राजकारणातील 'तेल लावलेला पैलवान' कोणता टाकणार डाव ? निवडणुकीनंतर शरद पवारांच्या धक्कातंत्राची विरोधकांना धास्ती - Lok Sabha Election Result 2024

Lok Sabha Election Result 2024 : अनपेक्षित धक्कातंत्रामुळे राजकारणात ज्येष्ठ नेते शरद पवार यांना वेगळी ओळख आहे. त्यामुळेच त्यांना राजकारणातील तेल लावलेला पैलवान असं म्हणतात. लोकसभा निवडणुकीचा निकाल लागल्यानंतर पुन्हा राजकारण शरद पवार यांच्याभोवती फिरत आहे.

मुंबई Lok Sabha Election Result 2024 : लोकसभा निवडणूक निकाल 2024 मध्ये महायुतीला केवळ 18 जागा मिळाल्या. तर महाविकास आघाडीनं तब्बल 29 जागांवर मुसंडी मारली. देशातही 'इंडिया' आघाडीला मोठं यश मिळाल्यानं सरकार स्थापन करण्यास भाजपाला मोठी कसरत करावी लागणार आहे. 2019 ला राज्यात सर्वात मोठा पक्ष असूनही भाजपाला केवळ शरद पवारांमुळे सत्ता स्थापन करता आली नाही. तशीच स्थिती आता उद्भवण्याची शक्यता निर्माण झाली. इंडिया आघाडीच्या नेत्यांनी मित्रपक्षांना गळ घालण्याची जबाबदारी शरद पवार यांच्यावर टाकली. त्यामुळे केंद्रात आणि राज्यात नेहमीच प्रभावी आणि बेभरोशी धक्कातंत्राचं राजकारण करणारे शरद पवार हे यावेळी किंगमेकर ठरणार का, याकडं नागरिकांचं लक्ष लागलं आहे.

ज्येष्ठ नेते शरद पवार (Reporter)

अनपेक्षित धक्कातंत्रासाठी ओळखले जातात शरद पवार :राष्ट्रवादी काँग्रेस शरदचंद्र पक्षाचे अध्यक्ष शरद पवार राजकारणात आपल्या खेळीनं धक्का देतात. महाराष्ट्रात 2019 ला विधानसभेच्या निवडणुकीत भाजपा सर्वात मोठा पक्ष असल्यानं त्यांचं सरकार स्थापन होईल हे निश्चित झालं. मात्र शरद पवार यांनी काँग्रेस शिवसेना राष्ट्रवादी तिघांना एकत्र करत महाविकास आघाडीची स्थापना करुन सरकार आणलं. महाविकास आघाडी सरकारनं करोना महामारीतही चांगलं काम केल्याचा दावा केला. काँग्रेस आणि शिवसेनेला एकत्र आणण्यात शरद पवार यांचा महत्त्वाचा वाटा आहे. राजकारणात शरद पवार आपल्या राजकीय खेळीमुळे कायम वरचढ ठरले आहेत.

पक्षासह घरात फूट पडल्यानंतर मिळवलं यश :महाविकास आघाडी सरकार कोसळल्यानंतर, शिवसेना आणि राष्ट्रवादी काँग्रेस पक्ष भाजपानं फोडल्याचा आरोप महाविकास आघाडीकडून करण्यात आला. शरद पवार यांच्या राष्ट्रवादी काँग्रेस पक्षात फूट पडल्यानंतर अजित पवार यांनी सत्ताधारी भाजपाला साथ दिली. यावेळी शरद पवारांसोबत सुप्रिया सुळे, श्रीनिवास पाटील, अमोल कोल्हे प्रदेशाध्यक्ष जयंत पाटील, जितेंद्र आव्हाड, अनिल देशमुख आदी नेतेच उरले. मात्र तरीही राष्ट्रवादी काँग्रेस शरदचंद्र पवार पक्षानं 8 लोकसभा मतदार संघात विजय संपादन केला.

भाजपाच्या राजकारणाची चिरफाड :राष्ट्रवादी काँग्रेस पक्षात फूट पडल्यावर शरद पवार यांनी आपल्या पदरी दहा जागा पाडून घेतल्या. पक्षाच्या वाट्याला आलेल्या मतदार संघावर वैयक्तिक लक्ष देऊन पक्षाचा उमेदवार देताना शरद पवार यांनी सत्ताधारी पक्षातील नाराजांना हेरलं. प्रचारादरम्यान भाजपाच्या राजकारणाची चिरफाड करुन कशाप्रकारे शेती, शेतकऱ्यांच्या विरोधात भाजपा सरकार काम करते, याचा पाढा जनतेपुढं वाचला. त्यामुळे शरद पवार यांच्या पक्षातील उमेदवारांनी महायुतीतील दिग्गजांचा पराभव केला आहे.

महाराष्ट्राच्या राजकारणातील मराठा योद्धा :महाराष्ट्राच्या राजकारणात मराठा योद्धा, चाणक्य म्हणून शरद पवार हे ओळखले जातात. राजकारणात त्यांच्याशी पंगा घेणं सोपं नसल्याचं पुन्हा एकदा सिद्ध झालं. राजकारणाचे सगळे पवित्रे वापरत निवडणूक जिंकू शकतो, हे त्यांनी दाखवून दिलं. राजकारण शरद पवारांच्या अवतीभोवती फिरत असते, हे देखील पुन्हा एकदा अधोरेखित झालं. शरद पवारांनी प्रयत्न केल्यास तर इंडिया आघाडी देखील सत्तेचं गणित जुळून आणू शकते. एनडीएच्या सत्ता स्थापनेसाठी नितीश कुमार आणि चंद्राबाबू नायडू यांची महत्त्वाची भूमिका राहणार आहे. तर दुसऱ्या बाजूला शरद पवार हे देखील त्यांच्या संपर्कात असल्याची माहिती समोर येत आहे. शरद पवारांबाबत नेहमीच बोललं जातं की ते जे बोलतात, त्याच्या उलट दिशेनं होत असते. राजकारणात शरद पवार कोणती गुगली टाकतात, याचा थांग पत्ता लागत नाही. त्यामुळे शरद पवार यांची राजकीय खेळी नेमकी कोणती असेल आणि कायम सत्तेत राहणारे शरद पवार यावेळी इंडिया आघाडीच्या संदर्भात कोणती खेळी करतात, हे पाहणं महत्त्वाचं ठरणार आहे.

हेही वाचा :