर्टल तयार करण्यात आलं आहे. जाहिरातींचे बॅनर, पोस्टर लावण्यासाठी एक 'क्यू आर' कोड उपलब्ध करुन देण्यात आल्याची माहिती उपायुक्त (जाहिरात) महेश सागर यांनी दिली. सदरची योजना ही एक खिडकी योजना आहे. त्यामुळे परवानगी घेण्यासाठी कुठंही जाण्याची आवश्यकता नाही. ऑनलाईन पद्धतीनं ही परवानगी दिली जाईल, असं महेश सागर यांनी सांगितलं.

ठाणे शहरातील या भागात लावता येतील जाहिराती :फलकाच्या जागा निश्चित करण्यासाठी अतिरिक्त आयुक्त प्रकाश रोडे यांच्या मार्गदर्शनाखाली अतिक्रमण विभाग, जाहिरात विभाग आणि सर्व प्रभाग समितीचे सहायक आयुक्त यांनी सहकार्य केलं. यामध्ये माजीवडा- मानपाडा (52), लोकमान्यनगर-सावरकरनगर(19), वर्तकनगर (6), कळवा (5), वागळे इस्टेट (19), मुंब्रा (5), उथळसर (15), नौपाडा (22), कोपरी (21) अशा 204 जागा निश्चित करण्यात आल्या आहेत. तात्पुरत्या जाहिरातींसाठी 8*3, 8*3, आणि 6*3 असे तीन प्रकार निर्धारित करण्यात आले आहेत. त्यासाठी प्रति दिन प्रति चौरस फूट शंभर रुपये याप्रमाणं भाडं आकारलं जाणार असल्याची माहिती त्यांनी दिली आहे.

अनधिकृत बॅनर्सला चाप बसवण्यासाठी नवी प्रणाली :ठाणे महानगरपालिकेच्या वेब पोर्टलवर आवश्यक ती माहिती आणि निर्धारित भाडं भरल्यावर एक क्यूआर कोड तयार होईल. तो फलकावर लावणं बंधनकारक असेल, असं उपायुक्त महेश सागर यांनी सांगितलं. ठाणे महानगरपालिका क्षेत्रात अनधिकृत पोस्टर आणि बॅनर्स यावर आळा घालण्यासाठी ही परवानगीची प्रणाली विकसित करण्यात आली आहे. त्याचा जास्तीत जास्त वापर करावा, असं आवाहन उपायुक्त महेश सागर यांनी केलं आहे.

हेही वाचा :