'लॉरेन्स बिश्नोई को भेजू क्या', सलीम खान यांना धमकी दिल्याप्रकरणी अज्ञाताविरोधात गुन्हा दाखल - Salim Khan Threat

Salim Khan Threat : अभिनेता सलमान खानच्या (Salman Khan ) घरावर गोळीबार केल्याप्रकरणी तपास सुरू असतानाच, आता पुन्हा एकदा सलीम खान यांना धमकी मिळाल्यानं खळबळ उडाली आहे. सलीम खान यांना धमकी दिल्याप्रकरणी वांद्रे पोलिसात अज्ञाताविरोधात गुन्हा दाखल करण्यात आला आहे.

मुंबई Salim Khan Threat : प्रसिद्ध पटकथा लेखक आणि प्रसिद्ध अभिनेता सलमान खानचे (Salman Khan) वडील सलीम खान यांना मिळालेल्या धमकीच्या अनुषंगाने वांद्रे पोलीस ठाण्यात अज्ञात व्यक्ती आणि बुरखाधारी महिलेविरोधात भारतीय न्याय संहिता कलम 353(2), 292, 3(5) अन्वये गुन्हा दाखल करण्यात आला आहे. सीसीटीव्ही फुटेजच्या आधारे अनोळखी आरोपीचा शोध चालू असल्याची माहिती, वांद्रे पोलीस ठाण्याचे वरिष्ठ पोलीस निरीक्षक संजय मराठे यांनी दिली आहे.

वांद्रे पोलीस ठाण्यात गुन्हा दाखल : सलीम खान यांना मिळालेल्या धमकीच्या अनुषंगाने, पोलीस हवालदार दीपक बोरसे, यांनी तक्रार दाखल केली आहे. तर अनोळखी स्कूटी चालक आणि बुरखाधारी महिलेविरोधात वांद्रे पोलीस ठाण्यात गुन्हा दाखल करण्यात आला आहे.

लॉरेन्स बिश्नोई को भेजू क्या? :सिने अभिनेता सलमान खानचे वडील सलीम खान आपल्या कुटुंबासह वांद्रे पश्चिम येथे गॅलेक्सी अपार्टमेंटमध्ये राहतात. 18 सप्टेंबर रोजी सकाळी 8.45 वाजता बँडस्टॅन्ड येथे मॉर्निंग वॉकसाठी गेले होते. ते थकल्याने विंडमेरे बिल्डिंगच्या समोर प्रोमोनाडमधील कट्ट्यावर बसले होते. गॅलेक्सीकडून बँड स्टॅन्डच्या दिशेने जाणारी एक अनोळखी स्कूटी आली. त्या स्कूटीवर पाठीमागे एक बुरखाधारी महिला बसली होती. ती स्कूटी यू टूर्न करून आली आणि त्यांनी सलीम खानच्या जवळ स्कूटी थांबवून, 'लॉरेन्स बिश्नोई को भेजू क्या' अशी धमकी देऊन निघून गेले.

आरोपीचा शोध सुरू :फिर्यादी असलेल्या पोलीस हवालदार यांनी त्या स्कूटीचा नंबर पहिला असता स्कूटीचा नं.7444 असल्याचं दिसलं. संपूर्ण नंबर त्यांना दिसला नाही. फिर्यादी यांचा सविस्तर जबाब नोंद करून त्या स्कूटी चालक आणि बुरखाधारी महिले विरोधात गुन्हा नोंद करण्यात आला. सीसीटीव्ही फुटेजच्या आधारे अनोळखी आरोपीचा शोध चालू असल्याची माहिती, वांद्रे पोलिसांनी दिली आहे.

हेही वाचा -