ठाणे : मस्साजोगचे सरपंच संतोष देशमुख हत्या प्रकरण ताजं असतानाच, अजनुप ग्रामपंचायतीच्या माजी सरपंचावर भर रस्त्यात कार अडवून अज्ञात हल्लेखोरांकडून प्राणघातक हल्ला करण्यात आला आहे. धक्कादायक बाब म्हणजे या हल्ल्यात माजी सरपंचाचे दोन्ही पाय तोडल्यानं त्यांच्यावर कल्याणमधील एका खासगी रुग्णालयात उपचार सुरू आहेत. याप्रकरणी कसारा पोलीस ठाण्यात अज्ञात हल्लखोरांवर गुन्हा दखल करण्यात आला आहे. कदम उघडे असं हल्ल्यात गंभीर जखमी झालेल्या माजी सरपंचाचे नाव असून त्यांच्या कारची देखील तोडफोड करण्यात आली आहे. तर पोलिसांनी हल्लखोराचा शोध सुरू केल्याची माहिती, वरिष्ठ पोलीस निरीक्षक गावित यांनी दिली.
कारची तोडफोड आणि बेदम मारहाण : मिळालेल्या माहितीनुसार, अजनुप ग्रामपंचायतीचे माजी सरपंच कदम उघडे हे आपल्या कामानिमित्ताने कारने एकटेच आज सकाळी (२ जानेवारी) बाहेर निघाले होते. मात्र त्याच सुमारास अजनुप ग्रामपंचायतीच्या हद्दीत असलेल्या गायधरा गावाच्या माळरानात काही अज्ञात हल्लेखोरांनी त्यांची कार आडवली आणि कारवर दगडफेक केली. त्यानंतर कारमधून उघडे यांना बाहेर काढत बेदम मारहाण केली. या मारहाणीत त्यांच्या दोन्ही पायाला गंभीर दुखापत झाली आहे. त्यांना शहापूर येथील खासगी रुग्णालयात दाखल करण्यात आलं आहे. मात्र डॉक्टरांनी पायचं हाड तुटल्याचं सांगितलं. यामुळं पुढील उपचारासाठी त्यांना कल्याण येथे पाठवण्यात आल्याचं गावित यांनी सांगितलं.